រាជធានីភ្នំពេញ ៖ សម័យបច្ចេកវិទ្យាជឿនលឿន បានធ្វើឲ្យមានការផ្លាស់ប្ដូរជីវិតរស់នៅប្រចាំថ្ងៃរបស់ប្រជាពលរដ្ឋ ពិសេសការប្រើប្រាស់ស្មាតហ្វូនបច្ចុប្បន្ននេះ មិនថាយុវវ័យទេ សូម្បីតែមនុស្សចាស់ក៏មាននិន្នាការប្រើស្មាតហ្វូនកើនឡើងច្រើនដែរ ។ មិនត្រឹមតែប៉ុណ្ណោះ អ្នកខ្លះមានរហូតដល់២គ្រឿងឯណោះ ។ ហេតុអ្វីបានជាពួកគាត់សម្រេចងាកមកប្រើស្មាតហ្វូន ?
លោក ធន់ ស៊ង័ រស់នៅភូមិត្រពាំងវែង ឃុំត្រពាំងរាំង ស្រុកជុំគិរី ខេត្តកំពត បានឲ្យដឹងកាលពីព្រឹកថ្ងៃទី៨ វិច្ឆិកា ថា សព្វថ្ងៃ លោកមានអាយុ៥០ឆ្នាំប្លាយហើយ ។ មុនដំបូងឡើយ លោកមិនដែលស្គាល់ប្រភេទស្មាតហ្វូនអីនោះទេ ប៉ុន្តែដោយសារចង់ដឹង និងចង់ឮពីហេតុការណ៍នានានៅក្នុងសង្គមសព្វថ្ងៃ លោកក៏ទិញមកប្រើដែរទៅ ។
លោកថា ៖« ចាប់តាំងពីខ្ញុំប្រើទូរស័ព្ទចុចលើកញ្ចក់ហ្នឹងមក (Touch Screen) មិនដែលប្រពន្ធ ឬកូនចៅថា ខ្ញុំចាស់ហើយនៅធ្វើខ្លួនស្ទាវនោះទេ ផ្ទុយទៅវិញ ពួកគេបង្រៀនខ្ញុំឲ្យចេះប្រើទៅវិញ » ។
លោកបន្តថា ៖« បើប្រៀបធៀបកាលដែលខ្ញុំមិនទាន់មានស្មាតហ្វូនប្រើ ហើយមកដល់ឥឡូវ គឺខុសគ្នាឆ្ងាយណាស់ ។ ឥឡូវ ខ្ញុំអាចដឹងពីព័ត៌មានផ្សេងៗដែលកើតឡើងនៅក្នុងសង្គមពីមួយថ្ងៃទៅមួយថ្ងៃថា វាយ៉ាងម៉េច ណាមួយយើងនៅក្នុងដំណាក់កាលវ័យចាស់ចឹង ត្រូវយល់ដឹងរឿងធម៌អាថ៌ឲ្យបានច្រើន ។ អីចឹង ស្មាតហ្វូនអាចជួយខ្ញុំបាន ព្រោះខ្ញុំជាអាចារ្យវត្តមួយរូបដែរ » ។
លោក ព្រាប វិបុល បុរសវ័យចំណាស់ម្នាក់ដែរនោះ បានឲ្យដឹងថា ការប្រើប្រាស់ស្មាតហ្វូនសម្រាប់លោកមិនចេះអ្វីច្រើនទេ ក្រៅពីទុកទាក់ទងការងារ និងកូនចៅ គឺឆ្លៀតលេងហ្វេសប៊ុកតិចតួច និងមើលព័ត៌មានខ្លះៗ ។
លោកថា ៖« ឃើញក្មេងៗប្រើលេងនេះលេងនោះចឹងទៅ ក៏ប្រើនឹងគេដែរ ក្រែងបានដឹងព័ត៌មានខ្លះៗដែលកើតឡើងនៅក្នុងសង្គម កុំឲ្យគេថា ចាស់ចាញ់ក្មេងៗ » ។ លោកបានបន្តថា ក្រៅពីមើលព័ត៌មាន និងរូបភាពប្លែកៗនៅក្នុងស្មាតហ្វូនហើយ គឺវាអាចផ្ដល់អត្ថប្រយោជន៍ច្រើនទៀតនៅពេលភ្ជាប់អុីនធើរណេត ដោយអាចមើលមុខកូនៗដែលនៅឆ្ងាយពីគ្នា តាមបណ្ដាញសង្គមហ្វេសប៊ុកទៀតផង។ លោកថា ៖« សម័យនេះ ភ្នែកទិព្វ ត្រចៀកទិព្វ ពេលខ្ញុំនឹកកូន ខ្ញុំអាចនិយាយបាន ហើយពេលណាចង់មើលមុខកូនខ្ញុំ គឺខ្ញុំអាចមើលបាន គ្រាន់តែមានស្មាតហ្វូននៅក្នុងដៃ បានឃើញបាត់ ទោះបីនៅឆ្ងាយយ៉ាងណាក៏ដោយ » ។
ស្ត្រីវ័យចំណាស់ម្នាក់រស់នៅរាជធានីភ្នំពេញ បាននិយាយថា អ្នកស្រីមិនចេះភាសាអង់គ្លេសទេ។ ការសម្រេចទិញស្មាតហ្វូនប្រើ ព្រោះមិត្តភក្ដិណាក៏គេមានដែរ ។ អ្នកស្រីថា ៖ «ចំពោះការប្រើវិញ គឺក្រៅពីសម្រាប់ទំនាក់ទំនងហើយ ខ្ញុំអាចទិញអីវ៉ាន់តាមអនឡាញ ឆែកព័ត៌មានផ្សេងៗ លេងហ្គេមកម្សាន្ដ ស្ដាប់តន្ត្រី និងមើលវីដេអូជាដើម » ។
គួរបញ្ជាក់ថា បច្ចុប្បន្ននេះ ប្រទេសកម្ពុជាមានអ្នកប្រើប្រាស់ប្រព័ន្ធអ៊ីនធើរណេតជិត៧លាននាក់ កើនឡើង១,៣លាននាក់កាលពីឆ្នាំមុន និងគណនីទូរស័ព្ទចល័តចំនួន២០លានគណនី ក្នុងចំណោមប្រជាពលរដ្ឋសរុបតែ១៥,៧៦លាននាក់ប៉ុណ្ណោះ ។ ផ្អែកតាមការសិក្សាស្រាវជ្រាវនៅឆ្នាំ២០១៦ ដែលបានចេញផ្សាយដោយវិទ្យាស្ថាន The Open Institute បានឲ្យដឹងថា ជាង៣៧%នៃប្រជាពលរដ្ឋកម្ពុជាដែលមានអាយុពី១៥ ទៅ៦៥ឆ្នាំ អះអាងថា បានប្រើប្រាស់អ៊ីនធើរណេត និង៩៦%នៃប្រជាពលរដ្ឋកម្ពុជា អះអាងថា ពួកគេមានទូរស័ព្ទផ្ទាល់ខ្លួន ៕
ចែករំលែកព័តមាននេះ