សហរដ្ឋអាមេរិក-ប្រទេសកូរ៉េខាងជើង ៖ ពេលបំពេញទស្សនកិច្ចជាផ្លូវការនៅកូរ៉េខាងត្បូងប្រធានាធិបតីអាមេរិក លោកដូណាល់ ត្រាំ ព្រមានក្រុងព្យុងយ៉ាងថា ពេលវេលាប្រើកម្លាំងមកដល់ហើយ ។ នាថ្ងៃទី៨ វិច្ឆិកា…
សហរដ្ឋអាមេរិក-ប្រទេសកូរ៉េខាងជើង ៖ ពេលបំពេញទស្សនកិច្ចជាផ្លូវការនៅកូរ៉េខាងត្បូងប្រធានាធិបតីអាមេរិក លោកដូណាល់ ត្រាំ ព្រមានក្រុងព្យុងយ៉ាងថា ពេលវេលាប្រើកម្លាំងមកដល់ហើយ ។
នាថ្ងៃទី៨ វិច្ឆិកា លោកត្រាំ បានផ្ញើសារព្រមានមួយដល់ «ជនផ្តាច់ការសាហាវក្រុងព្យុងយ៉ាង» ដោយនិយាយថា ដាច់ខាតកុំមើលស្រាលការប្តេជ្ញាចិត្តរបស់សហរដ្ឋអាមរិក និងសម្ព័ន្ធមិត្តឱ្យសោះ ។
នៅឯសភាជាតិកូរ៉េខាងត្បូង លោកត្រាំ អះអាងថា គ្រប់ប្រជាជាតិដែលមានការទទួលខុសត្រូវ ត្រូវតែរួបរួមកម្លាំងគ្នា ដើម្បីធ្វើឱ្យរបបសាហាវកូរ៉េខាងជើងនៅឯកោ ។ លោកអ្នកពុំអាចគាំទ្ររបបនេះ និងពុំអាចជួយផ្គត់ផ្គង់ ហើយកុំទទួលយកបណ្តាការប្រព្រឹត្តរបស់ក្រុងព្យុងយ៉ាង ។ លោកបានលើកឈ្មោះប្រទេសចិន និងរុស្ស៊ីជាសម្ព័ន្ធមិត្តប្រពៃណីរបស់កូរ៉េខាងជើង ។
នៅមុខបណ្តាសមាជិកសភាកូរ៉េខាងត្បូង លោកត្រាំ បន្តថា «ចូរកុំមើលស្រាលយើង ហើយកុំធ្វើឱ្យយើងជួបបញ្ហា ។ យើងនឹងការពារសន្តិសុខរួមរបស់យើង ភាពរុងរឿងរួមរបស់យើង និងសេរីភាពដ៏ពិសិដ្ឋរបស់យើង» ។
ក្នុងសុន្ទរកថាមួយដោយពាក្យពេចន៍ខ្លាំងៗ ផ្ទុយនឹងវោហាសាស្ត្រដែលមានការថ្លឹងថ្លែងរបស់លោកនាពេលមុននេះ លោកត្រាំ និយាយថា បណ្តាអាវុធដែលអ្នកឯងមាននឹងពុំអាចពង្រឹងសន្តិសុខរបស់អ្នកឯងបានទេ ។
លោកត្រាំ អះអាងកាលពីថ្ងៃទី៧ វិច្ឆិកា ថា មានការរីកចម្រើនច្រើនលើកសំណុំរឿងនុយក្លេអ៊ែរកូរ៉េខាងជើង តែពុំផ្តល់ការបញ្ជាក់ឡើយ ។ ទោះបីយ៉ាងណា លោកក៏អះអាងដែរថា សមភាគីចិនលោកស៊ី ជីនពីង ដែលលោកត្រូវជួបនាថ្ងៃទី៨ វិច្ឆិកា ប្រាកដជាមានប្រយោជន៍ខ្លាំងបំផុត ។
សុន្ទរកថានេះរបស់លោកត្រាំ ធ្វើឡើងប៉ុន្មានម៉ោង ក្រោយការប្តូរចិត្តរបស់លោកត្រាំ ទៅបំពេញទស្សនកិច្ចគួរឱ្យភ្ញាក់ផ្អើលនៅតំបន់ហាមមិនឱ្យមានកងទ័ព DMZ ដែលបែងចែកព្រំដែនរវាងកូរ៉េទាំង២ ៕
ចែករំលែកព័តមាននេះ