ខេត្តពោធិ៍សាត់ ៖ មនុស្សម្នាក់បានស្លាប់ភ្លាមៗនៅនឹងកន្លែងកើតហេតុ ឯម្នាក់ទៀតរងរបួសធ្ងន់ខណៈរថយន្តក្រុងបុកម៉ូតូនៅលើកំណាត់ផ្លូវជាតិលេខ៥ កាលពីវេលាម៉ោង១២និង៣០នាទីយប់ឈានចូល ថ្ងៃទី០៧ ខែវិច្ឆិកា ឆ្នាំ២០១៧ត្រង់ចំណុចផ្លូវបែកជាបួន ស្ថិតក្នុងភូមិស្ថានីយ៍ សង្កាត់ស្វាយអាត់ ក្រុងពោធិ៍សាត់ ។
ជនរងគ្រោះទាំងពីរនាក់ទី១- ឡេង វណ្ណា ភេទ ប្រុស អាយុ៥៦ឆ្នាំ រស់នៅភូមិលលកស សង្កាត់លលកស ក្រុងខេត្តពោធិ៍សាត់ ជាអ្នកបើកម៉ូតូ និងទី២- សុទ្ធ លីដា ភេទស្រី អាយុ២០ឆ្នាំ រស់នៅភូមិយស់ ឃុំកណ្តៀង ស្រុកកណ្តៀង ជាអ្នករួមដំណើរ ។
សមត្ថកិច្ចឲ្យដឹងថា មនុស្សប្រុសស្រីពីរនាក់ ជិះម៉ូតូ សេ១២៥ ពណ៌ខ្មៅ ស្លាកលេខ ១ឈ-១៧២៥ ពីជើងទៅត្បូង លុះមកដល់ចំណុចខាងលើ អ្នកជិះម៉ូតូបានបើកឆ្លងផ្លូវមិនទាន់ផុតផង ស្រាប់តែមានរថយន្តក្រុងមួយគ្រឿង ស្លាកលេខ ៣C-៧២៨៧ ពណ៌សលាយក្រហម ធ្វើដំណើរពីលិចទៅកើត បានបុកម៉ូតូយ៉ាងពេញទំហឹងបណ្តាលឲ្យ ស្ត្រីម្នាក់ស្លាប់ភ្លាមៗនៅនឹងកន្លែង រីឯបុរសម្នាក់ទៀតរងរបួសយ៉ាងធ្ងន់ ចំណែកម៉ូតូខូចខាតយ៉ាងដំណំ ។ ភ្លាមៗនោះជនរងគ្រោះ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តពោធិ៍សាត់ ដោយឃើញអាការរបស់ជនរង គ្រោះមានសភាពធ្ងន់ធ្ងរពេក ក្រុមគ្រួសារបានពិភាក្សាជាមួយគ្រូពេទ្យបញ្ជូនទៅសង្គ្រោះ នៅមន្ទីរពេទ្យរាជធានីភ្នំពេញ ។
ក្រោយពេលកើតហេតុ អ្នកបើករថយន្តក្រុងបានរត់គេចខ្លួនបាត់ ។ ចំពោះរថយន្ត និងម៉ូតូសមត្ថកិច្ច បានយកមករក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាន នគរបាលខេត្តពោធិ៍សាត់ដើម្បីដោះស្រាយទៅតាមនីតិវិធី ៕
ចែករំលែកព័តមាននេះ