ខេត្តឧត្តរមានជ័យ ៖ បុរសម្នាក់រងរបួសធ្ងន់ ខណៈកំពុងតែអង្គុយបណ្តែតអារម្មណ៍ម្នាក់ឯងនៅនឹងសួនច្បារដែលស្ថិតនៅទល់មុខកាស៊ីណូរីសតអូរស្មាច់ ស្រាប់តែមានមនុស្សលបកាប់ពីក្រោយ កាលពីវេលាម៉ោង០៩យប់ ថ្ងៃទី០៦ ខែវិច្ឆកា ឆ្នាំ២០១៧ ហេតុការណ៍នេះកើតឡើងនៅក្នុងភូមិអូរស្មាច់…
ខេត្តឧត្តរមានជ័យ ៖ បុរសម្នាក់រងរបួសធ្ងន់ ខណៈកំពុងតែអង្គុយបណ្តែតអារម្មណ៍ម្នាក់ឯងនៅនឹងសួនច្បារដែលស្ថិតនៅទល់មុខកាស៊ីណូរីសតអូរស្មាច់ ស្រាប់តែមានមនុស្សលបកាប់ពីក្រោយ កាលពីវេលាម៉ោង០៩យប់ ថ្ងៃទី០៦ ខែវិច្ឆកា ឆ្នាំ២០១៧ ហេតុការណ៍នេះកើតឡើងនៅក្នុងភូមិអូរស្មាច់ សង្កាត់អូរស្មាច់ ក្រុងសំរោង ។ ជនរងគ្រោះឈ្មោះ ណូយ រ៉ា ភេទប្រុស អាយុ២៣ឆ្នាំ មានស្នាមរបួស៣កាំបិត រស់នៅក្នុងភូមិសង្កាត់កើតហេតុខាងលើ ។
ប្រជាពលរដ្ឋម្នាក់បានឱ្យដឹងថា មុនពេលកើតហេតុ គេបានឃើញបុរសដែលរងគ្រោះរូបនេះបានអង្គុយតែម្នាក់ឯងនៅនឹងសួនច្បារនៅពីមុខកាស៊ីណូរីសតអូរស្មាច់ ក្រោយមកស្រាប់តែមានការភ្ញាក់ផ្អើលថាមានបុរសម្នាក់ត្រូវគេលបកាប់ បណ្តាលឱ្យរបួសធ្ងន់ រូបគាត់បានដើទៅមើលក៏ឃើញបុរសរូបនេះ ដែលអង្គុយនៅទីនេះតាំងពីម៉ោង៧យប់មកម្ល៉េះ ។
នគរបាលប៉ុស្តិ៍រដ្ឋបាលសង្កាត់អូរស្មាច់ បានឱ្យដឹងថា ក្រោយពីបានទទួលព័ត៌មានកម្លាំងនគរបាលបានចុះទៅដល់កន្លែងកើតហេតុ ឃើញបុរសរងគ្រោះកំពុងដេកដួលនៅក្នុងថ្លុកឈាម សមត្ថកិច្ចបាននាំទៅធ្វើការសង្គ្រាះ ដោយឡែកជនដៃដល់ដែលធ្វើសកម្មភាពបានរត់គេចខ្លួន នគរបាលកំពុងតែធ្វើការស្រាវជ្រាវរកជនដែលធ្វើសកម្មភាពនេះ មកផ្តន្ទាទោសតាមច្បាប់ ៕
ចែករំលែកព័តមាននេះ