ខេត្តស្វាយរៀង ៖ ក្រៅពីការងារស្រែចម្ការ ពលរដ្ឋមួយចំនួនរស់នៅក្នុងស្រុកពោធិ៍រៀង បាននាំគ្នាងាកមកចាប់មុខរបរថ្មីមួយ គឺដើរម៉ៅចម្ការស្វាយរបស់អ្នកស្រុកដើម្បីយកផលលក់ឲ្យឈ្មួញនាំចេញ ព្រោះមុខរបរនេះបានធ្វើឲ្យជីវភាពរបស់ពួកគាត់ប្រសើរឡើងពីមួយឆ្នាំទៅមួយឆ្នាំ ខណៈស្វាយកែវរមៀតកំពុងមានទីផ្សារនាំចេញ ។
កសិករឈ្មោះ ភឺន ដែលមានទីលំនៅក្នុងភូមិព្រែកឈ្មោះ ឃុំព្រែកតាសរ ស្រុកពោធិ៍រៀង បានឲ្យដឹងថា ក្រៅពីធ្វើស្រែចម្ការ លោកបានចាប់មុខរបរនេះរយៈពេល១០ឆ្នាំហើយ ។ មុខរបរមួយនេះ បានធ្វើឲ្យជីវភាពគ្រួសាររបស់លោកប្រសើរឡើងពីមួយឆ្នាំទៅមួយឆ្នាំ ដោយមិនចាំបាច់ចំណាកស្រុកទៅក្រៅប្រទេស ដូចគ្រួសារអ្នកដទៃឡើយ ។
លោកបន្តថា ៖« ទីផ្សារស្វាយកែវរមៀតឥឡូវកំពុងតែមានហាងឆេង ធ្វើឲ្យពលរដ្ឋនៅភូមិខ្ញុំនេះប្រមាណជាង៦០ទៅ៧០% ចាប់យករបរនេះ ។ ក្នុងនោះ មានទាំងអ្នកដាំស្វាយ បណ្ដុះកូនស្វាយលក់ អ្នកម៉ៅចម្ការ និងដើរទិញផ្លែស្វាយយកលក់ » ។ លោកថា ៖« សព្វថ្ងៃឈ្មួញមិនត្រឹមតែម៉ៅចម្ការក្នុងខេត្តព្រៃវែងទេ គឺបានទៅដល់ខេត្តកណ្ដាល, តំបន់មួយចំនួនក្នុងខេត្តកំពង់ស្ពឺ ដូចជា គីរីរម្យ ត្រែងតាយឹង, ខេត្តតាកែវ, បាត់ដំបង, ពោធិ៍សាត់, បន្ទាយមានជ័យ, សៀមរាប និងខេត្តកំពង់ចាម ជាដើម » ។
លោកបានបញ្ជាក់ថា ក្នុង១ហិកតា ឈ្មួញម៉ៅពីម្ចាស់ចម្ការជាមធ្យមក្នុងតម្លៃចាប់ពី២ពាន់ ទៅ៣ពាន់ដុល្លារសម្រាប់រយៈពេល១ឆ្នាំ ដោយគេមើលទៅតាមដីល្អ ឬមិនសូវល្អ និងមើលតាមដើមធំ ឬតូចផងដែរ ។
យ៉ាងណាលោកថា អ្នកម៉ៅមិនមែនចំណេញគ្រប់ពេលទេ ជួនខាត ជួនចំណេញ ពេលខ្លះអាចជួបផលលំបាកច្រើន បើសិនស្វាយធ្លាក់ថ្លៃ ឬពេលកំពុងថែទាំ ចំពេលភ្លៀងធ្លាក់ជោកជាំបណ្ដាលឲ្យខូចផ្កា ឬមានសត្វល្អិតជាដើម។ ទាំងនេះជាមូលហេតុបណ្ដាលឲ្យទទួលបានទិន្នផលតិច ហើយត្រូវចំណាយថ្លៃថ្នាំ និងការថែទាំច្រើន ប៉ុន្តែទោះជាមានផលលំបាកបែបនេះក្ដី បច្ចុប្បន្ន មានអ្នកចាប់មុខរបរនេះទទួលបានជោគជ័យច្រើន ។
ប្រភពពីក្រុមឈ្មួញដទៃទៀតបានឲ្យដឹងថា សម្រាប់ចម្ការនីមួយៗបន្ទាប់ពីម៉ៅបាន គេត្រូវការចំណាយលើថ្នាំ និងជី ព្រមទាំងកម្មករក្នុងការថែទាំ ទម្រាំបានទទួលផល ដែលជាមធ្យមក្នុង១ហិកតា ការចំណាយគឺចាប់ពី១.៥០០ទៅ២.០០០ដុល្លារពីលើថ្លៃម៉ៅចម្ការ ។ ដូចនេះ អ្នកម៉ៅចម្ការមានទំហំធំ ក៏ត្រូវចំណាយដើមទុនច្រើនទៅតាមនេះដែរ ។
ឈ្នួញដដែលបានបន្ដថា ក្នុង១ឆ្នាំ ពួកគេអាចទទួលផលបាន២លើក គឺស្វាយខុសរដូវ និងត្រូវរដូវ ដោយស្វាយខុសរដូវ ចាប់ទទួលផលនៅអំឡុងខែសីហា, កញ្ញា និងតុលា បើទោះជាបានផលតិចមែន ប៉ុន្តែតម្លៃខ្ពស់។ ជាធម្មតាពួកគេអាចលក់បានចាប់ពី១ពាន់ ទៅ២ពាន់រៀលក្នុង១គីឡូក្រាម ។ រីឯផ្លែស្វាយត្រូវរដូវប្រមូលផលបាននៅអំឡុងខែមេសា និងឧសភា ហើយតម្លៃ១គីឡូក្រាម លក់បានត្រឹមតែ៣០០ទៅ១ពាន់រៀលប៉ុណ្ណោះ ។ បើសរុបទិន្នផលទាំង២លើកសម្រាប់១ឆ្នាំ គឺបានផលចាប់ពី២៥ ទៅ៣៥តោនក្នុងទំហំដី១ហិកតា ។
ស្របពេលអ្នកដើរម៉ៅចម្ការមានចំនួនកាន់តែច្រើន ការប្រកួតប្រជែងនៅលើទីផ្សារមុខរបរមួយនេះ ក៏មានច្រើនដែរ ជាហេតុធ្វើឲ្យម្ចាស់ចម្ការខ្លះអាចរកប្រាក់បានក្នុង១ឆ្នាំ គឺខ្ទង់ម៉ឺនដុល្លារទៅតាមទំហំដីធំឬតូច ហើយម្ចាស់ចម្ការទាំងនោះ ក៏មិនជួបហានិភ័យដូចអ្នកដើរម៉ៅចម្ការដែរ ។
អ្នកស្រី សុន ម៉ៅ មានទីលំនៅក្នុងភូមិទួលពង្រ ឃុំស៊ីធរ ស្រុកខ្សាច់កណ្ដាល ខេត្តកណ្ដាល បានឲ្យដឹងថា អ្នកស្រីមានចម្ការស្វាយទំហំផ្ទៃដីជិត២ហិកតា ដោយក្នុង១ឆ្នាំ ម៉ៅឲ្យឈ្មួញបាន២.០០០ដុល្លារ ។ អ្នកស្រីបន្តថា ៖« បើចម្ការគេធំដល់ទៅ១០ឬ២០ហិកតា គេម៉ៅឲ្យឈ្មួញបានលុយខ្ទង់ម៉ឺនដុល្លារឯណោះក្នុង១ឆ្នាំ ។ ដូច្នេះ អ្នកមានដីច្រើន មិនគួរទុកឲ្យទំនេរទេ » ៕
ចែករំលែកព័តមាននេះ