ខេត្តពោធិ៍សាត់ ៖ ទំនិញខូចគុណភាព និងទំនិញហាមឃាត់ជិត៦តោន ដែលមន្ត្រីកាំកុងត្រូលត្រួតពិនិត្យ និងដកហូតបានពីអាជីវករគ្រប់ទីកន្លែងកន្លងមកនេះ បានធ្វើពិធីដុតកម្ទេចចោលនាថ្ងៃទី១៥ ខែវិច្ឆិកា ឆ្នាំ២០១៧ នៅពហុកីឡាដ្ឋានខេត្ត…
ខេត្តពោធិ៍សាត់ ៖ ទំនិញខូចគុណភាព និងទំនិញហាមឃាត់ជិត៦តោន ដែលមន្ត្រីកាំកុងត្រូលត្រួតពិនិត្យ និងដកហូតបានពីអាជីវករគ្រប់ទីកន្លែងកន្លងមកនេះ បានធ្វើពិធីដុតកម្ទេចចោលនាថ្ងៃទី១៥ ខែវិច្ឆិកា ឆ្នាំ២០១៧ នៅពហុកីឡាដ្ឋានខេត្ត ក្រោមវត្តមានលោក សាយ សុជាតិ អភិបាលរង នៃគណៈអភិបាលខេត្តពោធិ៍សាត់ ។
លោក តូច ចៅកុយ ប្រធានសាខាកាំកុងត្រូលខេត្តពោធិ៍សាត់ បានជម្រាបជូនថា សាខាកាំកុងត្រូលខេត្តពោធិ៍សាត់ បានរួមសហការជាមួយមន្ទីរពាណិជ្ជកម្មខេត្ត, រថយន្ដមន្ទីរពិសោធចល័ត និងអាជ្ញាធរដែនដី ចុះត្រួតពិនិត្យទំនិញនៅក្នុងផ្សារ តាមស្ដង់ ដេប៉ូ និងផ្ទះលក់ដូរមួយចំនួននៅទូទាំងខេត្តពោធិ៍សាត់ រកឃើញទំនិញ និងចំណីអាហារមួយចំនួនហួសសុពលភាព និងច្បាប់ហាមឃាត់ ដកហូតយកមករក្សាទុកដើម្បីដុតបំផ្លាញចោល ព្រមទាំងបានណែនាំអំពីការរៀបចំទុកដាក់តាំងលក់ និងរបៀបជ្រើសរើសយកផលិតផលមានគុណភាពសុវត្ថិភាពមកប្រើប្រាស់ទៀតផង ។ ជាក់ស្ដែងផលិតផលម្ហូបអាហារខូចគុណភាព និងទំនិញហាមឃាត់ដែលធ្វើពិធីដុតកម្ទេចចោលនាពេលនេះ មានគ្រប់ប្រភេទទាំងអស់សរុប៥,៧៤៣គក្រ ។
លោក សាយ សុជាតិ អភិបាលរង នៃគណៈអភិបាលខេត្ត បានកោតសរសើរដល់មន្ត្រីកាំកុងត្រូល និងមន្ទីរជំនាញ ដែលបានសហការគ្នាស្វែងរកទំនិញខូចគុណភាពនៅតាមទីផ្សារ និងនៅតាមគេហដ្ឋានលក់ដូរនានា មកធ្វើពិធីដុតកម្ទេចចោលនាពេលនេះ ។ ផលិតផលចំណីអាហារហួសកាលបរិច្ឆេទ និងទំនិញហាមឃាត់វាធ្វើឲ្យប៉ះពាល់ដល់សុខភាពអ្នកទទួលទាន ពិសេសសិស្សានុសិស្សដែលមានអនាគតនៅវែងឆ្ងាយ និងជាទំពាំងស្នងឫស្សី នៃប្រទេសជាតិ ។ ការឃ្លាំពិនិត្យទំនិញនៅតាមទីផ្សារគឺជាកិច្ចការបម្រើឲ្យគោលដៅអនុវត្តច្បាប់ ទប់ស្កាត់ការធ្វើចរាចរផលិតផលខ្វះអនុលោមភាពតាមបទបញ្ញត្ត រឺបទដ្ឋានបច្ចេកទេស ដែលបង្កឲ្យមានគ្រោះថ្នាក់ដល់សុខមាលភាពប្រជាពលរដ្ឋ រួមចំណែកបង្កើនគុណភាព សុវត្ថិភាព ផលិតផលចំណីអាហារ ដែលផលិតក្នុង និងក្រៅស្រុក ។ លោក សាយ សុជាតិ សូមឲ្យសាខាកាំកុងត្រូលខេត្តពោធិ៍សាត់ និងអ្នកពាក់ព័ន្ធត្រូវបន្តយកចិត្តទុកដាក់ខិតខំបំពេញការងារនេះឲ្យកាន់តែមានប្រសិទ្ធិភាព និងអប់រំផ្សព្វផ្សាយពីការចេះពិនិត្យអាយុកាលទំនិញឲ្យបានទូលំទូលាយទូទាំងខេត្តពោធិ៍សាត់ ៕
ចែករំលែកព័តមាននេះ