ទីក្រុងតូក្យូ ៖ ដី និងផ្ទះគ្មានម្ចាស់មាននៅគ្រប់ទីកន្លែងក្នុងប្រទេសជប៉ុន ព្រោះតែកំណើនប្រជាពលរដ្ឋធ្លាក់ចុះ ។ ក្រុមស្រាវជ្រាវឯកជនមួយព្រមានថា ដី និងផ្ទះគ្មានម្ចាស់ទាំងនោះអាចនឹងស្មើទំហំកោះខាងជើង Hokkaido…
ទីក្រុងតូក្យូ ៖ ដី និងផ្ទះគ្មានម្ចាស់មាននៅគ្រប់ទីកន្លែងក្នុងប្រទេសជប៉ុន ព្រោះតែកំណើនប្រជាពលរដ្ឋធ្លាក់ចុះ ។
ក្រុមស្រាវជ្រាវឯកជនមួយព្រមានថា ដី និងផ្ទះគ្មានម្ចាស់ទាំងនោះអាចនឹងស្មើទំហំកោះខាងជើង Hokkaido ស្មើប្រមាណ៨ម៉ឺន៣ពាន់គីឡូម៉ែត្រការ៉េឯណោះ ឬស្មើប្រទេសអូទ្រីសមួយ ។ បច្ចុប្បន្ន វាស្មើ៤ម៉ឺន១ពាន់គីឡូម៉ែត្រការ៉េ ឬធំជាងកោះ Kyushu របស់ជប៉ុនតែបន្តិចប៉ុណ្ណោះ ។
ផ្ទះគ្មានម្ចាស់ក្នុងប្រទេសជប៉ុនមានដល់ប្រមាណ៨លានខ្នង ហើយភាគច្រើនត្រូវគេបោះបង់ចោលទាំងស្រុង ។ នៅពេលម្ចាស់ដី ឬផ្ទះទទួលមរណភាព វាពិតជាពិបាកណាស់ស្វែងរកសាច់ញាតិមកទទួលមរតកបន្ត ដើម្បីអាចរុះរើផ្ទះនោះបាន ។ មន្ត្រីជាប់ពាក់ព័ន្ធក្នុងតំបន់ ក៏ពិបាកប្រមូលពន្ធដែរ ដោយសារមិនដឹងពីអត្តសញ្ញាណម្ចាស់ដី ។
យោងតាមក្រុមប្រឹក្សា Tokyo Foundation ឲ្យដឹងថា រឿងម្ចាស់កម្មសិទ្ធិដីនេះបានក្លាយជាបញ្ហាមួយសម្រាប់ការសាងសង់តំបន់ Tohoku ឡើងវិញ បន្ទាប់ពីតំបន់នេះត្រូវកម្ទេចដោយរលកស៊ូណាមិ និងការរញ្ជួយដីនៅឆ្នាំ២០១១ ។
ផ្ទះបោះបង់ចោលអាចនឹងបង្កឲ្យមានអគ្គិភ័យទៀតផង ហើយសំរាម រុក្ខជាតិ និងការសឹករេចរឹលនឹងបង្កឲ្យមានហានិភ័យផ្នែកសុខភាព និងសុវត្ថិភាព ។
បើទោះជាផ្ទះមួយចំនួនមានអ្នកស្នងមរតកក្តី ប៉ុន្តែពួកគេមិនអាចលក់វាចេញបានទេ ខណៈអតិថិជនមិនចាប់អារម្មណ៍ ព្រោះផ្ទះទាំងនោះភាគច្រើនស្ថិតក្នុងតំបន់ជនបទ ឬក្រៅក្រុង មិនស័ក្តិសមសម្រាប់អតិថិជនក្មេងៗ ។ លើសពីនេះ ពលរដ្ឋជប៉ុនក៏ស្ទាក់ស្ទើរទិញផ្ទះតពីអ្នកដទៃផងដែរ ។
កាលពីឆ្នាំ២០១៥ រដ្ឋាភិបាលជប៉ុនបានចេញច្បាប់អនុញ្ញាតឲ្យអាជ្ញាធរក្នុងតំបន់ដាក់ទណ្ឌកម្មម្ចាស់ផ្ទះមិនព្រមរុះរើ ឬកែច្នៃផ្ទះឡើងវិញ ។
កាលពីថ្ងៃចន្ទ ក្រសួងដែនដីបានប្រកាសពីផែនការដំណាក់កាលដំបូង ដែលអនុញ្ញាតឲ្យប្រើប្រាស់អចលនទ្រព្យគ្មានម្ចាស់ទទួលស្គាល់រយៈពេល៥ឆ្នាំ ក្នុងគោលបំណងផ្សេងៗដូចជាកសិកម្មជាដើម ។
ក្រុមស្រាវជ្រាវខាងលើព្យាករថា ប្រទេសជប៉ុនបានខាតបង់ប្រាក់ប្រមាណ១,៦ប៊ីលានដុល្លារក្នុងឆ្នាំ២០១៦ ដោយសារអចលនទ្រព្យបោះបង់ចោលទាំងនេះ ហើយវាអាចនឹងកើនដល់២,៧២ប៊ីលានដុល្លារក្នុងឆ្នាំ២០៤០ ៕
ចែករំលែកព័តមាននេះ