ខេត្តកំពង់ឆ្នាំង ៖ ឯកឧត្តម ហ៊ី ណាត អភិបាលរងខេត្តកំពង់ឆ្នាំង បានអំពាវនាវដល់បងប្អូនប្រជាពលរដ្ឋក្នុងខេត្តសូមចូលរួមថែរក្សាអនាម័យ ដោយបោះសំរាមដាក់ក្នុងធុងសំរាមឲ្យបានត្រឹមត្រូវ ព្រោះថា សំរាមបានធ្វើឲ្យប៉ះពាល់ជីវិតការរស់នៅរបស់បងប្អូនប្រជាពលរដ្ឋរបស់យើង។ ថ្លែងបែបនេះ ក្នុងពិធីទទួលអំណោយ ជាធុងសំរាមចំនួន៥០ និងបង់អង្គុយចំនួន៧០ ពីគ្រិះស្ថានមីក្រូហិរញវត្ថុ អម្រឹត នៅមុខសាលាខេត្តកំពង់ឆ្នាំង នាព្រឹកថ្ងៃទី០៦ ខែវិច្ឆិកា ឆ្នាំ២០១៧នេះ។ ឯកឧត្តម ហ៊ី ណាត អភិបាលរងខេត្តកំពង់ឆ្នាំង បានបន្តថា សំរាមវាមិនត្រឹមតែធ្វើឲ្យប៉ះពាល់ដល់សោភ័ណភាពនោះទេ សំរាមវាធ្វើឲ្យប៉ះពាល់ដល់បរិស្ថាន ទាំងក្លិន និងប្រភពមេរោគ សូម្បីតែបានចោលវាទៅក្នុងទឹក ក៏ប៉ះពាល់ពាល់ដល់បរិស្ថានទឹកផងដែរ។
នេះជាការងារការពារបរិស្ថាន ដែលយើងត្រូវចូលរួមទាំងអស់គ្នា។ ជាមួយគ្នានេះដែរ ឯកឧត្តមសូមថ្លែងអំណរគុណ ដល់អគ្គនាយក គ្រិះស្ថានមីក្រូហិរញវត្ថុ ដែលបានយកចិត្តទុកដាក់ដល់ការងារការបរិស្ថាន ដែលបានបរិច្ចាគធុងសំរាម និងបង់អង្គុយ ដែលនេះជាការងារសំខាន់ក្នុងការជួយដល់សង្គម ដើម្បីអភិវឌ្ឈ។ កន្លងទៅអាជ្ញាធរខេត្តបានទទួលអំណោយជាធុងសំរាម និងបង់អង្គុយមួយចំនួន ពីវិស័យឯកជន ហើយពេលនេះក៏បានទទួលធុងសំរាមចំនួន៥០ទៀត ថ្វីបើវាមិនគ្រប់គ្រាន់ពិតមែន តែក៏បានបំពេញសេចក្តីត្រូវការមួយចំនួនដែរ។ ជាមួយគ្នានេះដែរ អាជ្ញាធរខេត្តកំពង់ឆ្នាំង បានយកចិត្តទុកដាក់កែលម្អសោភ័ណភាពក្នុងក្រុងកំពង់ឆ្នាំង ឲ្យមានមុខមាត់ថ្មី ដោយបានសហការណ៍ជាមួយអង្គការចៃការ បានកសាងផ្លូវក្នុងក្រុង រៀបចំសួនច្បារ ដាក់បង់អង្គុយកម្សាន្ត និងមានអ្នកបោសសំរាមក្នុងក្រុងជាប្រចាំ។ ក្រៅពីនោះ ខេត្តនៅបានដាក់អំពូលភ្លើងបំភ្លឺតាមដងផ្លូវ ធ្វើឲ្យសោភ័ណភាពនៅពេលយប់ភ្លឺគ្រប់ទីកន្លែង។
លោក ជា ផល្លារិន អគ្គនាយកនៃគ្រិះស្ថានមីក្រូហិរញវត្ថុបានលើកឡើងថា ការចូលរួមជួយជ្រោមជ្រែង និងលើកស្ទួយបរិស្ថានឲ្យមានភាពប្រសើឡើង គឺជាការរួមចំណែកយ៉ាងធំ សម្រាប់ការរស់នៅរបស់ប្រជាពលរដ្ឋរបស់យើង។ ការផ្តល់អំណោយដល់សាលាខេត្តកំពង់ឆ្នាំងនៅពេលនេះ គឺគោលបំណងសំខាន់ចង់ឲ្យប្រជាពលរដ្ឋរបស់យើង យល់ដឹងកាន់តែច្បាស់អំពីបរិស្ថាន ស្របតាមប្រទេសជាតិរបស់យើងកំពុងតែមានការរីកចម្រើន។ លោកបានបញ្ជាក់ថា ធុងសំរាមចំនួន៥០ ដែលបានផ្តល់ជូននៅពេលនេះ គឺសម្រាប់សាលាខេត្តចំនួន២០ សម្រាប់សួនច្បារចំនួន២០ និងសម្រាប់មន្ទីរពេទ្យចំនួន១០។ចំណែកបង់អង្គុយចំនូន៧០ គឺផ្តល់ទៅសាលាខេត្តចំនួន២០ សម្រាប់ដាក់សួនច្បារ៤០ និងសម្រាប់មន្ទីរពេទ្យខេត្តចំនួន១០។ ក្រៅពីនោះសិស្សចំនួន២០០នាក់ បានទទួលអំណោយជាសម្ភារសិក្សាមួយចំនួនផងដែរ៕
ចែករំលែកព័តមាននេះ