រាជធានីភ្នំពេញ ៖ ការបើកអាជីវកម្មបម្រើសេវាលាងរថយន្ដនៅភ្នំពេញសព្វថ្ងៃ កំពុងរីកដូចផ្សិត ព្រោះជាសេវាកម្មដែលមានតម្រូវការចាំបាច់មួយនៅក្នុងវិស័យយានយន្ដ ។
ការបើកកន្លែងលាងរថយន្ដនេះ ថ្វីបើត្រូវចំណាយទុនច្រើនបន្ដិច ប៉ុន្ដែជាមុខរបរមួយដែលងាយរកប្រាក់ចំណូលប្រចាំថ្ងៃ ថែមទាំងចំណេញច្រើនទៀត ព្រោះមិនសូវចំណាយច្រើនដូចអាជីវកម្មដទៃ ។
បើតាមម្ចាស់ទីតាំងលាងរថយន្ដមួយកន្លែងដែលស្ថិតនៅតាមផ្លូវលេខ២៧១ ក្បែរមន្ទីរពេទ្យមិត្តភាពខ្មែរ-សូវៀត បានឲ្យដឹងថា របរមួយនេះ ពិតជាត្រូវចំណាយដើមទុនច្រើននៅគ្រាដំបូង ដោយត្រូវរៀបចំកន្លែង ទិញសម្ភារផ្សេងៗ រៀបចំបុគ្គលិក និងកន្លែងស្នាក់នៅរបស់ពួកគេ ហើយប្រសិនបើទីតាំងត្រូវជួលគេវិញ កាន់តែធ្ងន់ធ្ងរទៀត ប៉ុន្ដែក្រោយពីដំណើរការហើយ របរនេះពិតជាងាយស្រួលទទួលបានចំណូល និងមិនសូវប្រឈមនឹងការខាតបង់ ។
លោក សៀម សូរិយា ម្ចាស់អាជីវកម្មនេះបាននិយាយថា ៖« ខ្ញុំបើកមុខរបរហ្នឹង គិតមកពេលនេះ គឺបានដំណើរការអស់រយៈពេល១៣ឆ្នាំហើយ ។ ចំពោះការចំណាយវិញ គ្រាន់តែធ្វើដំបូលស័ង្កសីអស់ជាង១ម៉ឺនដុល្លារ ហើយនៅរៀបចំកន្លែង និងទិញសម្ភារជាច្រើនទៀត គិតទៅច្រើនគួរសមដែរ » ។ យ៉ាងណាក៏ដោយ លោកថា ៖« បន្ទាប់ពីដំណើរការហើយឃើញថា កាក់កបគ្រាន់បើ និងមិនសូវចំណាយច្រើនទៀតឡើយ » ។
លោកសូរិយា បញ្ជាក់ថា ៖« បច្ចុប្បន្ននេះ ខ្ញុំបាត់ម៉ូយច្រើន បើធៀបនឹងឆ្នាំមុនៗ ពិសេសតាំងពីមានរបាំងពុះចែកទ្រូងផ្លូវមក ព្រោះភ្ញៀវពិបាកចេញចូល តែយ៉ាងណា ក៏នៅមានភ្ញៀវដែលពេញចិត្តនឹងសេវាកម្មយើងនៅតែបន្ដមកជាហូរហែ » ។ លោកថា ៖ « កាលពីមុន ខ្ញុំមិនដែលរាប់ក្បាលរថយន្ដទេ ដោយក្នុងមួយថ្ងៃ គិតជាមធ្យម ខ្ញុំអាចរកចំណូលបានជាង២០០ដុល្លារ តែឥឡូវនេះ ច្រើនបំផុត១០០ដុល្លារប៉ុណ្ណោះ »។
លោកបញ្ជាក់ថា ចំពោះថ្លៃលាងរថយន្ដវិញ គឺរថយន្ដឡង់គ្រីស័រ និងឡិចស៊ីស៤៧០ឡើង តម្លៃ២ម៉ឺនរៀល, ហាយឡែនឌ័រ និងឡិចស៊ីស RX៣០០ តម្លៃ១៥.០០០រៀល, កាមរីឆ្លាម បាឡែន កូរ៉ូឡា តម្លៃ១៣.០០០រៀល និងប្រភេទរថយន្ដតូចៗ តម្លៃ១ម៉ឺនរៀល ។ ចំណែកមេការកម្មករដែលធ្វើការនៅទីតាំងនេះបាននិយាយថា លោកបានមកបម្រើការរយៈពេល១២ឆ្នាំហើយ តាំងពីថៅកែឲ្យប្រាក់ខែ៣ម៉ឺនរៀលម្ល៉េះ គឺក្រោយ១ឆ្នាំបន្ទាប់ពីកន្លែងនេះបើកដំណើរការ ។
លោកបន្ដថា កាលពីមុន មានកម្មករលាង និងជូតសម្អាតទាំងអស់ចំនួន១៧នាក់ ព្រោះក្នុង១ថ្ងៃ រថយន្ដភ្ញៀវចូលជាមធ្យម១០០គ្រឿង ប៉ុន្ដែសព្វថ្ងៃនេះ ធ្លាក់ចុះសល់ប្រហែល៣០ទៅ៤០គ្រឿងប៉ុណ្ណោះ ដូច្នេះ ថៅកែក៏កាត់បន្ថយបុគ្គលិកដែរ ដែលរហូតមកដល់ពេលនេះនៅសល់ត្រឹម១០នាក់ ។
មេការរូបនេះបញ្ជាក់ថា ៖« ធ្វើការនៅទីនេះ ថៅកែឲ្យបន្ទប់ស្នាក់នៅ និងហូបចុក ។ ចំណែកប្រាក់កម្រៃគឺគិតជាខែ ដោយចូលធ្វើការដំបូង គាត់ [ថៅកែ] ឲ្យចាប់ពីជាង១០០ដុល្លារឡើងក្នុង១ខែ និងទៅតាមសមត្ថភាព » ។
លោកបន្ដថា ថ្វីដ្បិតតែប្រាក់ខែមិនច្រើន តែបើបូករួមទាំងថ្លៃស្នាក់នៅ និងការហូបចុកទៀត លោកគិតថា វាសមរម្យដែរ ព្រោះមិនចាំបាច់ចំណាយទៅលើបញ្ហានេះ ។ ទោះបីយ៉ាងណា ធ្វើការនៅកន្លែងនេះមានបញ្ហាមួយ គឺទឹកស៊ីដៃជើង ដូច្នេះ ត្រូវចេះថែរក្សា និងមានអនាម័យឲ្យបានល្អ ។
លោកបង្ហើបថា ៖« មុខរបរនេះពិតជាងាយរកលុយ ហើយថ្ងៃក្រោយទៅ បើទោះបីជាមានអ្នកបើកច្រើន តែបើយើងប្រើសេវាកម្មល្អ បុគ្គលិកយើងត្រឹមត្រូវនោះ ភ្ញៀវពេញចិត្ត។ ណាមួយ កំណើនរថយន្ដកើនឡើងជាបន្ដបន្ទាប់ ដូច្នេះ គ្មាននរណាជិះទាំងរថយន្ដប្រឡាក់នោះទេ » ។
លោក ជា ប៊ុនធឿន ប្រធានអង្គភាពចុះបញ្ជីទោចក្រយាននៃមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា សម្រាប់រាជធានីភ្នំពេញ គិតចាប់ពីឆ្នាំ២០០០ ដល់ខែមេសា ឆ្នាំ២០១៧ អង្គភាពបានទទួលចុះបញ្ជីមធ្យោបាយយានជំនិះមាន ម៉ូតូ ម៉ូតូកង់បី និងម៉ូតូសណ្តោងរ៉ឺម៉ក មានចំនួន១លាន៣សែនគ្រឿង ហើយសម្រាប់មួយឆ្នាំ២០១៦កន្លងមកនេះ មានចំនួន១៥ម៉ឺន៨ពាន់៧១០គ្រឿង ។
យោងតាមរបាយការណ៍អគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូន បានឲ្យដឹងថា គិតពីឆ្នាំ១៩៩០ ដល់ខែមេសាឆ្នាំនេះ រថយន្តដែលបានចុះបញ្ជីនៅទូទាំងប្រទេស មានចំនួន៩១៥.៩៧៨គ្រឿង ក្នុងនោះរថយន្តធម្មតាមានចំនួន៥៦៦.១៥៧គ្រឿង និងរថយន្តធ្វើអាជីវកម្មមានចំនួន៣៤៩.៨២១គ្រឿង ។ ចំណែកម៉ូតូមានចំនួន៣.២៩៥.៥៤៧គ្រឿង ហើយបើសរុបទាំងរថយន្ត និងម៉ូតូមានចំនួន៤.២១១.៥២៥គ្រឿង ៕
ចែករំលែកព័តមាននេះ