ខេត្តសៀមរាប ៖ នាថ្ងៃទី១១ខែវិច្ឆិកាឆ្នាំ២០១៧ នៅទីស្នាក់ការសហភាពសហព័ន្ធយុវជនកម្ពុជាខេត្តសៀមរាប មានរៀបចំសន្និសីទកាសែតមួយ ស្តីពីកម្មវិធីប្រណាំងកង់ដើម្បីកុមារ លើកទី១២ ក្នុងគោលបំណងជិះកង់ប្រណាំងជាលក្ខណៈសាមគ្គី មិត្តភាពនៅខេត្តសៀមរាប ដើម្បីរៃអង្គាសប្រមូលថវិកាយកទៅជួយដល់កុមារ និងស្ត្រី តាមរយៈអង្គការ IL NODO ដែលជាអង្គការក្នុងស្រុកធ្វើការផ្ទាល់ ជាមួយកុមារ ដែលរស់នៅក្នុងពន្ធនាគារ ជាមួយម្តាយ និងស្ត្រីដែលរស់នៅក្នុងពន្ធនាគារក្នុងប្រទេសកម្ពុជា។ ការប្រណាំងកង់នោះដែរនឹងប្រព្រឹត្តិទៅនៅថ្ងៃទី០២ ខែធ្នូ ខាងមុខនេះ។ លោកស្រី អាណា ពិផល ប្រធានអង្គរការមនុស្សធម៌ដើម្បីកុមារ និងស្ត្រី ថ្លែងនៅក្នុងសន្និសីទសារព័ត៌មានស្តីពីកម្មវិធីប្រណាំងកង់ដើម្បីកុមារលើកទី១២ ដែលបានធ្វើឡើងនៅទីស្នាក់ការសហភាពសហព័ន្ធយុវជនកម្ពុជាខេត្តសៀមរាប នេះថា កម្មវិធីនេះធ្វើឡើងក្នុងគោលបំណងដើម្បីរៃអង្គាសប្រមូលថវិកាយកទៅជួយដល់កុមារ និងស្ត្រី តាមរយៈអង្គការ IL NODO ដែលជាអង្គការក្នុងស្រុកធ្វើការផ្ទាល់ជាមួយកុមារដែលរស់នៅក្នុងពន្ធនាគារជាមួយម្តាយនឹងស្ត្រី ដែលរស់នៅក្នុងពន្ធនាគារក្នុងប្រទេសកម្ពុជា។
លោកស្រីបានបញ្ជាក់ទៀតថា តាមរយៈព្រឹត្តិការណ៍ប្រណាំងកង់នេះ នឹងប្រមូលថវិកាទិញកង់ហើយធ្វើការបែងចែកជូននូវកង់ផ្តល់ទៅដល់សិស្សានុសិស្សក្រីក្រ ដែលខ្វះនូវមធ្យោបាយធ្វើដំណើរទៅសិក្សា ដែលនេះជាផ្នែកមួយជួយលើកកម្ពស់ និងជំរុញការសិក្សារបស់កុមារក្រីក្រ មានឱកាសសិក្សាដូចកុមារទូទៅ ដើម្បីចូលរួមជាមួយគោលនយោបាយកាត់បន្ថយភាពក្រីក្រជូនប្រជាពលរដ្ឋរបស់រាជរដ្ឋាភិបាលកម្ពុជា ខណៈដែលកាលពីឆ្នាំ២០១៦ បានឧបត្ថម្ភកង់ចំនួន៥០គ្រឿងដល់សិស្សក្រីក្រនៅសាលាបឋមសិក្សាលាងដៃ ក្នុងខេត្តសៀមរាប និងកង់៥០ទៀត ជូនទៅសិស្សក្រីក្រនៅសាលាបឋមសិក្សាព្រៃអារ ក្នុងខេត្តតាកែវ។ ក្នុងសន្និសីទកាសែតនាពេលនោះដែរ លោក ប្រាក់ សោភ័ណ ប្រធានស្តីទីសហភាពសហព័ន្ធយុវជនកម្ពុជាខេត្តសៀមរាប បានបញ្ជាក់ថា ឆ្នាំនេះជាឆ្នាំដំបូង ហើយក៏ជាលើកទី១ដែរ ដែលសហភាពសហព័ន្ធយុវជនកម្ពុជាខេត្តសៀមរាប បានចូលរួមសហការណ៍ជាមួយអង្គរការមនុស្សធម៌ដើម្បីកុមារ និងស្ត្រី ព្រំទាំងអាជ្ញាធរអប្សរា ក្រុមហ៊ុន Khmer Beverage និងអង្គភាពពាក់ព័ន្ធនានា ដើម្បីរៀបចំព្រឹត្តិការណ៍ប្រណាំងដើម្បីកុមារ ដើម្បីចូលរួមចំណែកលើកស្ទួយវិស័យកីឡាកម្ពុជា និងប្រមូលថវិកាដែលនៅសល់ពីការចំណាយក្នុងកម្មវិធីទៅជួយកុមារ និងស្ត្រី ដែលរស់នៅក្នុងពន្ធធនាគារ និងចែកកង់ជូនប្អូនៗសិស្សានុសិស្សដែលមានបំណងចង់បន្តការសិក្សា តែខ្វះខាតមធ្យោបាយ ដែលនេះជាផ្នែកមួយក្នុងការជួយលើកកម្ពស់ និងជំរុញការសិក្សារបស់កុមារដែលមានជីវភាពខ្វះខាត មានឱកាសសិក្សាដូចកុមារទូទៅ។
ឆ្លៀតក្នុងឱកាសនោះដែរលោក សុខ សង្វារ អគ្គនាយករងអាជ្ញាធរជាតិអប្សរា បានមានប្រសាសន៍ថា ថ្វីត្បិតទើបតែជាលើកដំបូងដែលអង្គការមនុស្សធម៌ដើម្បីកុមារ និងស្ត្រីស្វែងរកកិច្ចសហការ ហើយព្រឹត្តិការណ៍នេះមិនគ្រាន់តែលើកស្ទួយវិស័យកីឡាប៉ុណ្ណោះទេ ជាព្រឹត្តិការណ៍មួយជួយជំរុញ និងលើកស្ទួយវិស័យមនុស្សធម៌ ដើម្បីជួយដល់កុមារក្រីក្រ និងជាផលិតផលថ្មីៗសម្រាប់ទាក់ទាញអ្នកទេសចរណ៍ជាតិ និងអន្តរជាតិឱ្យមកទស្សនាខេត្តសៀមរាបកាន់តែច្រើនជាបន្តបន្ទាប់ ។ លោក សុខ សង្វារ បានបញ្ជាក់ទៀតថា អាជ្ញាធរជាតិអប្សរា សូមគាំទ្រ និងត្រៀមសហការណ៍ដោយចាត់មន្ត្រីនៅតាមទីតាំងគោលដៅចាំបាច់ ដើម្បីជួយការពាររក្សាសណ្តាប់ធ្នាប់សាធារណៈ រៀបចំសម្អាតបរិស្ថានតាមផ្លូវដែលបានកំណត់ ធ្វើយ៉ាងណាឲ្យដំណើរការនៃព្រឹត្តិការណ៍ប្រព្រឹត្តិទៅដោយរហូត និងជោគជ័យ ហើយតាមរយៈនៃកម្មវិធីនេះ សូមអំពាវនាវដល់សប្បុរសជនជាតិ និងអន្តរជាតិ អញ្ជើញចូលរួមក្នុងព្រឹត្តិការណ៍ប្រណាំងកង់ដើម្បីកុមារលើកទី១២ នេះ ឲ្យបានច្រើនកុះករ។ សូមបញ្ជាក់ផងដែរថា កម្មវិធីប្រណាំងកង់ដើម្បីកុមារលើកទី១២នេះ នឹងប្រព្រឹត្តិទៅនៅថ្ងៃទី០២ ខែធ្នូ ឆ្នាំ២០១៧ ខាងមុខនេះ ដែលរៀបចំនៅទីលានជល់ដំរីក្នុងតំបន់អង្គរ ចម្ងាយវែងប្រវែង១១៧គីឡូម៉ែត្រ និងចម្ងាយខ្លីប្រវែង១៧គីឡូម៉ែត្រ និងមានរង្វាន់សម្រាប់អ្នកទទួលបានចំណាត់ថ្នាក់ក្នុងកម្រិតចម្ងាយវែងផងដែរ៕
ចែករំលែកព័តមាននេះ