«Express» បានផ្សាយពីរឿងរ៉ាវអតីតកាលនៅឆ្នាំ១៩៩០ ជាហេតុការណ៍ដែលអាកាសយានិករបស់ក្រុមហ៊ុនអាកាសចរណ៍ «ប្រ៊ីតធី អ៊ែរវ៉េ» ត្រូវខ្យល់ស្រូបប៉ើងចេញតាមបង្អួចយន្តហោះ សំណាងល្អត្រូវមិត្តរួមការងារចាប់ទាញទាន់ពេលវេលា រួចផុតពីសេចក្តីស្លាប់ ។ ព្រឹត្តិការណ៍នោះកើតឡើងកាលពី២៧ឆ្នាំមុនហើយត្រូវបានបង្ហាញតាមអីុនធើរណេតជាថ្មី…
«Express» បានផ្សាយពីរឿងរ៉ាវអតីតកាលនៅឆ្នាំ១៩៩០ ជាហេតុការណ៍ដែលអាកាសយានិករបស់ក្រុមហ៊ុនអាកាសចរណ៍ «ប្រ៊ីតធី អ៊ែរវ៉េ» ត្រូវខ្យល់ស្រូបប៉ើងចេញតាមបង្អួចយន្តហោះ សំណាងល្អត្រូវមិត្តរួមការងារចាប់ទាញទាន់ពេលវេលា រួចផុតពីសេចក្តីស្លាប់ ។
ព្រឹត្តិការណ៍នោះកើតឡើងកាលពី២៧ឆ្នាំមុនហើយត្រូវបានបង្ហាញតាមអីុនធើរណេតជាថ្មី ធ្វើឱ្យរឿងរ៉ាវដ៏គួរឱ្យរន្ធត់កាលពីមុនមួយនេះកំពុងស្ថិតក្នុងចំណាប់អារម្មណ៍មហាជន ។
របាយការណ៍បង្ហាញថា ផ្ទាំងកញ្ចក់បង្អួចត្រូវបានបិទភ្ជាប់មិនត្រឹមត្រូវក្នុងពេលជួសជុល ដោយប្រើខ្ចៅខុសទំហំ ជាហេតុបណ្តាលឱ្យកញ្ចក់របូតចេញពីយន្តហោះ ខណៈពេលកំពុងហោះហើរក្នុងរយៈកម្ពស់ប្រហែល៥ពាន់ម៉ែត្រ ។
លោកកាពីទែនTim Lancasterកាលនោះមានអាយុ៤២ឆ្នាំបានប៉ើងចេញតាមបង្អួច ខណៈពេលបន្ទប់អាកាសយានិកបាត់បង់សម្ពាធ ប៉ុន្តែជីវិតរបស់លោកមានសំណាងរួចផុតពីគ្រោះថ្នាក់ ដោយសារអាកាសយានិកម្នាក់ទៀតលោកNigel Ogdenបានចាប់ទាញជើងរបស់លោកទាន់ពេល មិនឱ្យប៉ើងធ្លាក់ពីលើយន្តហោះ។
ហេតុការណ៍ដ៏រន្ធត់នោះបានចំណាយពេលប្រហែល២២នាទី និងបញ្ចប់ដោយការចុះចតបន្ទាន់នៅអាកាសយានដ្ឋានសៅថែមតុន ។ លោកLancasterត្រូវយកទៅសង្គ្រោះបន្ទាន់នៅមន្ទីរពេទ្យ ក្រោយពេលសន្លប់ ។
លោកTim Lancasterបានរងរបួសត្រង់ឆ្អឹងដៃស្តាំ មេដៃខាងឆ្វេង និងកដៃខាងស្តាំបាក់ រួមទាំងរបួសដោយអាកាសធាតុត្រជាក់ ។
រីឯលោកOgdenរងរបួសត្រង់ស្មា រួមទាំងមុខ និងភ្នែកដោយទទួលអាកាសធាតុត្រជាក់តម្រូវឱ្យលោកត្រូវចូលនិវត្តន៍ក្នុងឆ្នាំ២០០១ ។
តាមការស៊ើបអង្កេតពីហេតុការណ៍នោះឃើញថា វិស្វករបានប្រើខ្ចៅទំហំតូចធ្វើឱ្យរបូតចេញក្នុងពេលប្រឈមមុខនឹងសម្ពាធអាកាសធាតុ ។ បន្ទាប់ពីពេលនោះមក ក្រុមហ៊ុនអាកាសចរណ៍«ប្រ៊ីតធី អ៊ែរវ៉េ»បានផ្លាស់ប្តូរខ្ចៅបង្អួចវិញ ៕
ចែករំលែកព័តមាននេះ