ខេត្តកំពង់ឆ្នាំង ៖ រហូតមកដល់ពេលនេះ គ្មានអ្នកសារព័ត៌មានណាម្នាក់ បានទទួលព័ត៌មាន អំពីការកាប់ និងដឹកជញ្ជូនឈើប្រណីតប្រភេទធ្នង់ ដែលដឹកពីស្រុកកំពង់លែង របស់ក្រុមឈ្មួញនោះទេ ព្រោះសម្អាងថា…
ខេត្តកំពង់ឆ្នាំង ៖ រហូតមកដល់ពេលនេះ គ្មានអ្នកសារព័ត៌មានណាម្នាក់ បានទទួលព័ត៌មាន អំពីការកាប់ និងដឹកជញ្ជូនឈើប្រណីតប្រភេទធ្នង់ ដែលដឹកពីស្រុកកំពង់លែង របស់ក្រុមឈ្មួញនោះទេ ព្រោះសម្អាងថា ការកាប់ និងដឹកជញ្ជូនដោយស្របច្បាប់ ដែលក្រុមឈ្មួញបានទិញពីប្រជាពលរដ្ឋ ជាម្ចាស់ឈើ មានដុះតាមព្រំស្រែ និងភូមិដ្ឋានជាដើម។ ជុំវិញបញ្ហានេះសូមរំឮកឡើងវិញដែរថា នៅក្នុងអំឡុងមុនរដូវបុណ្យភ្ជុំបិណ្ឌ លោក ម៉ម ឈឿម ប្រធានមន្ទីរ ព័ត៌មានខេត្តកំពង់ឆ្នាំង បានកោះហៅអ្នកសារព័ត៌មានស្ទើរទាំងអស់ក្នុងខេត្តកំពង់ឆ្នាំង ដោយអះអាងថា ឯកឧត្តមអភិបាលខេត្តបានស្នើអ្នកសារព័ត៌មានទាំងអស់មកប្រជុំពិភាក្សាគ្នាថា ប្រជាពលរដ្ឋ ក្នុងស្រុកកំពង់លែង ច្រើនគ្រួសារបានជួបការខ្វះខាត ពួកគាត់បានសុំលក់ដើមធ្នង់ ក្នុងដីភូមិ និងដីស្រែ របស់ពួកគាត់ សរុបចូលគ្នាមានចំនួន៥៤ ដើម គ្រានោះអ្នកសារព័ត៌មានគ្មានសិទ្ធិរារាំងទេ ព្រោះជាតម្រូវការរបស់ប្រជាពលរដ្ឋ ប៉ុន្តែ សូមឲ្យកាប់ និងដឹកជញ្ជូនមានតម្លាភាពតែប៉ុណ្ណោះ ។
ក្រោយមកក៏មានការដឹកជញ្ជូនឈើធ្នង់ចេញពីស្រុកកំពង់លែង យ៉ាងសស្រាក់ស្រស្រាំ ចាប់តាំងពីពេលនេះមក ដោយឈ្មួញសំអាងថា មានច្បាប់ពីអភិបាលខេត្ត ប៉ុន្តែការដឹកជញ្ជូនមិនបានជូនដំណឹងដល់ក្រុមអ្នកសារព័ត៌មានដូចការកំណត់គ្នា នៅមន្ទីរព័ត៌មាននោះទេ គឺក្រុមឈ្មួញបានកាប់ និងដឹកជញ្ជូនជាបន្តបន្ទាប់ ប្រៀបដូចអនាធិបតេយ្យយ៉ាងនោះដែរ។ រហូតដល់ពេលនេះក៏នៅមានដឹកជញ្ជូនជាបន្តទៀត ហេតុនេះហើយ ទើបគេឃើញដើមធ្នង់ធំៗរាប់សិបដើម ត្រូវបានគេដឹកមកលាក់ទុកនៅក្នុងដីភូមិមួយកន្លែង ស្ថិតនៅក្នុងភូមិគោកបន្ទាយ ឃុំគោកបន្ទាយ ស្រុករលាប្អៀរ ដែលជាកម្មសិទ្ធិរបស់លោក កែ រិទ្ធី អនុប្រធានមន្ទីរកសិកម្មខេត្តកំពង់ឆ្នាំង ដែលគេសង្ស័យថាជាឈើកាប់ មកខុសច្បាប់របស់ឈ្មួញឈើម្នាក់ឈ្មោះ ធុល ត្រូវជាប្អូនថ្លៃថ្នាក់ដឹកនាំខេត្ត។ ទាក់ទងនឹងរឿងនេះ លោក កែ រិទ្ធី អនុប្រធានមន្ទីរកសិកម្មខេត្តកំពង់ឆ្នាំង បានប្រាប់ឲ្យដឹងថា៖ ជាឈើរបស់ឈ្មោះ ធុល ជាប្អូនថ្លៃចៅហ្វាយខេត្ត ដែលគេមានច្បាប់កាប់ និងដឹកចេញពីស្រុកកំពង់លែងចំនួន៥៤ដើម ចំណែកលោកគ្រាន់ តែជួលដីចម្ការឲ្យគេទុកឈើតែប៉ុណ្ណោះ លោកមិនពាក់ព័ន្ធឡើយ។
ពាក់ពន្ធ័នឹងរឿងនេះ លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បាននិយាយថា៖ ក្នុងនាមយើងជាមន្ត្រីអនុវត្តន៍ច្បាប់បង្ក្រាបបទល្មើសព្រៃឈើ មិនគួរជួលដីឲ្យគេទុកឈើដូច្នេះឡើយទោះបីឈើមានច្បាប់ ឬអត់ច្បាប់ក៏ដោយក៏មិនត្រឹមត្រូវដែរ។ លោក កែ រិទ្ធី ឆ្លើយបែបនេះមិនត្រឹមត្រូវឡើយប្រសិនបើឈើនោះកាប់មកខុសច្បាប់វិញនោះ លោក កែ រិទ្ធី ក៏ត្រូវមានទោសដូចគ្នាជាមួយជនល្មើសជាម្ចាស់ឈើដែរ។ លោកបានបញ្ជាក់ដែរថា ការដឹកជញ្ជូនយកមកលាក់ទុកបែបនេះគឺខុសច្បាប់ហើយ ក្នុងរឿងនេះដែរ លោក នឹងចាត់តាំងជំនាញឲ្យចុះត្រួតពិនិត្យ និងស្រាវជ្រាវឲ្យបានច្បាស់។ ដោយឡែកលោក សៀង រស់ នាយរងខណ្ឌរដ្ឋបាលព្រៃឈើកំពង់ឆ្នាំងវិញ បាននិយាយឲ្យដឹងដែរថា៖ ឈើទាំងនោះក្រុមឈ្មួញពេលកាប់ដឹកជញ្ជូនបានរាយការណ៍ជាប្រចាំ។ ចំណែកក្រុមអ្នកកាសែត កាលពីប្រជុំនៅមន្ទីរព័ត៌មាន ថាឲ្យជួយមើលគ្នា តែមិនដែលឃើញអ្នកកាសែតជួយមើលទេចាំតែស្រែក….។ ទោះយ៉ាងនេះក្តីលោកបញ្ជាក់ថា មកដល់ពេលនេះឈើដែលឈ្មួញដឹកចេញមានចំនួន៣៣ដើមហើយ សល់២៤ដើមទៀត មិនទាន់បានកាប់ព្រោះកន្លែងខ្លះប៉ះពាល់ដើមស្រូវទុំមិនអាចកាប់បាន។
ជុំវិញប្រសាសន៍របស់លោក សៀង រស់ នាយរងខណ្ឌរដ្ឋបាលព្រៃឈើកំពង់ឆ្នាំង ក៏ត្រូវបានអ្នកសារព័ត៌មានប្រតិកម្មដែរថា មិនមែនអ្នកសារព័ត៌មាន មានពេលទៅអង្គុយចាំរាប់ដើមធ្នង់នោះទេ តែសុំឲ្យតែការដឹកនោះមានតម្លាភាព ព្រោះតាំងពីពេលនោះមកដល់ពេលនេះឈើដឹកចេញរាប់មិនអស់ ហើយបើតាមរបាយការណ៍ថា ដឹកទើបបាន៣៣ដើម ហាក់ដូចជាមិនតុល្យភាពក្នុងការដឹកជញ្ជូនសោះ។ ជុំវិញបញ្ហានេះដែរ បានជាអ្នកសារព័ត៌មានចេះតែបារម្ភនោះ ព្រោះទឹកដីស្រុកកំពង់លែង មានតំបន់អភិរក្សការពារដោយសហគមន៍ នូវចម្ការដើមធ្នង់ រាប់ពាន់ដើម ដែលកន្លងមក មានឈ្មួញលួចកាប់ដឹកជញ្ជូនជាញឹកញាប់ រហូតមានការចាប់ខ្លួនដាក់ពន្ធនាគារម្នាក់ទៀតផង ខ្លាចក្រែងឈ្មួញមិនកាប់ដឹកជញ្ជូនឈើប្រជាពលរដ្ឋទៅកាប់ឈើ ក្នុងដីសហគមន៍ទៅវិញទេ។ បញ្ហានេះប្រជាពលរដ្ឋ សំណូមពរដល់ លោកព្រះរាជអាជ្ញា មេត្តាដឹកនាំសមត្ថកិច្ចចម្រុះចុះមកពិនិត្យឲ្យបានច្បាស់លាស់ផង៕
ចែករំលែកព័តមាននេះ