ខេត្តស្វាយរៀង ៖ កាលពីថ្ងៃទី២៥ កញ្ញា វេលាម៉ោង៧និង២៥នាទីព្រឹក មន្ត្រីនគរបាលប៉ុស្តិ៍រដ្ឋបាលឃុំបុសមន សហការជាមួយកងរាជអាវុធហត្ថស្រុករំដួលបានធ្វើការឃាត់រថយន្តយីឌុបមួយគ្រឿងពាក់ស្លាកលេខស្វាយរៀង 3A-0408 ដែលបានដឹកដើមដូងប្រេងចំនួន១៥ដើមយ៉ាងសំពីងសំពោងតាមផ្លូវជាតិលេខ១៣ ក្រុងស្វាយរៀង ឆ្ពោះទៅស្រុករមាសហែក ។ លុះដល់ចំណុចថ្នល់កែងភូមិសង្កែ ក៏បត់តាមផ្លូវថ្នល់កៅស៊ូដែលទើបសាងសង់ថ្មីឆ្ពោះទៅកាន់ប៉ុស្តិ៍ច្រកទ្វារព្រំដែនកម្ពុជា-វៀតណាម ច្រកទ្វារទ្វេភាគីបុសមន ឃុំបុសមន ស្រុករំដួល ។
ទាក់ទិនករណីខាងលើនេះ លោកអនុសេនីយ៍ទោ សុខ ម៉ៅ នាយប៉ុស្តិ៍រដ្ឋបាលឃុំបុសមន បានប្រាប់ឱ្យដឹងថា ការឃាត់រថយន្តដឹកដើមដូងប្រេងនេះ ធ្វើឡើងតាមបទបញ្ជារបស់លោកអធិការនគរបាលស្រុករំដួល ដោយសារឃើញរថយន្តនេះដឹកដើមដូងប្រេងសំពីងសំពោងឆ្លងកាត់តាមផ្លូវកៅស៊ូទើបស្ថាបនាថ្មីឆ្ពោះទៅព្រំដែនកម្ពុជា-វៀតណាម និងផ្ទុកលើសទំងន់អតិបរមានាំឱ្យខូចផ្លូវថ្នល់ ។ ក្រុមហ៊ុនធ្វើផ្លូវនេះបានសុំឱ្យសមត្ថកិច្ចសហការថែទាំ ដូច្នេះទើបលោកអធិការបញ្ជាឱ្យឃាត់រថយន្តនេះរួចអញ្ជើញអ្នកបើកបរមកធ្វើការអប់រំ និងធ្វើកិច្ចសន្យាឱ្យឈប់ដឹកទំនិញលើសទំងន់អតិបរមាទៀត ។ កន្លងមកឈ្មួញបានដឹកទំនិញលើសទំងន់នាពេលយប់ធ្វើឱ្យខូចផ្លូវជាច្រើនកន្លែងដែលទើបតែចាក់កៅស៊ូរួចរាល់បាន៣ខែប៉ុណ្ណោះ ។
បើតាមម្ចាស់រថយន្តឈ្មោះហុក ពុយ អាយុ៤៥ឆ្នាំ មានទីលំនៅឯរាជធានីភ្នំពេញ បានប្រាប់ឱ្យដឹកថា រថយន្តរបស់គាត់ត្រូវបានគេជួលឱ្យដឹងដើមដូងប្រេងពីចំការដូកប្រេងនៅតាមផ្លូវជាតិលេខ៤ ខេត្តព្រះសីហនុ មកខេត្តស្វាយរៀង ហើយក៏ពុំមានសមត្ថកិច្ចណាមករំខានដែរ ។ ចំពោះប្រជាពលរដ្ឋនៅខេត្តស្វាយរៀង ជាពិសេសប្រជាពលរដ្ឋស្រុករមាសហែក កំពុងតែអបអរ និងអរគុណរាជរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន ដែលបានស្ថាបនាផ្លូវជាតិលេខ១៣ ឡើងវិញ ដោយកន្លងមកបើធ្វើដំណើរពីស្រុករមាសហែក មកខេត្តស្វាយរៀង គេត្រូវចំណាយពេលមួយថ្ងៃឯណោះ ដូច្នេះពួកគាត់មិនចង់ឃើញផ្លូវដែលទើបតែសាងសង់រួចត្រូវក្រុមឈ្មួញបំផ្លាញទៅវិញដោយការដឹកទំនិញតាមរថយន្តយីឌុបរាប់សិបតោននោះទេ ៕
ចែករំលែកព័តមាននេះ