បន្ទាយមានជ័យ ៖ មានការភ្ញាក់ផ្អើលមួយនៅមាត់ច្រកទ្វារព្រំដែនអន្តរជាតិកម្ពុជា-ថៃប៉ោយប៉ែតខ្លងលឹក ខណៈគ្រឿងចក្រស្ទូចមួយគ្រឿងចុះផ្លូវចំណោទជាន់ហ្វ្រាំងមិនជាប់បុករថយន្តក្រុងអន្តរជាតិកម្ពុជា-ថៃបាងកកសៀមរាប ពេញពីចំហៀង នាព្រឹកថ្ងៃទី១៩ ខែវិច្ឆិកា ឆ្នាំ២០១៧ ។
ប្រភពពីកន្លែងកើតហេតុប្រាប់ថា ដំបូងគ្រឿងចក្រស្ទូចបើក ពីទិសខាងជើងលុះដល់ចំណុចឡើងផ្លូវចំណោទជាផ្លូវរថភ្លើងជាប់មាត់ច្រកទ្វារអន្តរជាតិប៉ោយប៉ែតចុះចំណោទវិញជាន់ហ្វ្រាំងមិនជាប់ដងស្ទូចគ្រឿងចក្រនេះជ្រុលទៅបុករថយន្តក្រុងខាងលើពេញពីចំហៀង ខណៈកំពុងបើកបរមកពីកើតគ្រោងឆ្លងព្រំដែនទៅទឹកដីថៃ ។
ប្រភពបន្តថា ក្រោយហេតុការណ៍កើតឡើងអ្នកបើកគ្រឿងចក្របានគេចខ្លួនបាត់ ហើយថែមមិនស្គាល់អត្តសញ្ញាណទៀត តែសំណាងហើយដែលអ្នកដំណើរលើរថយន្តចុះទៅបំពេញទិដ្ឋាការអស់ កុំអីព្រលឹងចុងសក់គ្រប់គ្នាជាមិនខាន ។ ករណីគ្រោះថ្នាក់ចរាចរណ៍នេះពុំបង្កឲ្យមានរងគ្រោះនោះទេ ហើយពេលនេះសមត្ថកិច្ចកំពុងធ្វើការវាស់វែង ហើយប្រាប់ថា និងយករថយន្តពាក់ព័ន្ធទាំង២ទៅរក្សាទុកនៅអធិការដ្ឋាននគរបាលក្រុងប៉ោយប៉ែតដើម្បីធ្វើការដោះស្រាយ ៕
https://www.youtube.com/watch?v=IVyD5ADQ2DM
ចែករំលែកព័តមាននេះ