ខេត្តក្រចេះ ៖ ក្រុមរថយន្តសាំយ៉ុងដឹកឈើផ្តាច់ព្រលឹងយ៉ាងហោច៥គ្រឿង និងមនុស្ស២នាក់ ត្រូវបានសមត្ថកិច្ចចាប់ឃាត់ខ្លួន ក្រោយពីក្រុមរថយន្តដឹកឈើទាំងនេះបានធ្វើសកម្ម ភាពបំបិទផ្លូវជាតិក្នុងខេត្តមួយកន្លែងបណ្តាលឲ្យស្ទះចរាចរណ៍ ហើយពួកគេប្រដាប់ដោយដាវកាំបិត ដំបង និងដបសាំងបម្រុងបង្កហិង្សាមកលើសមត្ថកិច្ចទៀតផង។ ក្រុមរថយន្តដឹកឈើសាំយ៉ុង ដែលគេរាយការណ៍មានចំនួនរាប់សិបគ្រឿង សព្វថ្ងៃកំពុងតែបង្កើនការដឹកជញ្ជូនឈើជាប្រភេទគ្រឿងផ្ទះ វែងខ្លី ចេញពីឃុំគ្រៀង ស្រុកសម្បូរ ខេត្តក្រចេះ នាំយកទៅលក់នៅតាមដេប៉ូនៅខេត្តភាគខាងក្រោម។ ជាមួយនឹងការដឹកជញ្ជូនរថយន្តដឹកឈើដែលបានបើកបរល្បឿនផ្តាច់ព្រលឹង បាននឹងកំពុងតែមាន បង្កភាពអនាធិបតេយ្យយ៉ាងខ្លាំងនៅលើផ្លូវជាតិនានាក្នុងខេត្ត។
នាពេលកន្លងមកសកម្មភាពរបស់ពួកគេ ក្រៅពីបើកបោះពួយលឿនៗជាខ្សែៗ និងធ្លាប់បង្កគ្រោះថ្នាក់ដល់គេឯងជាញឹកញាប់ ក្រុមរថយន្ត ទាំងនោះថែមទាំងបានបង្កភាពអនាធិបតេយ្យធ្ងន់ធ្ងរលើផ្លូវជាតិ ដោយការរើឈើទម្លាក់ចោលជ្រុះរាយ ប៉ាយពេញផ្លូវប៉ះពាល់ដល់ចរាចរណ៍ ដោយសារតែគេចពីការស្ទាក់ចាប់របស់សមត្ថកិច្ច។ ហើយការបង្ក្រាប បើទោះជាមានការធ្លាប់ចាប់ឃាត់បានជាបន្តបន្ទាប់យ៉ាងណាក្តី ក៏ក្រុម រថយន្តទាំងនោះនៅមិនរាងចាលថែមទាំងបង្កើនការដឹកជញ្ជូន។ សមត្ថកិច្ចនិយាយថា ការបង្ក្រាបរបស់ក្រុមសមត្ថកិច្ចក្រោមការដឹកនាំពីលោក ជា សុភ័ក្ក្រ ព្រះរាជអាជ្ញាររងខេត្ត បានចុះទៅចាប់ឃាត់បានក្រុមរថយន្តទាំងនេះបានចំនួន៥គ្រឿង កាលពីយប់ថ្ងៃទី២៣ ខែតុលា ខណៈដែលពួកគេបានធ្វើសកម្មភាពដាក់រថយន្តបំបិទផ្លូវជាតិបណ្តាលឲ្យស្ទះចរាចរណ៍ជាងកន្លះម៉ោង ដោយសារតែរថយន្តរបស់ពួកគេខូចមួយគ្រឿង ហើយពួកគេបានប្រមូលរថយន្តដឹកឈើជាច្រើនគ្រឿង មកដាក់បិទផ្លូវកុំឲ្យសមត្ថកិច្ចចូលទៅបង្ក្រាបបាន។
សមត្ថកិច្ចនិយាយថា ក្រុមជនជាម្ចាស់រថយន្ត២នាក់ និងរថយន្តដឹកឈើ៥គ្រឿងត្រូវបានចាប់បង្ក្រាបនៅពេលដែលពួកគេបានបើករត់គេច និងទុករថយន្តចោល ហើយគេចខ្លួន។ ជនទាំងពីរនាក់ដែលជាម្ចាស់រថយន្ត និងត្រូវបានចាប់ខ្លួនមានទីលំនៅខេត្តត្បូងឃ្មុំ។ ព្រះរាជអាជ្ញាររងអមសាលាដំបូងខេត្ត លោក ជា សុភ័ក្ក្រ ដែលបានដឹកនាំកម្លាំងបង្ក្រាប បានប្រាប់ឲ្យដឹងថា ក្រុមជនជាអ្នកបើករថយន្តដឹកឈើបានព្យាយាមរារាំងសមត្ថកិច្ចនៅពេល ចុះទៅបង្ក្រាប ដោយពួកគេប្រដាប់ដោយកាំបិត ដាវ ដំបង និងដបសាំង បម្រុងបង្កហិង្សា។ លោកព្រះរាជអាជ្ញាររងបានបញ្ជាក់ថា ក្រុមរថយន្តដឹកឈើ បានធ្វើសកម្មភាពយកឡាន ដឹកឈើទាំង៥គ្រឿងនោះមកដាក់បិទផ្លូវបណ្តាលឲ្យស្ទះចរាចរណ៍ជាងកន្លះម៉ោង ទើបសមត្ថ កិច្ចចុះទៅចាប់បំបែកក្រុមរថយន្តទាំងនោះបាន៕
ចែករំលែកព័តមាននេះ