ខេត្តត្បូងឃ្មុំ ៖ មានហេតុការណ៍ភ្ញាក់ផ្អើលទាំងព្រឹក ដោយលោកតាប្រកបរបរលក់ឱសថបុរាណម្នាក់ឈ្មោះ ញឹក ផា អាយុ៧៥ឆ្នាំ ជិះកង់ចេញពីផ្ទះ ដើម្បីទៅលក់ឱសថបុរាណ ប៉ុន្តែដោយសារមិនស្រួលខ្លួននោះ ក៏បណ្តាលធ្វើឲ្យសម្ពាធឈាមឡើងដួលផ្កាប់មុខទៅលើដី ។ ដែលបានកើតឡើងនៅវេលាម៉ោង០៧និង០៥នាទីព្រឹក ថ្ងៃទី២៦ ខែតុលា ឆ្នាំ២០១៧ ត្រង់ចំណុចភូមិភូមិវាលលិច ឃុំជីគរ ស្រុកត្បូងឃ្មុំ បន្ទាប់មកសមត្ថកិច្ចបានចុះមកពិនិត្យសពផងដែរ ។
លោកវរសេនីយ៍ត្រី សេង ម៉ិ អធិការរងនគរបាលស្រុកត្បូងឃ្មុំ ទទួលផែនព្រហ្មទណ្ឌប្រាប់ថា ដោយសារតែមិនទាន់ស្រួលខ្លួននៅឡើយ លោកតាវ័យ៧៥ឆ្នាំ បានជិះកង់ចេញពីផ្ទះ ដែលស្ថិតនៅភូមិវាលកើត ឃុំជីគរ នាព្រឹកថ្ងៃខាងលើ ស្របពេលដែលជិះបានចំងាយប្រហែលជាង១គីឡូម៉ែត្រ មកដល់ត្រង់ភូមិវាលលិចនោះ ស្រាប់តែសម្ពាធឈាមបានឡើង ដែលជាហេតុធ្វើឲ្យដួលកង់ ហើយលោកតាបានផ្កាប់មុខទៅនឹងដីលើកំណាត់ផ្លូវលំ ។
លោកវរសេនីយ៍ត្រី សេង ម៉ិ អធិការរងនគរបាលស្រុកត្បូងឃ្មុំ ប្រាប់បន្តថា ក្នុងពេលដែលដួលនោះធ្វើឲ្យក្មេងៗសិស្សសាលាដែលជិះកង់មករៀនតាមក្រោយ ឃើញក៏នាំគ្នាស្រែកហៅអ្នកភូមិឲ្យមកជួយរឹតទ្រូងដើម្បីសង្គ្រោះអាយុជីវិត ព្រមទាំងបានទូរស័ព្ទហៅរថយន្តសង្គ្រោះបន្ទាន់មករកដឹកដែរ ។ ប៉ុន្តែគ្រោះអកុសលលោកតាបានដាច់ខ្យល់ស្លាប់ បាត់បង់អាយុជីវិតទៅហើយ ប៉ុស្តិ៍រដ្ឋបាលមូលដ្ឋានបានមកត្រួតពិនិត្យសពលោកតាបន្ថែម ឃើញថាពិតជាបានស្លាប់ដោយសារតែសម្ពាធឡើងខ្លាំងធ្វើឲ្យគាំងបេះដូងស្លាប់ ។
ក្រោយពីបានពិនិត្យរួចរាល់នោះ សមត្ថកិច្ចបានជូនដំណឹងទៅសាច់ញាតិនៃសពឲ្យមកទទួលយកសពលោកតាទៅធ្វើបុណ្យតាមប្រពៃណីផងដែរ ។ សូមបញ្ជាក់ថា នាពេលកន្លងមក ពេលដែលលោកតាស្រួលខ្លួន គឺអ្នកភូមិតែងតែឃើញគាត់បានជិះកង់ឌុបឱសថបុរាណ ដើរលក់ចេញពីភូមិមួយទៅភូមិមួយក្នុងស្រុកត្បូងឃ្មុំ ជួនមានឆ្លងស្រុកក៏មានដែរ ដើម្បីយកប្រាក់ទៅដោះស្រាយជីវភាពគ្រួសារ ៕
ចែករំលែកព័តមាននេះ