ខេត្តកំពត ៖ នៅពេលអ្នកផលិតអំបិលកំពុងតែចាប់ផ្ដើមក្រុងទឹក (ទប់ទឹក) សម្រាប់ប្រមូលផលអំបិល ពួកគេមានក្ដីរំពឹងថា តម្លៃអំបិលឆ្នាំនេះនឹងថ្លៃជាងឆ្នាំមុនៗ ខណៈពេលសហគមន៍កំពុងតែមានគម្រោងបង្កើតអំបិលប្រភេទថ្មីឈ្មោះថា «ផ្កាអំបិល» ។
លោក សូ ផាន ម្ចាស់ស្រែអំបិលនៅខេត្តកំពត ដែលបានចូលជាសមាជិកសហគមន៍អ្នកផលិតអំបិលកំពត-កែប បានឲ្យដឹងថា ក្នុង១ឆ្នាំ លោកអាចនាំចេញបាន១ម៉ឺន៥ពាន់បាវ ដោយក្នុង១គីឡូក្រាម តម្លៃតែ៥០០រៀលប៉ុណ្ណោះ ។
លោកថា ៖« មកដល់សព្វថ្ងៃនេះ អ្នកធ្វើស្រែអំបិលនៅខេត្តកំពតសឹងតែឈប់អស់ហើយ ដោយសារតែតម្លៃអំបិលថោកពេក ព្រោះខាងសហគមន៍គ្មានទីផ្សារនាំចេញទៅក្រៅប្រទេស ហើយថែមទាំងមានក្រុមហ៊ុននាំចូលពីក្រៅទៀត ដែលធ្វើឲ្យអ្នកផលិតអំបិលមួយចំនួនបោះបង់ចោលនូវការងារមួយនេះ ប៉ុន្តែខ្ញុំមិនបោះបង់ទេ ព្រោះសព្វថ្ងៃនេះ ខ្ញុំមានស្រែអំបិលចំនួន២០ហិកតា ដែលអាចជួយផ្គត់ផ្គង់គ្រួសារបានមួយកម្រិត » ។
លោក សូ ផាន បានបន្តថា សម្រាប់ឆ្នាំនេះ លោករំពឹងថា អំបិលនឹងឡើងថ្លៃជាងឆ្នាំមុនៗ បន្ទាប់ពីសហគមន៍មានគម្រោងបង្កើតផលិតផលអំបិលថ្មី គឺ «ផ្កាអំបិល» ដែលអាចនាំចេញទៅក្រៅប្រទេសបាន និងមានតម្លៃថ្លៃ ហើយថែមទាំងមានអនាម័យទៀតផង ។
ចំណែកអ្នកផលិតអំបិលនៅភូមិសុវណ្ណសាគរ សង្កាត់កំពង់កណ្ដាល ក្រុងកំពត បានបញ្ជាក់ថា ៖« ឆ្នាំនេះ អំបិលឡើងថ្លៃជាងឆ្នាំមុន ដោយ១គីឡូក្រាមតម្លៃ៧០០ទៅ៨០០រៀល បើធៀបនឹងឆ្នាំមុនៗ មានតម្លៃត្រឹមតែ៤០០ទៅ៥០០រៀលប៉ុណ្ណោះ » ។
លោក ខាត់ សាមឿន បន្តថា ទោះបីតម្លៃឡើងថ្លៃក៏ពិតមែន ប៉ុន្តែបញ្ហាប្រឈម និងការចំណាយក៏ច្រើនដែរសម្រាប់ការប្រមូលផលម្ដងៗ ដូចជា ចំណាយលើមេការ ក្នុង១ខែ៦០ម៉ឺនរៀល និងកម្មករ ដែលអ្នកខ្លះម៉ៅគិតជារថយន្ដ ឬគិតជាស្រែ ជាដើម ប៉ុន្តែមកដល់ឥឡូវនេះ គឺមិនសូវមានកម្មករប៉ុន្មានទេ ព្រោះការងារមួយនេះវាទទួលកម្រៃមិនសូវបានច្រើនដូចការងារផ្សេង និងត្រូវហាលភ្លៀង ហាលក្ដៅជារៀងរាល់ថ្ងៃ ។
បើតាមការឲ្យដឹងរបស់តំណាងសហគមន៍អ្នកផលិតអំបិលកំពត-កែប ដែលជាទីតាំងផលិតអំបិលតែមួយគត់សម្រាប់ផ្គត់ផ្គង់ទីផ្សារក្នុងស្រុកបានលើកឡើងថា ឆ្នាំនេះ ទិន្នផលអំបិលធ្លាក់ចុះ ស្របពេលដែលតម្លៃកើនឡើងជាងឆ្នាំមុនៗ ។
លោក អ៊ុំ ឈុន ប្រធានការិយាល័យរដ្ឋបាលសហគមន៍អ្នកផលិតអំបិលខេត្តកំពត-កែប បានលើកឡើងថា ៖« សម្រាប់ចុងឆ្នាំ២០១៧នេះ ខាងសហគមន៍យើងបាននាំចេញអំបិលចំនួន៣ម៉ឺន៥ពាន់តោន បើធៀបនឹងឆ្នាំមុនបានចំនួន១៦ទៅ១៨ម៉ឺនតោន ។ ចំណែកតម្លៃអំបិលក្នុង១បាវមានចំនួន៥០គីឡូ គឺលក់ចេញបាន១៤.៦០០រៀល ខុសពីឆ្នាំមុន ដែលខាងសហគមន៍លក់ចេញបានតែ១២.៦០០រៀលប៉ុណ្ណោះ » ។
លោក អ៊ុំ ឈុន បានបង្ហើបប្រាប់ថា ក្នុងឆ្នាំ២០១៧នេះ សហគមន៍កំពុងផលិតអំបិលប្រភេទថ្មីឈ្មោះថា «ផ្កាអំបិល» ប៉ុន្តែមិនទាន់បានប្រមូលផលនៅឡើយទេ ។
ផ្កាអំបិល ជាផលិតផលអំបិលមួយប្រភេទ ដែលមានគុណភាពខ្ពស់ លើសពីអំបិលធម្មតា សម្រាប់បំពេញតម្រូវការទីផ្សារក្នុងស្រុក និងបើសិនជាអាច សហគមន៍នឹងនាំចេញទៅក្រៅប្រទេសបន្ថែមទៀត ។ ក្នុងរយៈពេល៣ខែនេះ សហគមន៍ម្រេចកំពតបាននាំចេញអំបិលចំនួន១៨តោនទៅប្រទេសបារាំង ។
បើតាមទីប្រឹក្សាទំនាក់ទំនងនៃសហគមន៍ផលិតអំបិលខេត្តកំពត លោក ប៊ុន យោង ឱ្យដឹងថា សម្រាប់ផលិតផលផ្កាអំបិលដែលកសិករផលិតបាន មិនទាន់មានទីផ្សារទូលំទូលាយទេនៅក្នុងស្រុក ប៉ុន្តែកន្លងមក គឺបាននាំចេញមួយចំនួនទៅកាន់ទីផ្សារសហគមន៍អឺរ៉ុប ដូចជា អង់គ្លេស និងស្វ៊ីសជាដើម ។ យ៉ាងណាក៏ដោយ ការនាំចេញនេះមិនទាន់មានឈ្មោះជាផ្លូវការនៅឡើយទេ គឺភ្ជាប់ជាមួយម្រេចខេត្តកំពត ដែលជាផលិតផលចុះបញ្ជីរួចហើយនៅក្នុងក្រសួងពាណិជ្ជកម្មកម្ពុជា ។
លោកលើកឡើងថា ផ្កាអំបិលជាផលិតផលកម្រ និងមិនងាយទទួលបានទេសម្រាប់អ្នកផលិតអំបិលទាំងអស់ លុះត្រាតែអាកាសធាតុអំណោយផល ក្តៅ និងមានខ្យល់ខ្លាំង ។ លោកថា ៖ « អំបិលធម្មតាដុះនៅលើដី តែសម្រាប់ផ្កាអំបិល វាដុះនៅលើទឹក ។ អីចឹងហើយ អ្នកផលិតត្រូវដងវាចេញពីទឹកយកទៅហាលឱ្យស្ងួត ទើបគេហៅថា ផ្កាអំបិល »។
គួររំឭកថា នៅក្នុងពិធីជួបសំណេះសំណាលជាមួយមន្ត្រីនៃមន្ទីរពាណិជ្ជកម្ម និងសាខាកាំកុងត្រូលខេត្តកែប កាលពីចុងខែធ្នូឆ្នាំមុន លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានលើកឡើងថា ក្រសួងពាណិជ្ជកម្មកំពុងពិនិត្យលទ្ធភាពដាក់ផ្កាអំបិលខេត្តកែប ទៅជាម៉ាកទំនិញសម្គាល់ភូមិសាស្ត្រសម្រាប់ខេត្តកែប ដោយសារតែខេត្តនេះជាប្រភពនៃអំបិលធម្មជាតិមិនចេះរីងស្ងួត ។
លោករដ្ឋមន្ត្រីបានបញ្ជាក់ថា ៖ « អំបិល ជាគូនឹងម្រេច ដូច្នេះ ចក្ខុវិស័យរបស់យើង គឺជួយឲ្យខេត្តកែបមានទំនិញសម្គាល់ភូមិសាស្ត្រមួយដូចខេត្តកំពតដែរ ហើយយើងកំពុងសិក្សាលើផ្កាអំបិល ដោយសារតែមានប្រទេសជាច្រើនកំពុងចាប់អារម្មណ៍លើផលិតផលមួយនេះ » ។
លោកថា ប្រសិនបើគោលដៅនេះបានសម្រេច វានឹងធ្វើឲ្យខេត្តនេះកាន់តែមានភាពទាក់ទាញចំពោះវិនិយោគិន និងភ្ញៀវទេសចរដែលនឹងជួយបង្កើតឱកាសការងារ និងប្រាក់ចំណូលយ៉ាងច្រើនសម្រាប់ប្រជាពលរដ្ឋ ៕
ចែករំលែកព័តមាននេះ