ខេត្តកំពង់ស្ពឺ ៖ ឈើធ្នង់មួយដើម ដែលមានអាយុកាលរាប់រយឆ្នាំមកហើយ និងមានមុខកាត់៥៩សង្ទីម៉ែត្រគុណ៥៥សង្ទីម៉ែត្រ វែងត្រង់ភ្លឹងទៅលើជាទីគយគន់ ដែលជាសម្បត្តិរបស់រដ្ឋនៅក្នុងសាលាបឋមសិក្សាបន្ទាប់ ស្ថិតក្នុងឃុំមហាសាំង ស្រុកភ្នំស្រួច បានត្រូវក្រុមចោរឈ្មួញឈើលួចអារផ្ដួលរំលំកាត់យកមួយកំណាត់ខាងគល់ទៅបាត់ ដោយបន្សល់នៅនឹងកន្លែងតែស្លាកស្នាមគល់នៅជាប់ដី និងចុងតែប៉ុណ្ណោះ ។
ករណីក្រុមចោរលួចកាត់យកដើមធ្នង់នេះកើតឡើងកាលពីពាក់កណ្តាលអធ្រាត្រយប់ថ្ងៃទី២៤ ខែតុលា ។ លោកអនុសេនីយ៍ត្រី ហង្ស សាវ៉ុន នាយរងប៉ុស្ដិ៍នគរបាលមហាសាំង បានឱ្យដឹងតាមទូរស័ព្ទថា ករណីក្រុមចោរលួចកាត់យកដើមធ្នង់នេះពិតជាកើតមានមែន ហើយព័ត៌មាននេះលោកទទួលបានពីខាងគណៈគ្រប់គ្រងសាលាដែលបានរាយការណ៍មករូបលោក កាលពីព្រឹកថ្ងៃ២៤ តុលា ។
លោកនាយរងប៉ុស្ដិ៍បន្តថា ក្រោយពីទទួលបានសេចក្តីរាយការណ៍ភ្លាម សមត្ថកិច្ចបានចុះស្រាវជ្រាវនិងសាកសួរលោកគ្រូអ្នកគ្រូមួយចំនួន អំពីករណីក្រុមចោរលួចកាត់ដើមធ្នង់នេះ ។តាមការស្រាវជ្រាវ សមត្ថកិច្ចបានទទួលពន្លឺខ្លះហើយ បន្ទាប់ពីមានសេចក្ដីបំភ្លឺថា មុនពេលមានក្រុមចោរមកលួចកាត់យកដើមធ្នង់នេះ គឺមានមនុស្សមួយក្រុមបានមកទាក់ទងលោកនាយកសាលាដើម្បីសុំទិញដើមធ្នង់នេះ តែត្រូវលោកនាយកសាលាបដិសេធមិនព្រមលក់ឱ្យឡើយ ។ ក្រោយពីលោកនាយកសាលាបដិសេធ ក្រុមជនទាំងនោះក៏ត្រឡប់ទៅវិញអស់ទៅ ហើយក្រុមមនុស្សទាំងនោះត្រូវគេដឹងថា ជាឈ្មួញរកស៊ីឈើនៅស្រុកភ្នំស្រួចនេះតែម្តង ពួកគេជាឧក្រិដ្ឋជនព្រៃឈើ ។
លោកនាយរងសាលាមួយរូបឱ្យដឹងថា នៅយប់កើតហេតុពេលភ្លៀងកំពុងធ្លាក់ខ្លាំងលាយឡំដោយផ្គរន្ទះ កម្លាំងល្បាតបានចូលជ្រករកកន្លែងសម្រាករៀងៗខ្លួន ទើបជាឱកាសសម្រាប់់ក្រុមឈ្មួញធ្វើសកម្មភាពបានដោយងាយ ។តាមការពិនិត្យជាក់ស្តែង ក្រុមឈ្មួញមានគ្នាចាប់ពី៨នាក់ទៅ១០នាក់ ព្រោះបើមានគ្នាតិចមិនអាចលើកដើមធ្នង់នេះដាក់រថយន្តបានឡើយ ឬមានរថយន្តស្ទូចមកជាមួយ ។
មហាជនក៏ដូចជាប្រជាពលរដ្ឋរស់នៅក្នុងមូលដ្ឋានខាងលើ បានសំណូមពរដល់សមត្ថកិច្ចធ្វើយ៉ាងណាតាមចាប់ក្រុមចោរលួចកាត់ដើមធ្នង់ដែលជាសម្បត្តិរបស់រដ្ឋនេះ យកមកផ្តន្ទាទោសឱ្យបាន កុំឱ្យពួកគេមានឱកាសបំផ្លាញធនធានធម្មជាតិបានតទៅទៀត ។ មានការលើកឡើងផងដែរថា បើយោងតាមការបំភ្លឺរបស់លោក សុខ សាន ដែលជានាយកសាលាខាងលើ គឺក្រុមចោរប្រាកដជាត្រូវចាប់ខ្លួនបានជាក់ជាមិនខានឡើយ ។ ជាងនេះទៅទៀត ក្រុមចោរដែលជាឈ្មួញទាំងនេះ មើលទៅមិនមែនអ្នកស្រុកមកពីឆ្ងាយនោះទេ ។
បើទោះជាមានការលើកឡើងបែបនេះក្តីក៏មិនទាន់ប្រាកដថា ក្រុមចោរក្នុងស្រុកឬក្រៅស្រុកនៅឡើយដែរ ដែលធ្វើសកម្មភាពនេះលុះត្រាតែសមត្ថកិច្ចស្រាវជ្រាវចាប់ជនល្មើសបាន ទើបការពិតត្រូវបានលាតត្រដាង ។សិស្សានុសិស្សជាច្រើននាក់ បានសម្តែងនូវការសោកស្តាយ ចំពោះការបាត់បង់ដើមធ្នង់មួយដើមនេះជាខ្លាំង ដោយលើកឡើងថា ពួកគេតែងបានឃើញដើមធ្នង់ដ៏ធំនេះគ្រប់ពេលដែលពួកគេទៅសាលា រៀន។ ចាប់ពីពេលនេះទៅពួកគេលែងបានឃើញដើមធ្នង់នេះទៀតហើយ និងកុំថាឡើយបានឃើញ សូម្បីតែម្លប់ដែលពួកគេធ្លាប់ជ្រកក៏មិនមានដូចមុនដែរ ។ ពួកគេមានការសោកស្តាយខ្លាំងណាស់ តែមិនដឹងធ្វើម៉េចបើក្រុមចោរលួចយកទៅបាត់អស់់ទៅហើយនោះ ធ្វើឱ្យសិស្សានុសិស្ស មានអារម្មណ៍មិនល្អឡើយ ។សមត្ថកិច្ចនគរបាលជំនាញបានប្រាប់ថា ករណីឈ្មួញដែលជាក្រុមចោរលួចកាត់ដើមធ្នង់នេះគឺមានពន្លឺខ្លះហើយ ដែលពេលនេះសមត្ថកិច្ចជំនាញកំពុងតាមចាប់ខ្លួនដើម្បីយកមកប្រគល់ឱ្យច្បាប់វិនិច្ឆ័យទោស ។
មតិនានានិយាយថា ឈើធំៗ នៅភ្នំឱរ៉ាល់ ឈ្មួញកាប់អារដឹកយកទៅលក់នៅស្រុកយួនរាប់ឆ្នាំមកហើយ ចាប់បានតែប្រាក់និងខ្យល់។ ដូច្នេះមិនសង្ឃឹមថា ឈើមួយដើមនេះ អាចស្វែងរកមុខឃើញឡើយ ដែលសង្ស័យថា ចាប់បានអាចុចៗ និងខ្យល់ក៏មិនដឹងដែរ…ចាំមើលទៀត… ៕
ចែករំលែកព័តមាននេះ