ខេត្តក្រចេះ ៖ ជនដៃដល់៣នាក់ ដែលបានរៀបចំគម្រោងវាយសម្លាប់ជនរងគ្រោះរួចអូសសពទម្លាក់ចោលក្នុងទឹកព្រែក ក៏ព្រោះតែរឿងគំនុំដោយចោទថា ជនរងគ្រោះចេះធ្វើអំពើអាបធ្មប់ និងបានធ្វើអំពើនេះឲ្យមានមនុស្សក្នុងភូមិបានស្លាប់ជាបន្តបន្ទាប់ទៀតផងនោះ ត្រូវបាននគរបាលស្រុកចិត្របុរី ចាប់ខ្លួនពាក់ព័ន្ធនឹងករណីមនុស្សឃាតដោយចេនា ។
ការចាប់ខ្លួនក្រុមជនដៃដល់ទាំង៣នាក់ ដែលធ្វើឡើងពីកម្លាំងនគរបាលព្រហ្មទណ្ឌស្រុកចិត្របុរី គឺបានធ្វើឡើងមួយថ្ងៃបន្ទាប់ពីពួកគេបានវាយសម្លាប់ជនរងគ្រោះអាយុ៤៩ឆ្នាំម្នាក់ កាលពីយប់ថ្ងៃទី៣០ ខែតុលា ឆ្នាំ២០១៧ នៅព្រៃខាងក្រោយភូមិស្រែនូន ឃុំកន្ទួត ស្រុកចិត្របុរី រួចបាននាំគ្នាអូសយកសាកសពជនរងគ្រោះមកទម្លាក់ចោលក្នុងទឹកព្រែកទេ ដែលស្ថិតនៅខាងក្រោយភូមិ ។ ចំណែកឯក្រុមជនដៃដល់ក៏ជាមនុស្សរស់នៅក្នុងភូមិជាមួយនឹងជនរងគ្រោះផងដែរ ។
សាកសពរបស់ជនរងគ្រោះឈ្មោះ ប៊ីវ និល ដែលក្រុមជនដៃដល់ចោទថា ចេះធ្វើអំពើអាបធ្មប់ និងបានធ្វើអំពើទៅលើអ្នកនៅក្នុងភូមិបណ្តាលឲ្យស្លាប់ជាបន្តបន្ទាប់ក្នុងអំឡុងរយៈពេលប៉ុន្មានថ្ងៃជាប់ៗគ្នានេះ ក៏ត្រូវបាននគរបាលស្រងចេញពីទឹកព្រែក និងបានរកឃើញថា បានរងការវាយសម្លាប់ពីក្រុមជនដៃដល់ ដោយបន្ទះឈើបណ្តាលឲ្យរងរបួសធ្ងន់ត្រង់ក្បាល និងផ្ទៃមុខ ។
នាយផ្នែកព្រហ្មទណ្ឌស្រុកចិត្របុរី លោក ហេង ប៊ុនធឿន បានឲ្យដឹងថា ជនដៃដល់ទាំង៣នាក់ត្រូវបាននគរបាលចុះចាប់ខ្លួនបានជាបន្តបន្ទាប់ និងក៏កំពុងតែសាកសួរបន្ថែម ដើម្បីបន្តចំណាត់ការទៅតុលាការ នៅថ្ងៃទី០១ ខែវិច្ឆិកា ឆ្នាំ២០១៧ នេះ ។ បើតាមលោកនាយផ្នែករូប បានបញ្ជាក់ទៀតថា មូលហេតុដែលឈានឲ្យមានអំពើមនុស្សឃាតនេះ ដោយសារតែរឿងគំនុំដែលពួកគេចោទទៅលើជនរងគ្រោះថា ជននេះចេះអំពើអាបធ្មប់ ។ សកម្មភាពរបស់ពួកគេបានធ្វើឡើងដោយមានជនដៃដល់ម្នាក់ បានល្បួងជនរងគ្រោះឲ្យជិះម៉ូតូទៅជាមួយដើម្បីរកកន្លែងផឹកបន្ត ។ នៅពេលជិះម៉ូតូទៅដល់ខាងក្រោយភូមិ ពួកគេបានព្រួតវាយទៅលើជនរងគ្រោះបណ្តាលឲ្យស្លាប់ រួចយកសពទៅទម្លាក់ចោលក្នុងព្រែក ដើម្បីបំបិទភស្តុតាង ។ តែយ៉ាងណា ឈាមស្រែកស្បែកហៅ ក្រុមជនដៃដល់ត្រូវបានវែកមុខ និងត្រូវចាប់ខ្លួនបានជាបន្តបន្ទាប់ក្នុងថ្ងៃតែមួយ ៕
ចែករំលែកព័តមាននេះ