ខេត្តពោធិ៍សាត់ ៖ យ៉ាងហោចណាស់មានមនុស្សម្នាក់បានស្លាប់ និង៦នាក់ទៀតរងរបួសធ្ងន់ និងស្រាលដោយគ្រោះថ្នាក់ចរាចរណ៍ពីរករណីផ្សេងគ្នាក្នុងថ្ងៃតែមួយគឺថ្ងៃទី០៤ ខែវិច្ឆិកា ឆ្នាំ២០១៧នៅស្រុកក្រគរ ។
តាមការផ្ដល់ព័ត៌មានពីសមត្ថកិច្ចនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តពោធិ៍សាត់បានឲ្យដឹងថា កាលពីវេលាម៉ោង១១និង៤០នាទីព្រឹកមានគ្រោះថ្នាក់ចរាចរណ៍មួយបានកើតឡើងលើកំណាត់ផ្លូវជាតិលេខ៥ចន្លោះគីឡូម៉ែតលេខ១៥០ ១៥១ ស្ថិតក្នុងភូមិឈើទាលខ្ពស់ ឃុំក្បាលត្រាច ស្រុកក្រគរ បណ្ដាលឲ្យប្ដីប្រពន្ធពីរនាក់ម្នាក់ស្លាប់ និងម្នាក់ទៀតរងរបួសធ្ងន់ ។
គ្រោះថ្នាក់ចរាចរណ៍នេះបង្កឡើងដោយរថយន្ដក្រុងដឹកអ្នកដំណើរ ពណ៌សឆ្នូតក្រហម ពាក់ស្លាកលេខ ភ្នំពេញ ៣B-៦៩៨២ ធ្វើដំណើរក្នុងទិសដៅពីកើតទៅលិច ។ ទៅដល់ចំណុចកើតហេតុបត់ឆ្វេងចូលកន្លែងហាងបាយរថយន្តក្រុងក៏បុកប្ដីប្រពន្ធពីរនាក់ដែលកំពុងជិះម៉ូតូឌុបគ្នាបណ្ដាលឲ្យបុរសជាប្ដីស្លាប់នៅនឹងកន្លែងកើតហេតុ រីឯស្ត្រីជាប្រពន្ធរងរបួសយ៉ាងធ្ងន់ធ្ងរ ។ អ្នកបើកបររថយន្ដក្រុងមិនស្គាល់អត្តសញ្ញាណក្រោយពេលកើតហេតុបានរត់គេចខ្លួនបាត់ស្រមោល ។ ជនរងគ្រោះឈ្មោះ សឿ សាម៉ន ភេទប្រុស អាយុ៥៤ឆ្នាំ(ស្លាប់) ជានាយកសាលាបឋមសិក្សាត្រពាំងរំដេញ ប្រពន្ធឈ្មោះ អ៊ុំ ហៀប អាយុ៥៧ឆ្នាំ (របួសធ្ងន់) ទាំងពីរនាក់រស់នៅភូមិ-ឃុំកើតហេតុខាងលើ ។
គ្រោះថ្នាក់ចរាចរណ៍លើកទី២បានកើតឡើងលើកំណាត់ផ្លូវជាតិលេខ៥ដូចគ្នាស្ថិតក្នុងភូមិត្រាំ ឃុំត្នោតជុំ ស្រុកក្រគរ កាលពីវេលាម៉ោង១២និង០០នាទីយប់ បង្កឡើងដោយរថយន្ដម៉ាកសាំយ៉ុង ពណ៌លឿង ពាក់ស្លាកលេខ កំពត ២A-១៧៣១ ដឹកផ្លែម្នាស់ពេញ ។ នៅយប់នោះរថយន្ដបានធ្វើដំណើរក្នុងទិសដៅពីលិចទៅកើតទៅដល់ចំណុចកើតហេតុបានបែកកង់បណ្ដាលឲ្យក្រឡាប់ទៅចិញ្ចើមផ្លូវចាក់ម្នាស់ចោល និងរបួសមនុស្សទាំង៥នាក់ដែលជិះលើរថយន្ដនោះ ។
ជនរងគ្រោះទាំងអស់បានបញ្ជូនទៅសង្គ្រោះនៅមន្ទីរពេទ្យបង្អែកខេត្ត ចំណែករថយន្ដនិងម៉ូតូបង្កគ្រោះថ្នាក់សមត្ថកិច្ចបានរក្សាទុកនៅអធិការដ្ឋាននគរបាលស្រុកក្រគរដើម្បីដោះស្រាយទៅតាមច្បាប់ចរាចរណ៍ផ្លូវគោក ៕
ចែករំលែកព័តមាននេះ