ទីក្រុងបាងកក ៖ ពេលនេះ ភ្ញៀវទេសចរបរទេសអាចដាក់ពាក្យស្នើប្រាក់សំណងពីនាយកដ្ឋានទេសចរណ៍ប្រចាំប្រទេសថៃ ប្រសិនបើពួកគេចាញ់បោកក្រុមហ៊ុនដំណើរកម្សាន្តដែលភូតភរអតិថិជន ។
លោក Anant Wongbenjarat ប្រធាននាយកដ្ឋានខាងលើបានឲ្យដឹងថា ៖« ភ្ញៀវទេសចរដែលបានចាញ់បោកក្រុមហ៊ុនដំណើរកម្សាន្តក្នុងបញ្ជី ឬបើក្រុមហ៊ុនទាំងនោះមិនអាចផ្តល់សេវាកម្មជូនដូចដែលបានព្រមព្រៀង ភ្ញៀវទេសចរមានសិទ្ធិទាមទារសំណងពីនាយកដ្ឋានបាន » ។
ប៉ុន្តែគេជំរុញឲ្យភ្ញៀវទេសចរទាំងអស់ត្រួតពិនិត្យថា តើក្រុមហ៊ុនបានចុះបញ្ជី ឬមានប័ណ្ណដំណើរការត្រឹមត្រូវនៅមុនពេលព្រមព្រៀង ។ វាជាវិធានការមួយដ៏សំខាន់ក្នុងការទប់ស្កាត់ក្រុមហ៊ុនដំណើរកម្សាន្តខុសច្បាប់ ឬក្រុមហ៊ុនមិនចុះក្នុងបញ្ជី មិនឲ្យទាញអត្ថប្រយោជន៍ពីអតិថិជន ។
លោក Anant បន្តថា សំណើសុំប្រាក់សំណងអាចធ្វើទៅបានក្នុងកាលៈទេសៈណា ដែលក្រុមហ៊ុននោះបានចុះឈ្មោះរួចរាល់ ។
មូលនិធិការពារអាជីវកម្មភ្ញៀវទេសចរដែលបង្កើតឡើងក្រោមច្បាប់ទេសចរណ៍ អាជីវកម្មមគ្គុទ្ទេសក៍ ហើយស្ថិតក្រោមការគ្រប់គ្រងរបស់នាយកដ្ឋានខាងលើ នឹងទទួលរ៉ាប់រងប្រាក់សំណងទាំងនោះ ។
ក្រោមច្បាប់នេះ ក្រុមហ៊ុនដំណើរកម្សាន្តត្រូវដាក់ប្រាក់តម្កល់ក្នុងមូលនិធិ ហើយពួកគេត្រូវបង់ទៅតាមការកំណត់ ។ ក្រុមហ៊ុនផ្តល់សេវាកម្មដំណើរកម្សាន្តទាំងក្នុង និងក្រៅស្រុក ត្រូវតម្កល់ប្រាក់ប្រមាណ៦ពាន់ដុល្លារ ហើយវានឹងកើនដល់១ម៉ឺន៥ពាន់ដុល្លារ ។
ក្រុមហ៊ុនមានប័ណ្ណដំណើរការ ប៉ុន្តែផ្តល់សេវាកម្មដំណើរកម្សាន្តក្នុងស្រុក នឹងត្រូវតម្កល់១.៥០០ដុល្លារ ហើយវានឹងកើនដល់៣ពាន់ដុល្លារ ។
ជាមួយគ្នានេះ ក្រុមហ៊ុនមានប័ណ្ណអនុញ្ញាតដំណើរការក្នុងខេត្ត ត្រូវតម្កល់៣០០ដុល្លារ ហើយវានឹងកើនដល់១.៥០០ដុល្លារផងដែរ ។
នៅពេលភ្ញៀវទេសចរចាញ់បោកមូលនិធិនេះ មន្ត្រីមានសមត្ថកិច្ចនឹងផ្តល់ប្រាក់សំណងដល់ភ្ញៀវទេសចរទាំងនោះ ។ ក្រោយមក នាយកដ្ឋាននឹងប្រមូលប្រាក់ពីក្រុមហ៊ុននោះវិញ បន្ទាប់ពីផ្តល់ប្រាក់សំណងហើយ ។ ក្រុមហ៊ុនមិនព្រមបង់ នឹងបាត់បង់ប្រាក់តម្កល់ ហើយអាចបាត់បង់ឱកាសពន្យារពេលប័ណ្ណអនុញ្ញាតដំណើរការផងដែរ ៕
ចែករំលែកព័តមាននេះ