រាជធានីភ្នំពេញ ៖ មន្ត្រីជាន់ខ្ពស់បក្សកាន់អំណាចថ្លែងថា គណបក្សប្រឆាំងត្រូវបានគេមើលឃើញថា កំពុងមានទុក្ខជាន់លើទុក្ខដោយសារមេដឹកនាំគណបក្សនេះកំពុងជាប់ពន្ធនាគារហើយផ្ទៃក្នុងគណបក្សកំពុងមានការចោទប្រកាន់គ្នាទៅវិញទៅមកខណៈសំណុំរឿងរំលាយគណបក្សក៏កំពុងត្រូវបានតុលាការកំពូលបន្តនីតិវិធី ។ ទាក់ទិននឹងរឿងរ៉ាវរបស់គណបក្សសង្គ្រោះជាតិនេះត្រូវបានលោក សុខ ឥសាន អ្នកនាំពាក្យគណបក្សប្រជាជនកម្ពុជា ថ្លែងឲ្យដឹងនៅថ្ងៃទី១ ខែវិច្ឆិកា ឆ្នាំ២០១៧ថា បញ្ហានេះ បានធ្វើឲ្យប្រធានគណបក្សមានការឈឺចាប់យ៉ាងខ្លាំងទាំងខ្លួនកំពុងជាប់ពន្ធនាគារមិនអាចធ្វើអ្វីបាន ។
លោកបញ្ជាក់ថា ក្នុងដំណេីរឆ្ពោះទៅរកការរំលាយគណបក្សនាពេលដ៏ឆាប់ៗខាងមុខនេះ មេបក្សប្រឆាំងដែលកំពុងជាប់ឃុំក្នុងពន្ធនាគាររង់ចាំការកាត់សេចក្តីដោយតុលាការ បានសម្តែងនូវការឈឺចាប់ផ្ទួនៗដែលខ្លួនត្រូវជាប់ឃុំហេីយបែរជាផ្ទៃក្នុងបក្សក៏កំពុងរង្គោះរង្គេីទៀតដោយសារការក្រឡុករបស់អតីតមេបក្សប្រឆាំងដែលមិនទាន់អស់កិលេសចង់បានអំណាចមិនស្កប់ស្កល់នោះ ។ លោកបញ្ជាក់ថា៖ «ជាការគួរឲ្យសោកស្តាយណាស់ ស្មារតីកិច្ចព្រមព្រៀងទីក្រុងប៉ារីស បានតម្រង់ទិសឲ្យដេីរតាមគន្លងនៃលទ្ធិប្រជាធិបតេយ្យក្នុងការប្រកួតប្រជែងយកអំណាចពីប្រជាជនដេីម្បីដឹកនាំប្រទេសឲ្យប្រកបដោយសុខសន្តិភាព សុវត្ថិភាព និងសម្បូររុងរឿង ប៉ុន្តែដោយសតិអារម្មណ៍ជ្រុលនិយមពេក មិនគោរពតាមលទ្ធិប្រជាធិបតេយ្យ បែរជាទៅដើរតាមនិងធ្វេីតាមការបង្គាប់បញ្ជារបស់មេខ្លោងបរទេសទៅវិញនាំឲ្យធ្លាក់ទឹកយ៉ាងដូច្នេះនិងឈានទៅរកសេចក្តីវិនាសសាបសូន្យនាពេលឆាប់ៗខាងមុខនេះ ។
ជាមួយគ្នានោះដែរ អ្នកនាំពាក្យគណបក្សកាន់អំណាចក៏បានលើកឡើងថា ការដែលមន្ត្រីគណបក្សប្រឆាំងរត់ទៅពឹង ឬរង់ចាំជំនួយអន្តរាគមន៍ពីមេខ្លោងក៏មិនដឹងនៅពេលណាដែរ ព្រោះមេខ្លោងបានត្រឹមតែអះអាងថានៅពីក្រោយខ្នងជានិច្ច ។ ដូច្នេះបេីពឹងមេខ្លោងមិនមានសង្ឃឹម មានតែពឹងលេីធម៌សាមគ្គីផ្ទៃក្នុង តែដោយសារផ្ទៃក្នុងកំពុងប្រទូស្តរយគ្នាដោយសារទណ្ឌិត សម រង្ស៊ី ចូលមកក្រឡុកទៀត មិនដឹងធ្វេីយ៉ាងណាទេ មានតែបញ្ចេញវាចាឮៗឲ្យមហាជនបានដឹងទេីបបានធូរទ្រូងបន្តិច ។ យ៉ាងណាក្តីលោក សុខ ឥសាន បានសម្តែងអះអាងថា លោក កឹម សុខា ប្រធានគណបក្សសង្គ្រោះជាតិបាននិងកំពុងជាប់ពន្ធនាគារនៅត្រពាំងផ្លុង បានសម្តែងការអស់សង្ឃឹមយ៉ាងធ្ងន់ធ្ងរទុក្ខជាន់លេីទុក្ខផ្ទួនៗដោយសារតែដើរយុទ្ធសាស្ត្រនយោបាយខុសមកលង់ជឿលេីមេខ្លោងនឹកថាដ៏មហិមា តែឥឡូវបែរជាក្រឡេះបេះទៅវិញ ។ លោក សុខ ឥសាន បានសង្កត់ធ្ងន់ថា៖«អស់សង្ឃឹមហេីយខ្ញុំ មិនដឹងពឹងស្អីទេ មានតែពឹងព្រះពុទ្ធ ព្រះធម៌ និងព្រះសង្ឃប៉ុណ្ណោះ ។ ជាតិនេះហួសហេីយចាំជាតិក្រោយទៀតចុះមកពីខ្ញុំជឿតាមគេ ដេីរតាមការចង្អុលបង្ហាញរបស់គេ ហេីយកម្មវិធីនយោបាយក៏ខ្ញុំមិនបានដឹងដែរគឺគេធ្វេីឲ្យទាំងអស់ហ្នឹង ហេីយមិនដឹងចង្រៃអីនៅមិននៅស្រាប់ខ្មោចនាំមាត់ឲ្យខ្ញុំនិយាយការពិតនៃល្បិចកលប្រាប់គេអស់រលីងអញ្ចឹង មានភ័ស្តុតាងឯកសារច្បាស់លាស់ហេីយរកប្រកែកក៏មិនកេីត មានតែស៊ូទ្រាំតាមយថាកម្មទៅចុះ។ ឱលោកអេីយ! ខ្លួនជាប់ឃុំរកធ្វេីអីក៏មិនកេីត បែរជានៅខាងក្រៅបែកបាក់គ្នាទៀតចំមែនតែម្តងហើយ» ។
សូមជម្រាបថា តុលាការកំពូលបានសម្រេចយកថ្ងៃទី១៦ ខែវិច្ឆិកាខាងមុខនេះជាថ្ងៃធ្វើសវនាការសម្រេចសេចក្ដីលើករណីដែលក្រសួងមហាផ្ទៃប្ដឹងសុំរំលាយគណបក្សសង្គ្រោះជាតិ ។ ប៉ុន្តែការកំណត់នេះត្រូវបានសហគមន៍ អន្តរជាតិ ថ្កោលទោសរាជរដ្ឋាភិបាលកម្ពុជា ចំពោះចំណាត់ការបំបាត់សំឡេងបក្សប្រឆាំងបែបនេះ ។ សមាជិកសភាអាមេរិកមួយរូបបានកំណត់ឱសានវាទឲ្យដោះលែងលោក កឹម សុខា ត្រឹមថ្ងៃទី៩ ខែវិច្ឆិកា និងនាំស្ថានការណ៍បច្ចុប្បន្នឲ្យវិលត្រឡប់ទៅរកសភាពធម្មតាវិញ ដើម្បីឲ្យមានការបោះឆ្នោតមួយដោយសេរី ត្រឹមត្រូវ និងយុត្តិធម៌ បើមិនដូច្នេះទេ កម្ពុជានឹងរងទណ្ឌកម្មពីសហរដ្ឋអាមេរិកហើយ ។
កូនស្រីលោក កឹម សុខា ចេញសារបញ្ជាក់ពីជំហររបស់ឪពុកថាមិនដូចការចោទប្រកាន់របស់ សម រង្ស៊ី កូនស្រីបង្កើតរបស់លោក កឹម សុខា ប្រធានគណបក្សសង្គ្រោះជាតិគឺកញ្ញា កឹម សម្មាធីតា បានចេញសារបញ្ជាក់ពីភាពស្អាតស្អំរបស់ឪពុកខ្លួនថា មិនដែលលាបពណ៌មួលបង្កាច់អ្នកណាទេ ។ ការចេញសារនេះប្រៀបដូចជាការឆ្លើយតបទៅនឹងការលើកឡើងរបស់លោក សម រង្ស៊ី អតីតប្រធានគណបក្សសង្គ្រោះជាតិដែលបានចោទប្រកាន់លោក កឹម សុខា ថាសម្រេចអ្វីមួយមិនបានពិភាក្សាជាមួយមន្ត្រីជាន់ខ្ពស់គណបក្សដែលមានកូតាចេញពីគណបក្សសម រង្ស៊ី របស់លោក (បច្ចុប្បន្នគណបក្សភ្លើងទៀន)។ កញ្ញា កឹម សម្មាធីតា បានសរសេរលើបណ្តាញសង្គមផ្ទាល់ខ្លួនអមដោយរូបលោក កឹម សុខា រួមនឹងសមាជិកគណបក្សសង្គ្រោះជាតិមួយចំនួនទៀតកំពុងហូបបាយនៅកណ្តាលវាលថា «គាត់ធ្វើនយោបាយជាង២០ឆ្នាំហើយ មិនដែលលាបពណ៌មួលបង្កាច់អ្នកណាទេ» ។ កញ្ញាបានសរសេរទៀតថា ឪពុកកញ្ញាធ្លាប់ត្រូវរងការលាបពណ៌យូរមកហើយ ហើយក៏មិនដែលចងគំនុំនឹងពួកដែលលាបពណ៌គាត់ និងនិយាយពាក្យកុហកបោកប្រាស់ដើម្បីបង្ខូចឈ្មោះគាត់ដែរ ។ គាត់គិតតែពីម្យ៉ាងគត់ គឺធ្វើយ៉ាងណាឲ្យខ្មែរមានសិទ្ធិសេរីភាព និងលទ្ធិប្រជាធិបតេយ្យ។ មកទល់ថ្ងៃនេះ វិនាទីនេះ គាត់បានលះបង់គ្រប់បែបយ៉ាងដើម្បីបុព្វហេតុជាតិ ។ លើបណ្តាញសង្គមដដែល កញ្ញាបានដាក់សំណួរថា តើបងប្អូនដឹងទេថា គាត់កំពុងនៅទីណា? គាត់កំពុងជាប់ឃុំក្នុងពន្ធនាគារដ៏ឆ្ងាយដាច់សង្វែង ភរិយាគាត់សុខចិត្តនៅប្រឈមការភ័យខ្លាចមិនរត់ទៅណាដើម្បីធ្វើដំណើររាប់ម៉ោងមួយជើងៗក្នុងការទៅជួបគាត់ សួរសុខទុក្ខ និងពាំនាំបណ្តាំរបស់គាត់មកជូនជនរួមជាតិ ។
កូនស្រីបង្កើតរបស់លោក កឹម សុខា ក៏បានលើកឡើងទៀតថា សូមចាំទុកថា ក្នុងកាលៈទេសៈណាក៏ដោយ កឹម សុខា មិនដែលចុះញ៉ម មិនដែលក្បត់ឆន្ទៈខ្លួន មិនដែលរត់គេច មិនដែលភ្លេចប្រជាពលរដ្ឋ! ទោះរូបកាយគាត់ត្រូវជាប់ឃុំ តែគ្មាននរណាម្នាក់អាចឃុំឧត្តមគតិគាត់បានឡើយ។
កញ្ញាបន្ថែមថា ឪពុករបស់ខ្លួននៅតស៊ូនិងរឹងមាំជានិច្ច ។ បើអ្នកជាប់ឃុំលះបង់ប៉ុណ្ណេះ ហើយ តើវាពិបាកណាស់ទៅឬសម្រាប់អ្នកនៅក្រៅឃុំក្នុងការមិននិយាយពាក្យកុហកបោកប្រាស់ ហើយឲ្យចេះរួមសាមគ្គីគ្នាក្នុងគ្រាលំបាក មិនមែនឆ្លៀតឱកាសវាយប្រហារគ្នាឯងនោះទេ។ កញ្ញាកឹម សម្មាធីតា បានគូសបញ្ជាក់ថា«ឪពុកបានលះបង់អស់ហើយ សូមកូនចៅកុំឈ្លោះ កុលាបពណ៌គ្នា ។ ត្រូវគេចាប់ឃុំ ឈឺចាប់មិនស្មើនឹងដឹងថាកូនចៅនៅខាងក្រៅ បែកបាក់គ្នាទេ»។
សូមជម្រាបថា ការលើកឡើងរបស់កញ្ញា កឹម សម្មាធីតា បែបនេះកើតឡើងបន្ទាប់ពីកាលពេលថ្មីៗកន្លងមកនេះ លោក សម រង្ស៊ី បានផ្ញើលិខិតសម្ងាត់មួយទៅលោក កឹម សុខា ថា មុននឹងសម្រេចអ្វី ត្រូវពិភាក្សាជាមួយមនុស្សសំខាន់បីរូបដែលអ្នកទាំងនោះត្រូវគេដឹងថាជាមនុស្សជំនិតរបស់លោក ។ លើសពីនេះ សម រង្ស៊ី បានចេញមកចោទដោយត្រង់ៗថា លោក ម៉ៅ មុន្នីវណ្ណ តំណាងរាស្ត្រគណបក្សសង្គ្រោះជាតិកូតាខាងកឹម សុខា បានក្បត់បក្សដោយស្តាប់តាមការបង្គាប់បញ្ជារបស់សម្តេចតេជោ ហ៊ុន សែន ប្រមុខគណបក្សប្រជាជនកម្ពុជា ហើយថា លោក ម៉ៅ មុនី្នវណ្ណ កំពុងធ្វើបក្សប្រហារទៀតផង ៕
ចែករំលែកព័តមាននេះ