កម្មកររោងចក្រកាត់ដេរមួយកន្លែង ផ្ទុះការតវ៉ាទាមទារ១៨ចំណុច
- ភ្នំពេញ
លីងវីដេអូ ៖ https://youtu.be/cIeWqWo8OV4 រាជធានីភ្នំពេញ ៖ កម្មករ កម្មការិនីរោងចក្រកាត់ដេរយីហោ《H-EVERGREEN CAMBODIA KNITTING CO.,LTD》…
លីងវីដេអូ ៖ https://youtu.be/cIeWqWo8OV4 រាជធានីភ្នំពេញ ៖ កម្មករ កម្មការិនីរោងចក្រកាត់ដេរយីហោ《H-EVERGREEN CAMBODIA KNITTING CO.,LTD》…
លីងវីដេអូ ៖ https://youtu.be/cIeWqWo8OV4
រាជធានីភ្នំពេញ ៖ កម្មករ កម្មការិនីរោងចក្រកាត់ដេរយីហោ《H-EVERGREEN CAMBODIA KNITTING CO.,LTD》 ចំនួនជាង ៣០០នាក់បានផ្ទុះការតវ៉ាអត់ចូលធ្វើការ ដោយអ្នកខ្លះនៅផ្ទះ និងមួយចំនួនទៀតបានប្រមូលផ្ដុំគ្នាធ្វើការតវ៉ានៅចំណុចមុខរោងចក្រ ដើម្បីទាមទារឲ្យថៅកែដោះស្រាយនូវលក្ខខណ្ឌការងារចំនួន១៨ចំណុចជូនពួកគេ ហើយក្នុងការធ្វើកូដកម្មនោះនៅមិនទាន់មានដំណោះស្រាយណាមួយនៅឡើយទេ។ ហេតុការណ៍នោះបានកើតឡើងកាលពីវេលាម៉ោង៨ព្រឹក ថ្ងៃទី១៣ ខែវិច្ឆិកា ឆ្នាំ២០១៧នេះ នៅរោងចក្រកាត់ដេរ《H-EVERGREEN CAMBODIA KNITTING CO.,LTD》ដែលមានទីតាំងស្ថិតនៅក្នុងភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ កម្មករបានឲ្យដឹងថា រោងចក្រកាត់ដេរមួយនេះមានកម្មករ កម្មការិនីបម្រើការងារចំនួនជាង៣០០នាក់ ហើយភាគច្រើនគឺជាកម្មការិនី ដែលម្នាក់ៗបានធ្វើការនៅទីនោះច្រើនឆ្នាំមកហើយ ប៉ុន្តែគ្មានសិទ្ធិសេរីភាពនោះទេ ពួកគេបានទទួលរងនូវការគាបសង្កត់គ្រប់បែបយ៉ាងពីសំណាក់ថៅកែរោងចក្រ ដែលបានបង្ខំឲ្យធ្វើការថែមម៉ោងដោយគ្មានគោលការស្ម័គ្រចិត្តឡើយ។
មិនតែប៉ុណ្ណោះបង្ខំឲ្យកម្មករធ្វើការនៅរៀងរាល់ថ្ងៃបុណ្យជាតិផ្សេងៗ មិនដែលឲ្យឈប់សម្រាកដូចជានៅរោងចក្រកាត់ដេរផ្សេងៗទៀតនោះទេ ហើយរៀងរាល់ថ្ងៃអាទិត្យក៏មិនដែលបានឈប់សម្រាកដែរ ជាងនេះទៀតបានបង្ខំឲ្យកម្មករធ្វើការថែមម៉ោងចាប់ពីម៉ោង៧ព្រឹក រហូតដល់ម៉ោង៩យប់ទៀតផង បើនរណាហ៊ានតវ៉ានឹងត្រូវបញ្ឈប់ពីការងារតែម្ដង។ ប្រភពដដែលបានបន្តទៀតថា ក្រៅពីនេះរោងចក្រមួយនេះគ្មានកន្លែងសម្រាប់កម្មករហូបបាយ ឬកន្លែងទុកម៉ូតូឲ្យបានត្រឹមត្រូវ នោះទេ គ្មានក្រុមគ្រូពេទ្យ ប្រចាំការសម្រាប់ព្យាបាលពេលដែលកម្មករមានគ្រោះថ្នាក់ ឬមានជំងឺជាយថាហេតុដែលត្រូវសង្គ្រោះបឋម និងគ្មានការទទួលខុសត្រូវក្នុងពេលដែលកម្មករ ជួបគ្រោះថ្នាក់ការងារឡើយ មិនតែប៉ុណ្ណោះបន្ទប់ទឹកកខ្វក់គ្មានអនាម័យទេ។ ម្យ៉ាងទៀតមិនដែលគិតលុយឲ្យកម្មករដែលធ្វើការនៅថ្ងៃបុណ្យនិងថ្ងៃអាទិត្យនោះឡើយ ដោយសារតែគ្មានការគិតគូ និងកេងប្រវ័ញ្ចនូវកម្លាំងពលកម្មរបស់កម្មករគ្រប់បែបយ៉ាងបែបនេះហើយ ទើបពួកគេបានសម្រេចចិត្តប្រមូលផ្ដុំគ្នាធ្វើការតវ៉ា ដើម្បីទាមទារឲ្យថៅកែដោះស្រាយនូវលក្ខខណ្ឌការងារជូនពួកគេទាំងអស់គ្នា ហើយបើគ្មានការដោះស្រាយទេពួកគេនឹងមិនព្រមបញ្ឈប់កូដកម្មនេះ ឡើយ។
កម្មករបានបន្តទៀតថា លក្ខខណ្ឌការងារទាំង១៨ចំណុចនោះរួមមាន១, សុំឲ្យក្រុមហ៊ុនរៀបចំរោងបាយ និងរោងដាក់កង់ម៉ូតូឲ្យបានត្រឹមត្រូវ ២,សុំឲ្យក្រុមហ៊ុនរៀបចំទឹកស្អាតសម្រាប់កម្មករហូប ៣,ក្រុមហ៊ុនមិនត្រូវបង្ខំឲ្យកម្មករធ្វើការថែមម៉ោងនោះទេ ការថែមម៉ោងគឺតាមគោលការស្ម័គ្រចិត្ត ៤,ក្រុមហ៊ុនត្រូវរៀបចំបន្ទប់ទឹកឲ្យបានស្អាត ៥,ក្រុមហ៊ុនត្រូវផ្ដល់ច្បាប់ឈប់សម្រាកជូនកម្មករពេល មានធុរៈ ៦,ក្រុមហ៊ុនត្រូវរៀបចំឲ្យមានពេទ្យប្រចាំការនៅក្នុងរោងចក្រ ៧,ក្រុមហ៊ុនត្រូវទទួលខុសត្រូវពេលកម្មករជួបគ្រោះថ្នាក់ក្នុងម៉ោងការងារ ៨,ពេលកម្មករឈប់សម្រាកសុំឲ្យក្រុមហ៊ុនកាត់ប្រាក់ព្រីមតាមសមមាត្រ ៩,នៅពេលបើកប្រាក់ខែស្នើសុំឲ្យក្រុមហ៊ុន បើកកុំឲ្យលើសពីម៉ោង៤ល្ងាច ១០,សុំឲ្យក្រុមហ៊ុនគិតលុយជូនកម្មករដែលធ្វើការនៅថ្ងៃបុណ្យ និងថ្ងៃអាទិត្យក្នុងខែតុលាកន្លងមក ១១,ក្រុមហ៊ុនមិនត្រូវកាត់លុយក្នុងថ្ងៃដែលកម្មករឈប់សម្រាកចាប់ពីថ្ងៃទី១ ដល់ថ្ងៃទី១០ វិច្ឆិកាកន្លងមកនេះ ១២,សុំកុំឲ្យក្រុមហ៊ុន រើសអើងពេលកម្មករឈប់មានច្បាប់ និងមានសំបុត្រពេទ្យ ១៣,សុំឲ្យក្រុមហ៊ុនបញ្ជាក់ឲ្យបានច្បាស់ពីកិច្ចសន្យារបស់កម្មករកម្មការិនី ១៤,សូមឲ្យក្រុមហ៊ុនណែនាំប្រាប់នៅពេលកម្មករគិតខុស និងធ្វើការខុស ១៥,សុំឲ្យក្រុមហ៊ុនអនុញ្ញាតឲ្យស្ត្រីមានផ្ទៃពោះ ចេញមុនម៉ោង១៥នាទី និងបានឈប់សម្រាកក្នុងខែបាន១ថ្ងៃ ១៦, សុំឲ្យក្រុមហ៊ុនណែនាំប្រធានក្រុម និងប្រធានក្រុម ឲ្យប្រើពាក្យសម្ដីជាមួយកម្មករឲ្យបានសមរម្យ ១៧, ក្រុមហ៊ុនមិនត្រូវគុំគួនជាមួយកម្មករនោះទេ និង១៨,ក្រុមហ៊ុនត្រូវរក្សាប្រាក់អត្ថប្រយោជន៍ ជូនកម្មករក្នុងពេលកំពុងធ្វើកូដកម្ម៕
ចែករំលែកព័តមាននេះ