ខេត្តកំពង់ឆ្នាំង ៖ រថយន្តធុនធំ២គ្រឿងបុកគ្នាពេញទំហឹងលាន់ដូចរន្ទះ បណ្ដាលឲ្យមនុស្សជិះលើរូបរថយន្តទាំងសងខាងបានរងរបួសធ្ងន់ និងស្រាលចំនួន៣នាក់ ។ ហេតុការណ៌នេះបានឡើងនៅវេលាម៉ោង០៥និង១០នាទីព្រឹក ថ្ងៃទី២២ ខែវិច្ឆិកា ឆ្នាំ២០១៧ នៅលើផ្លូវជាតិលេខ៥ ក្នុងភូមិព្រៃពួចខ្សាច់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។
នគរបាលចរាចរណ៍ស្រុករលាប្អៀរ ដែលកំពុងសម្រួលចរាចរនៅកន្លែងកើតហេតុ បានឲ្យដឹងថា រថយន្តទាំង២គ្រឿងបុកគ្នានេះ មួយគ្រឿងពាក់ស្លាកលេខ ពោធិសាត់ ៣A-០៧៥៥ ជារថយន្តដឹកបន្លែ និងផ្លែឈើ ពីរាជធានីភ្នំពេញទៅខេត្តពោធិ៍សាត់ មួយគ្រឿងទៀតជារថយន្តភ្លៅ៥ ពាក់ស្លាកលេខ ក្រចេះ ៣A-០២១៩ ដឹកគ្រឿងសំណង់ពីប៉ោយប៉ែតទៅរាជធានីភ្នំពេញ ច្រាសទិសគ្នា ។ លុះបើកបរមកដល់ចំណុចកើតហេតុ ក៏បានបុកគ្នាពេញទំហឹងតែម្តង បណ្ដាលឲ្យរថយន្តដឹកផ្លែឈើដាច់ជញ្ជាំងជាប់ជាមួយរថយន្តភ្លៅ៥ និងក្រឡាបើផ្ងារជើង ចំណែករថយន្តភ្លៅ៥ ដាច់កង់មុខខាងឆ្វេង ខូតខាតរថយន្តធ្ងន់ធ្ងរដូចគ្នា ។
នៅក្នុងករណីនេះ បណ្ដាលឲ្យអ្នកបើកបរថយន្ត២នាក់របួសធ្ងន់មួយបាក់ជើង២កំណាត់ និងម្នាក់របួសស្រាល (អ្នករបួសសន្លប់មិនស្គាល់ឈ្មោះឡើយ) ។ ក្រោយពេលកើតហេតុ អ្នករបួសទាំង៣នាក់បានជាប់ក្នុងកាប៊ីនរថយន្ត ត្រូវបានសមត្ថកិច្ចនាំគ្នាគាស់ទ្វាររថយន្តជាងកន្លះម៉ោងទើបយកចេញរួច ក្រោយមកទើបរថយន្តពេទ្យមកដឹកអ្នករបួសទៅសង្គ្រោះនៅក្នុងមន្ទីរពេទ្យបង្អែក ខេត្តកំពង់ឆ្នាំង ។ នៅក្នុងករណីនេះ ក៏ធ្វើឲ្យស្ទះចរាចរផងដែរ ព្រោះតែរថយន្តទាំង២គ្រឿងបុកគ្នានៅចំកណ្ដាលទ្រូងផ្លូវជាតិតែម្តង ។
ក្រោយពេលកើតហេតុ រថយន្តទាំង២គ្រឿងត្រូវសមត្ថកិច្ចជួលរថយន្តធំអូសដាក់កៀនផ្លូវដើម្បីស្រួលចរាចរ និងបានវាស់វែងកសាងសំណុំរឿងតាមនីតិវិធី ៕
ចែករំលែកព័តមាននេះ