ខេត្តកោះកុង, ស្ទឹងត្រែង, បន្ទាយមានជ័យ ៖ ស្លាក និងបដាដែលមានឡូហ្គោរបស់គណបក្សសង្គ្រោះជាតិ ដែលត្រូវបានរំលាយដោយសាលដីការបស់តុលាការកំពូលកាលពីថ្ងៃទី ១៦ វិច្ឆិកានេះ ត្រូវបានអាជ្ញាធរគ្រប់…
ខេត្តកោះកុង, ស្ទឹងត្រែង, បន្ទាយមានជ័យ ៖ ស្លាក និងបដាដែលមានឡូហ្គោរបស់គណបក្សសង្គ្រោះជាតិ ដែលត្រូវបានរំលាយដោយសាលដីការបស់តុលាការកំពូលកាលពីថ្ងៃទី ១៦ វិច្ឆិកានេះ ត្រូវបានអាជ្ញាធរគ្រប់ ២៥ ខេត្ត-រាជធានី រុះរើ ទម្លាក់ចោលជាបន្តបន្ទាប់ ។
ជាក់ស្តែងនៅព្រឹកថ្ងៃទី ១៨ វិច្ឆិកានេះ អាជ្ញាធរក្រុងស្ទឹងត្រែង និងសមត្ថកិច្ចនគរបាល និងកងរាជអាវុធហត្ថ បានប្រតិបត្តិការរុះរើស្លាកគណបក្សសង្គ្រោះជាតិ តាមបណ្តោយផ្លូវជាតិលេខ៧អា តាមសេចក្តីប្រកាសរបស់ក្រសួងមហាផ្ទៃស្តីពីការលុបឈ្មោះគណបក្សសង្គ្រោះជាតិចេញពីបញ្ជីនយោបាយ លេខ៥៤០៥ ប្រក្រតី និងតាមសាលដីកាតុលាការកំពូល។
លោក សាយ កុសល អភិបាលក្រុងស្ទឹងត្រែង បានមានប្រសាស់ថា៖ «ការរុះរើស្លាកគណបក្សសង្គ្រោះជាតិចោលនេះ ធ្វើឡើងតាមគណៈបញ្ជាការឯកភាពខេត្ត និងសេចក្តីប្រកាសរបស់ក្រសួងមហាផ្ទៃ ហើយការរុះរើចោលនេះត្រូវធ្វើឱ្យអស់នៅគ្រប់ទីកន្លែងក្នុងក្រុងស្ទឹងត្រែង»។
ចំណែកឯស្លាកគណៈបក្សសង្គ្រោះជាតិ ដែលស្ថិតនៅតាមដងផ្លូវនានាក្នុងក្រុងខេមរៈភូមិន្ទ ខេត្តកោះកុង កំពុងត្រូវបានចាប់ផ្តើមរុះរើ និងផ្តួលរំលំអស់ ហើយចាបពី់ព្រឹកថ្ងៃទី១៨ វិច្ឆិកា នេះផងដែរ។ ហើយក្រៅពីក្រុងខេមរៈភូមិន្ទ នៅតាមបណ្តាស្រុកនានាទូទាំងខេត្តក៏កំពុងត្រូវបានរុះរើទំលាក់ស្លាកគណបក្សសង្គ្រោះជាតិនេះចេញពីតាមដងផ្លូវ និងទីសាធារណៈដូចគ្នា ។
នៅឯក្រុងប៉ោយប៉ែត ខេត្តបន្ទាយមានជ័យវិញ អាជ្ញាធរក៏កំពុងតែដុតដៃដុតជើងរុះរើស្លាកគណៈបក្សសង្គ្រោះជាតិនៅក្រុងប៉ោយប៉ែត បាននិងកំពុងផ្តួលរំលំជាបន្តបន្ទាប់ តាំងពីថ្ងៃទី ១៧ និងព្រឹកថ្ងៃទី ១៨ វិច្ឆិកានេះផងដែរ ។ អាជ្ញាធរខេត្តបន្ទាយមានជ័យអះអាងថា កន្លែងខ្លះស្លាកសញ្ញា គឺត្រូវបានក្រុមសង្គ្រោះជាតិបកចេញដោយខ្លួនឯងនៅសល់តែគ្រោងឆ្អឹងដែកតែប៉ុណ្ណោះ៕
ចែករំលែកព័តមាននេះ