ខេត្តក្រចេះ ៖ កម្មករអារឈើ៣នាក់បានរងរបួសធ្ងន់ធ្ងរស្រាល ក្នុងហេតុការណ៍ផ្ទុះគ្រាប់ នៅពេលដែលពួកគេបានចូលទៅអារឈើក្នុងព្រៃជ្រៅមួយ នៅខាងក្រោយឃុំស្វាយជ្រៈ ក្នុងស្រុកស្នួល និងបានជួបហេតុការណ៍ផ្ទុះនៅវេលាព្រឹកថ្ងៃទី២២ ខែវិច្ឆិកា បណ្តាលឲ្យរងរបួសធ្ងន់ស្រាលទាំង៣នាក់ ។
យ៉ាងណាក្នុងហេតុការណ៍ផ្ទុះគ្រាប់បណ្តាលឲ្យមានមនុស្សរងរបួសនេះមិនបានបង្កឲ្យប៉ះពាល់ដល់អាយុជីវិតមនុស្សនោះទេ ដោយគ្រាន់តែបុរសរងគ្រោះទាំង៣នាក់ត្រូវរងរបួសធ្ងន់ស្រាលលើរាងកាយ និងជើង ហើយភ្លាមៗក្រុមជនរងគ្រោះជាកម្មករត្រូវបានសមត្ថកិច្ចនិង ក្រុមគ្រួសារបញ្ជូន ទៅសង្គ្រោះនៅមន្ទីរពេទ្យផ្សេងៗគ្នា ។
ជនរងគ្រោះជាកម្មករទាំង៣នាក់សុទ្ឋសឹងតែមានទីលំនៅជាមួយគ្នាក្នុងឃុំឃ្សឹម ស្រុកស្នួល និងមានមុខរបរជាអ្នកស៊ីឈ្នួលអារឈើ ។
អធិការនគរបាលស្រុកស្នួល លោកវរសេនីយ៍ឯក ចាន់ សុខគីមបានបញ្ជាក់ថា សមត្ថកិច្ចនៅមិនទាន់បានសន្និដ្ឋានលើប្រភេទគ្រាប់ផ្ទុះមួយនេះថា ជាប្រភេទគ្រាប់អ្វីឲ្យប្រាកដនោះទេ ។
សមត្ថកិច្ចបានឲ្យដឹងថា កម្មករទាំងបីនាក់បានចូលទៅកាត់ផ្តួលឈើធំមួយដើម និងបានដាក់ម៉ាស៊ីនត្រង់ស៊ីន័រដែលកាត់ផ្តួលឈើនោះទៅលើគ្រាប់មួយគ្រាប់ នៅក្នុងដីដែលនៅក្បែរនោះ បណ្តាលឲ្យផ្ទុះរញ្ជួយដីនៅក្នុងព្រៃ ។ ភ្លាមៗក្រោយការលាន់លឺសម្លេងផ្ទុះ និងមានការរាយការណ៍ សមត្ថកិច្ចបានចូលទៅក្នុងព្រៃតំបន់កើតហេតុដើម្បីចាត់ចែងសង្គ្រោះក្រុមជនរងគ្រោះទាំង៣នាក់ ។
គួរបញ្ជាក់ថា កន្លងមកក្នុងតំបន់ភូមិសាស្ត្រន៍នៅស្រុកស្នួល តែងតែមានការផ្ទុះគ្រាប់ ជាញឹកញាប់ ដោយសារតែតំបន់នោះសព្វថ្ងៃគ្រាប់យុទ្ឋភ័ណ្ឌមិនទាន់ផ្ទុះនៅសេសសល់ច្រើនក្នុងព្រៃ និងតំបន់នានា បើទោះបីជាមានការរុករកពីក្រុមមន្ត្រីជំនាញតែការមិនទាន់អស់នៅឡើយទេ ៕
ចែករំលែកព័តមាននេះ