ខេត្តបន្ទាយមានជ័យ ៖ លោកឧត្តមសេនីយ៍ទោ អាត់ ខែម ស្នងការនគរបាលខត្តបន្ទាយមានជ័យរួមដំណើរដោយ អ៊ឹង សៀងហួរ អាជីវករនៅក្រុងសិរីសោភ័ណនៅរសៀលថ្ងៃទី០៦ ខែវិច្ឆិកា…
ខេត្តបន្ទាយមានជ័យ ៖ លោកឧត្តមសេនីយ៍ទោ អាត់ ខែម ស្នងការនគរបាលខត្តបន្ទាយមានជ័យរួមដំណើរដោយ អ៊ឹង សៀងហួរ អាជីវករនៅក្រុងសិរីសោភ័ណនៅរសៀលថ្ងៃទី០៦ ខែវិច្ឆិកា ឆ្នាំ២០១៧ បាននាំយកអំណោយជាស៊ីម៉ងត៍ថវិការបស់លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ នាំយកទៅប្រគេនដល់ព្រះចៅអធិការវត្តប្រាសាទភាស ស្ថិតក្នុងភូមិភាស ឃុំសារង្គ ស្រុកស្វាយចេក ខេត្តបន្ទាយមានជ័យ ។
លោកឧត្តមសេនីយ៍ទោ អាត់ ខែម បានជំរាបប្រាប់ព្រះចៅអធិការវត្តភាសថា ដោយពិនិត្យឃើញពី ភាពខ្វះខាត និងការស្នើសុំពីព្រះចៅអធិការវត្តក៏ដូចជាអាចារ្យគណៈកម្មាការវត្តភាសដែលវត្តនេះនៅមានការខ្វះខាតនូវព្រះវិហារសម្រាប់ជាទីសក្ការរបស់ព្រះសង្ឃក៏ដូចជាពុទ្ធបរិស័ទ ។ លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ និងលោកជំទាវ ម៉ៅ ម៉ាល័យ កែ គឹមយ៉ាន បានប្រគេន និងឧបត្ថម្ភជូននូវស៊ីម៉ងត៍ចំណួន២០តោន, ប្រាក់ខ្មែរចំនួន២០.៥០០.០០០រៀល(ម្ភៃលាន៥សែន)និងប្រាក់ដុល្លារ១ពាន់ដុល្លារ ក្នុងការកសាងព្រះវិហារវត្តប្រាសាទភាសនេះ ។
តាមការឲ្យដឹងពីលោកអាចារ្យ គណៈកម្មាការវត្ត បានប្រាប់ថា ព្រះវិហារនេះបានដំណើរការសាងសង់អស់រយៈពេល៤ឆ្នាំមកហើយគឺមានបណ្តោយ២២ម៉ែត្រ និងទទឹង១២ម៉ែត្រ បច្ចុប្បន្នកសាងសង់បាន៧០%ហើយ ។ ជាមួយគ្នានោះដែរ ព្រះចៅអធិការវត្តក៏ដូចជាអាចារ្យ គណៈកម្មាការវត្តប្រាសាទភាស បានថ្លែងអំណរគុណលោកឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ កែ គឹមយ៉ាន ទន្ទឹមនឹងធ្វើកិច្ចការងារស្នូលលើវិស័យអាណាចក្រ ឯឧត្តម និងលោកជំទាវ តែងយកចិត្តទុកដាក់ក្នុងការជួយឧបត្ថម្ភគាំទ្រដល់វិស័យព្រះពុទ្ធសាសនាឲ្យមានការរីកចម្រើនពិសេសគឺទីវត្តអារាមនៅក្នុងខេត្តបន្ទាយមានជ័យយើងនិយាយជារួម និងនិយាយដោយឡែកក្នុងវត្តប្រាសាទភាសតែម្តង ៕
ចែករំលែកព័តមាននេះ