រាជធានីភ្នំពេញ ៖ ស្ត្រីវ័យក្មេងម្នាក់ដែលមានសភាពស្លន់ស្លោ និងស្លេកស្លាំងយ៉ាងខ្លាំង បានកាន់កូនកាបូបតូចមួយរត់មកដាក់ពាក្យបណ្តឹងនៅនគរបាលប៉ុស្តិ៍ផ្សារដើមថ្កូវ ឲ្យជួយធ្វើអន្តរាគមន៍ ក្រោយពីរូបនាងបានដឹងថាខ្លួនចាញ់បោកគេ ដោយបានដោះកងដៃ ខ្សែក និងចិញ្ចៀនដែលមានតម្លៃចំនួនរហូតទៅដល់ជាង២ពាន់ដុល្លារ…
រាជធានីភ្នំពេញ ៖ ស្ត្រីវ័យក្មេងម្នាក់ដែលមានសភាពស្លន់ស្លោ និងស្លេកស្លាំងយ៉ាងខ្លាំង បានកាន់កូនកាបូបតូចមួយរត់មកដាក់ពាក្យបណ្តឹងនៅនគរបាលប៉ុស្តិ៍ផ្សារដើមថ្កូវ ឲ្យជួយធ្វើអន្តរាគមន៍ ក្រោយពីរូបនាងបានដឹងថាខ្លួនចាញ់បោកគេ ដោយបានដោះកងដៃ ខ្សែក និងចិញ្ចៀនដែលមានតម្លៃចំនួនរហូតទៅដល់ជាង២ពាន់ដុល្លារ ប្តូរយកគ្រាប់កង់ចំនួនមួយកូនកាបូបតូចនោះ ខណៈដែលនាងមករកទិញម្ហូបនៅផ្សារច្បារអំពៅ ហើយនាំនាងមកធ្វើការដោះដូរគ្នានៅខាងក្រោយសាលាបឋមសិក្សាបឹងត្របែក ។ ករណីនេះដែរ បានកើតឡើងកាលពីវេលម៉ោង០៩និង៣០នាទីព្រឹក ថ្ងៃទី២៦ ខែតុលា ឆ្នាំ២០១៧ នៅខាងមុខខ្លោងទ្វារសាលាបឋមសិក្សាបឹងត្របែកខាងត្បូងផ្លូវលេខ៤៣០ ក្នុងសង្កាត់ផ្សារដើមថ្កូវ ខណ្ឌចាំការមន ។
តាមប្រភពព័ត៌ពីនគរបាលបានប្រាប់ឱ្យដឹងថា ស្ត្រីរងគ្រោះមានឈ្មោះ ចន្ថា ធីតា អាយុ២៨ឆ្នាំ មុខរបរកម្មករសំណង់ ស្នាក់នៅការដ្ឋានសំណង់បុរីហាយធិច ក្នុងសង្កាត់និរោធ ខណ្ឌច្បារអំពៅ មានស្រុកកំណើតនៅស្រុកកំពង់លាវ ខេត្តព្រៃវែង ។ មុនពេលកើតហេតុ ស្ត្រីរងគ្រោះខាងលើបានឲ្យប្អូនប្រុសម្នាក់ឌុបនាងមករកទិញម្ហូបនៅផ្សារច្បារអំពៅ លុះទិញបានហើយ នាងក៏ឲ្យប្អូនប្រុសរូបនោះយកម្ហូបទៅមុន ហើយនាងក៏បានដើររកទិញកាបូបបន្តតែម្នាក់ឯង ។
តាមប្រភពដដែលបានប្រាប់បន្តទៀតថា ពេលដែលនាងកំពុងតែរើសកាបូបនោះ ក៏ស្រាប់តែលេចមុខស្ត្រី២នាក់មកប្រាប់នាងថា <<ពួកគេរើសបានមាសមួយកញ្ចប់>> យកមកបង្ហាញរូបនាង ហើយក៏បានធ្វើការបញ្ចុះបញ្ចូលនាងឲ្យឡើងជិះម៉ូតូមួយគ្រឿងទៅជាមួយពួកគេ លុះមកដល់ចំណុចខាងលើដែលជាកន្លែងស្ងាត់នោះ ។ ពួកគេក៏បានធ្វើការដោះដូរគ្នា ដោយក្រុមស្ត្រីជាជនសង្ស័យបានឲ្យកូនកាបូបពណ៌ឈាមជ្រូកចំនួនមួយ ហើយនាងក៏បានដោះកងដៃផ្លាកទីនចំនួន២១កង ខ្សែកផ្លាកទីន១ខ្សែ និងចិញ្ចៀនមាសទម្ងន់២ជី១វង់ ដែលមានតម្លៃសរុបរហូតទៅដល់ជាង២ពាន់ដុល្លារឯណ្ណោះ ។
ក្រោយពេលដែលពួកគេនាំគ្នាធ្វើការដោះដូរគ្នារួចហើយ ក្រុមស្ត្រីជាជនសង្ស័យទាំងពីរនាក់បានយកគ្រឿងអលង្ការដែលបាននោះនាំគ្នាគេចខ្លួនទៅបាត់អស់ ហើយនៅសល់តែម្នាក់់ឯងនាងក៏បានបើកកូនកាបូបនោះមើលទៅឃើញសុទ្ធតែគ្រាប់កង់នៅខាងក្នុង ទើបដឹងថាចាញ់បោកគេអស់គ្រឿងអលង្ការពីខ្លួនរលីងគ្មានសល់ និងទន់ដៃជើងស្លុតស្មារតីយ៉ាងខ្លាំង ។ ក្រោយពេលកើតហេតុ ស្ត្រីរងគ្រោះក៏បានកាន់កូនកាបូបដែលមានសុទ្ធតែគ្រាប់កង់នោះ យកមកកាន់នគរបាលប៉ុស្តិ៍ផ្សារដើមថ្កូវឲ្យជួយធ្វើអន្តរាគមន៍តាមចាប់ខ្លួនក្រុមស្ត្រីជាជនសង្ស័យទាំងពីរនាក់នោះ ដើម្បីជួយរកកងដៃ ខ្សែក និងចិញ្ចៀនរបស់នាងមកវិញផងដែរ តែហាក់បីដូចជាគ្មានសង្ឃឹមឡើយ ៕
ចែករំលែកព័តមាននេះ