ខេត្តពោធិ៍សាត់ ៖ សមាជិកសមាជិការបស់គណបក្សសង្គ្រោះជាតិនៅខេត្តពោធិ៍សាត់ ដែលបានមករួមរស់ជាមួយគណបក្សប្រជាជនកម្ពុជាគិតត្រឹមថ្ងៃទី១៥ ខែវិច្ឆិកា ឆ្នាំ២០១៧ មានចំនូន ៥១នាក់ ដែលក្នុងនោះមានស្រី០៧នាក់ ។
ថ្នាក់ដឹកនាំមូលដ្ឋានរបស់គណបក្សប្រឆាំងចាប់ផ្តើមមករួមរស់នឹងបក្សកាន់អំណាចលើកទីមួយកាលពីដើមខែវិច្ឆិកាមាន១១នាក់ស្រី០១នាក់ និងលើកទីពីរនេះមានចំនួន៤០នាក់ស្រី០៦នាក់ ជាសមាជិកក្រុមប្រឹក្សាខេត្ត ស្រុក ក្រុង ឃុំ សង្កាត់ ជំទប់ ប្រធានប្រតិបត្តិគណះចលនាយុវជន និងស្ត្រី ដែលជាក្បាលម៉ាស៊ីនដឹកនាំរបស់គណបក្ស ។ ពិធីបញ្ចូលសមាជិកថ្មីនៅទីស្នាក់ការគណបក្សប្រជាជនកម្ពុជាបានប្រារព្ធធ្វើនារសៀលថ្ងៃទី១៥ ខែវិច្ឆិកា ឆ្នាំ២០១៧ ក្រោមវត្តមានលោកម៉ៅ ធនិន ប្រធានគណៈកម្មាធិការគណបក្សប្រជាជនកម្ពុជាខេត្តពោធិ៍សាត់ ដោយមានការចូលរួមពីថ្នាក់ដឹកនាំគ្រប់លំដាប់ថ្នាក់ក្នុងខេត្ត ។ សមាជិកសមាជិការដែលចុះចូលមកនោះបានលើកឡើងដូចៗគ្នាថា ពួកគាត់អស់ជំនឿលើបក្សសង្គ្រោះជាតិដែលដឹកនាំដោយលោកកឹម សុខានិងលោកសម រង្សីដែលតែងតែឈ្លោះដណ្ដើមអំណាចគ្នា បក្សពួកនិយម ញុះញង់ឲ្យខ្មែរបង្ហូរឈាមដាក់គ្នាបង្កអសន្តិសុខដល់សង្គម ហើយចុងក្រោយនេះដឹងច្បាស់ពួកគេគឺជា(ជនក្បត់ជាតិ) ។
លោក ម៉ៅ ធនិន បានទទួលស្វាគមន៍ដោយរីករាយចំពោះការចូលមករួមរស់ជីវភាពនយោបាយជាមួយគណបក្សប្រជាជនកម្ពុជារបស់បងប្អូនខាងគណបក្សសង្គ្រោះជាតិ ។ ការមករួមរស់ក្រោមដំបូលបក្សប្រជាជន គឺជាការគិតត្រូវ និងទាន់ពេលវេលាតាមការអំពាវនាវរបស់សម្ដេចតេជោហ៊ុន សែនប្រធានគណបក្សប្រជាជនកម្ពុជា ។ លោក ម៉ៅ ធនិន មានប្រសាសន៍ថា៖ «គណបក្សប្រជាជនកម្ពុជាបើកទ្វារង់ចាំទទួលបងប្អូនគ្រប់ពេលវេលា ប៉ុន្តែមិនបង្ខិតបង្ខំនោះទេ។ចាប់ពីពេលនេះទៅយើងជាសមាជិកសមាជិកាគណបក្សប្រជាជនកម្ពុជាតែមួយ ដូច្នេះយើងត្រូវស្រលាញ់រាប់អានគ្នា រួមគ្នាការពារនិងកសាងប្រទេសជាតិឲ្យរីកចំរើន ។ ជនណាក្បត់ជាតិយើងត្រូវតែកំចាត់ឲ្យអស់ព្រោះយើងត្រូវការសន្តិភាពមិនត្រូវការសង្គ្រាមវិលត្រឡប់មកវិញនោះទេ» ៕
ចែករំលែកព័តមាននេះ