ខេត្តកំពង់ធំ ៖ ប៉ូលិសបានចាប់ខ្លួនជនសង្ស័យម្នាក់ នាល្ងាចថ្ងៃទី៨ សីហា នៅភូមិតាទ្រាល ស្រុកស្ទោង បន្ទាប់ពីទទួលបានពាក្យបណ្តឹងថា ជននេះបានចាប់រំលោភសេពសន្ថវៈនារីម្នាក់ កាលពីថ្ងៃទី៦ សីហា ។ លោកអនុសេនីយ៍ឯក យ៉ង សំ អធិការនគរបាលស្រុកស្ទោងបានឱ្យដឹងថា ដោយមានបញ្ជាពី លោកឧត្តមសេនីយ៍ត្រីស្នងការ កំលាំងសមត្ថកិច្ចប៉ូលិសស្រុកស្ទោង បានសហការជាមួយប៉ូលិសប៉ុស្តិ៍ ធ្វើការឃាត់ខ្លួនបុរសឈ្មោះ ព្រឹក ផាត អាយុ៣៧ឆ្នាំ នៅល្ងាចថ្ងៃទី៨ សីហា បន្ទាប់ពីនារីម្នាក់ អាយុ១៨ឆ្នាំ ប្តឹងចោទប្រកាន់ថា បានចាប់រំលោភនាង ខណៈពេលនាងទៅបេះផ្លែរពាក់នៅព្រៃខាងត្បូងផ្ទះកាលពីរសៀលថ្ងៃទី៦ សីហា ។
មន្រ្តីប៉ូលិសដដែលបានបន្តថា ការឈានដល់ការចាប់ខ្លួនជនជាប់ចោទខាងលើនេះ គឺផ្អែកលើពាក្យបណ្តឹងរបស់នារីរងគ្រោះ ដែលបញ្ជាក់ថា ផ្ទះនាងស្ថិតនៅដាច់ឆ្ងាយពីគេក្បែរព្រៃរបោះហើយនៅរសៀលថ្ងៃនោះ នាងបានបបួលប្អូនប្រុស អាយុ៧ឆ្នាំម្នាក់ និងក្មេងស្រីម្នាក់ទៀត ទៅរកបេះផ្លែរពាក់ នៅខាងត្បូងផ្ទះ ចំងាយប្រមាណជា៣០០ម៉ែត្រ ។ ខណៈពេលកំពុងតែបេះនោះស្រាប់តែឃើញឈ្មោះ ផាត មិនដឹងដើរពីណាមកសួរ និងនិយាយលេងតាមទំលាប់មនុស្សស្គាល់គ្នា ស្រាប់តែពេលនោះបានប្រើល្បិចឱ្យកេ្មងៗមកផ្ទះមុន ដោយឱ្យលុយទៅទិញស្ករគ្រាប់ ។ ពេលក្មេងរត់មកផ្ទះវិញនាងក៏បន្តបេះរពាក់ ព្រោះមិននឹកស្មានថា មានរឿងអី្វកើតឡើងនោះទេ ស្រាប់តែឈ្មោះនេះ ស្ទុះមកចាប់អោបថើបពីក្រោយរួចហើយចាប់បង្ខំរំលោភរហូតបានសំរេច និងគំរាមបំភ័យមិនឱ្យនិយាយប្រាប់គេទៀតផង ។
ដោយខ្លាចឈ្មោះ ផាត ធ្វើបាបនាងក៏លាក់រឿងនេះរហូតដល់ល្ងាចថ្ងៃទី៨ សីហា ទើបប្រាប់ម្តាយឱ្យប្តឹងប៉ូលិស ។ ជនសង្ស័យត្រូវបានចាប់ខ្លួន ខណៈពេលផឹកស្រាស្រវឹងហើយដើរមកផ្ទះរបស់ខ្លួន ។ ពេលត្រូវឃាត់ខ្លួនឈ្មោះព្រឹក ផាត និយាយថា រូបគេមានប្រពន្ធ-កូនហើយ ប៉ុន្តែប្រពន្ធទៅធ្វើការនៅប្រទេសម៉ាឡេស៊ីជាពលការិនី ធ្វើការតាមផ្ទះ ហើយនៅថ្ងៃកើតហេតុ គេឃើញនារីរងគ្រោះនៅម្នាក់ឯង ក៏កើតមានអារម្មណ៍ រួចហើយបានលួងលោមនាងឱ្យលុយ៣.០០០រៀល បើព្រមឱ្យគេរួមរ័ក តែដោយសារនារីនោះប្រកែក ទើបគេចាប់រំលោភតែម្តង ។ នៅរសៀលថ្ងៃទី១០ សីហា ជនឈ្មោះព្រឹក ផាត ត្រូវបានកសាង សំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ