ខេត្តកំពង់ចាម ៖ ផ្សារចំនួន៣ធំៗ ត្រូវបានប្រមុខដឹកនាំនៃរាជរដ្ឋាភិបាលកម្ពុជា ត្រូវបានដកហូតមកឲ្យស្ថិតនៅក្រោមការគ្រប់គ្រងរបស់រដ្ឋវិញវិញ ដោយនៅរសៀលថ្ងៃទី២៥ ខែតុលា ឆ្នាំ២០១៧ អាជីវករលក់ដូរនៅផ្សារបឹងកុក រាប់រយនាក់បាននាំគ្នាមកសាលាក្រុងកំពង់ចាម ដើម្បីត្រៀមបោះឆ្នោតជ្រើសរើសគណៈគ្រប់គ្រងអាជីវករផ្សារដែលគ្រោងនឹងធ្វើឡើងក្នុងពេលខាងមុខនេះ។ ដែលក្នុងនោះមានទី ១-ផ្សារធំក្រុងកំពង់ចាម ទី២-ផ្សារសាមគ្គី និងទី៣- ផ្សារបឹងកុក ។
អាជីវករផ្សារបឹងកុក លី ម៉ានី ភេទស្រី អាយុ៣៧ឆ្នាំ ប្រាប់ឲ្យដឹងថា កាលពីមុនៗមកគាត់លក់ដូរដាច់គ្រាន់បើ ចាប់តាំងពីពេលដែលបានប្រកបរបរលក់ដូរនៅផ្សារបឹងកុកនេះមកដល់សព្វថ្ងៃបានជាង១០ឆ្នាំហើយ ថវិការដែលលក់បាននោះ ត្រូវបានបែងចែកដោះស្រាយជីវភាពគ្រួសារ ។ អាជីវករផ្សារបឹងកុកប្រាប់បន្តថា ដោយរាល់ថ្ងៃត្រូវបង់ភាស៊ីម្តង១៥០០រៀល និងថ្លៃឆត្រ១ថ្ងៃ២០០០រៀល ហើយមកដល់ឆ្នាំ២០១៧នេះ ការលក់ដូរមិនដាច់ដូចកាលពីមុននោះទេ ។
ចំណែករូបគាត់ត្រូវបានគេជ្រើសតាំងជាគណៈកម្មការជីវករផ្សារបឹងកុកនានេះ គាត់មានក្តីសប្បាយរីករាយផង និងមិនសូវសប្បាយចិត្តផង មិនដឹងថាតើសកម្មភាពចាប់ពីដើមឆ្នាំ២០១៨ ទៅនឹងត្រូវដំណើរការយ៉ាងម៉េចនោះទេ ។ ការសម្រេចចិត្តរបស់ប្រមុខរាជរដ្ឋាភិបាលកម្ពុជា ដែលបានកាត់ផ្សារ បឹងកុក ពីការគ្រប់គ្រងដោយឯកជន មកស្ថិតនៅក្រោមការគ្រប់គ្រងរបស់រដ្ឋវិញពិតជាត្រឹមត្រូវ ។
លោកចាន់ ផល្លី អភិបាលក្រុងកំពង់ចាមវិញ មានប្រសាសន៍ឲ្យដឹងដែរថា ក្នុងនោះរូបលោកបានជ្រើសរើសគណៈកម្មការតំណាងមានចំនួន៣នាក់ ដោយមានទាំងព្រឹទ្ធាចារ្យម្នាក់ ដើម្បីរៀបចំការបោះឆ្នោតជ្រើសគណៈអាជីវករចំនួន៩នាក់ក្នុងពេលខាងមុខ ហើយផ្សារនេះត្រូវបានវិនិយោគទុនរយៈពេល១៨ឆ្នាំផងដែរ ។ ក្រោយពីការរៀបចំរួចរាល់នោះនឹងត្រូវបានអនុវត្តន៍ចាប់ពីថ្ងៃទី០១ ខែមករា ឆ្នាំ២០១៨ខាងមុខនេះហើយ បើពលរដ្ឋយកបន្លែបង្ការមកលក់ដូរដាក់តាមកញ្ច្រែង កញ្ចើ និងល្អី គឺមិនត្រូវយកភាស៊ីនោះទេ ។
គណៈគ្រប់គ្រងផ្សារត្រូវតែរៀបចំ ការយកភាស៊ីកង់ ម៉ូតូ អ្នកយាម អ្នកធ្វើអនាម័យផ្សារ ជួសជុលផ្សារ រៀបចំប្រព័ន្ធលូដែលស្ទះរួមនឹងផ្សេងៗទៀតជាច្រើនសម្រាប់លុយដែលប្រមូលបានមិនតម្រូវឲ្យមានបង់ចូលរដ្ឋដូចកាលពីមុនទៀតទេ ។ មុននឹងសម្រេចដាក់នៅក្រោមការគ្រប់របស់រដ្ឋវិញ គឺនឹងមានក្រុម ក្រសួងហិរញ្ញវត្ថុ នឹងចុះមកដោះស្រាយ ជាមួយនឹងម្ចាស់វិនិយោគផ្សារបឹងកុក ។ បងប្អូនអាជីវករទាំងអស់បានសម្តែងនូវការអបអរសាទរ ពេលដែលដឹងថាផ្សារទាំងនេះ ត្រូវបានស្ថិតនៅក្រោមការគ្រប់គ្រងរបស់រដ្ឋវិញ ៕
ចែករំលែកព័តមាននេះ