ខេត្តកំពង់ចាម ៖ ក្រោមការយកចិត្តទុកដាក់របស់អាជ្ញាធរគ្រប់លំដាប់ថ្នាក់បានរៀបចំដាក់អំពូលភ្លើងនៅតាមផ្លូវក្នុងក្រុងកំពង់ចាមព្រមទាំងផ្លូវមួយចំនួនដូចជាផ្លូវទំនប់ព្រែកដើមចាន់ និងភូមិបឹងបាសាក់ដែលមិនទាន់បានដាក់អំពូលភ្លើងបំភ្លឺផ្លូវ ។ ត្រូវបានប្រជាពលរដ្ឋស្នើសុំឲ្យលោកអភិបាលក្រុងកំពង់ចាមជួយរៀបចំដាក់ដើម្បីងាយស្រួល ក្នុងការធ្វើដំណើរនៅពេលយប់ ។
លោក ចាន់ ផាត អាយុ៥៦ឆ្នាំ នៅភូមិព្រែកដើមចាន់ សង្កាត់សំបួរមាស ក្រុងកំពង់ចាម ប្រាប់ឲ្យដឹងនៅព្រឹកថ្ងៃទី២៥ ខែតុលា ឆ្នាំ២០១៧ ថាពីមុនផ្លូវមុខផ្ទះគាត់ជាប្រភេទផ្លូវលំដីក្នុងពេលដែលធ្វើដំណើរតាមម៉ូតូរថយន្តត្រូវជួបការលំបាក ដោយសារតែមានជង្ហុកតូចធំនោះ ។ តែក្រោយមកត្រូវបានអាជ្ញាធរបានរៀបចំចាក់កៅស៊ូក្នុងឆ្នាំ២០១៦ ចាប់ពីត្រង់ចំនុចស្ពានព្រែកដើមចាន់ដល់ទៅភូមិបឹងបាសាក់ ព្រមទាំងមានដាក់បង្គោលភ្លើងនៅតាមដងផ្លូវថែមទៀតផង។
លោក ចាន់ ផាត ប្រាប់បន្តថា អ្នកភូមិរបស់គាត់និងភូមិផ្សេងទៀតបាននាំគ្នាទៅធ្វើការជាកម្មករកម្មការិនីរោងចក្រកាត់ដេរសម្លៀកបំពាក់នៅស្រុកកំពង់សៀម ហើយនូវពេលដែលយប់ៗបាននាំគា្នចេញត្រឡប់មកផ្ទះវិញតាមផ្លូវទំនប់ព្រែកដើមចាន់ ចំណែកសិស្សពេលចេញពីរៀនក៏ងងឹត ពិបាកនឹងធ្វើដំណើរដែរ ។ ជាមួយនោះស្នើសុំឲ្យលោកអភិបាលក្រុងកំពង់ចាម មេត្តាជួយរៀបចំដាក់អំពូលបំភ្លឺនៅពេលយប់ៗឲ្យបានឆាប់រហ័សកាន់តែប្រសើរ ហើយមួយផ្នែកទៀតក៏បានជួយកាត់បន្ថយ គ្រោះថ្នាក់ចរាចរណ៏តាមដងផ្លូវមុខផ្ទះគាត់នោះនឹងជាក្តីកង្វល់ទៀតដែរ ៕
ចែករំលែកព័តមាននេះ