ខេត្តត្បូងឃ្មុំ ៖ គ្រោះថ្នាក់ចរាចរណ៏បានកើតឡើងជាបន្តបន្ទាប់ នៅទឹកដីត្រើយខាងកើតទន្លេមេគង្គ ដោយបណ្តាលឲ្យរបួស និងស្លាប់ ហើយក្តីកង្វល់នេះ ត្រូវបានសមត្ថកិច្ច ក៏ដូចជាអាជ្ញាធរខេត្ត បានដាក់កម្លាំងនគរបាលចរាចរណ៍ ឲ្យយាមប្រចាំការនៅតាមគោលដៅសំខាន់ៗ ទាំងនៅលើផ្លូវជាតិលេខ៧ ហើយនៅតាមទីអារាមនានា ក្នុងរដូវកាន់បិណ្ឌនេះ ក៏មានមន្ត្រីនគរបាលបានប្រកាសតាមមីក្រូបំផុសឲ្យពលរដ្ឋគ្រប់ៗរូប ត្រូវនាំគ្នាគោរពច្បាប់ចរាចរណ៍ផងដែរ ។
លោកវរសេនីយ៍ឯក ឈឹម គឹមហុង ស្នងការរងនគរបាលខេត្ត ទទួលផែនសណ្តាប់ធ្នាប់ ប្រាប់ឲ្យដឹងនៅព្រឹកថ្ងៃទី១៤ ខែកញ្ញា ឆ្នាំ២០១៧ ថា ក្រោមការយកចិត្តទុកដាក់ពីសំណាក់ លោកឧត្តមសេនីយ៍ទោ បែន រ័ត្ន ស្នងការនគរបាលខេត្ត ដោយបានឲ្យកម្លាំងនគរបាលការិយាល័យចរាចរណ៍ផ្លូវគោកខេត្ត បានដាក់ប៉ុស្តិ៍ត្រួតពិនិត្យជាប្រចាំលើកំណាត់ផ្លូវជាតិលេខ៧ ត្រង់ចំណុចភូមិកោងកាង ឃុំកោងកាង ស្រុកពញាក្រែក ដើម្បីត្រួតពិនិត្យច្បាប់ចរាចរណ៍ផ្លូវគោកថ្មី ក្នុងពេលដំបូងៗមានអ្នកមិនពាក់មួកសុវត្ថិភាពច្រើន តែក្រោយពីច្បាប់ថ្មី ត្រូវបានរឹតបន្តឹង អ្នកដែលជិះម៉ូតូមិនពាក់មួកត្រូវផាកពិន័យចំនួន១៥,០០០រៀល ។
ហើយគ្រាន់តែចាប់តាំងពីដើមខែមករា មកដល់ខែកញ្ញានេះ គ្រោះថ្នាក់ចរាចរណ៍បានកើតឡើងចំនួន៥០ករណី បណ្តាលឲ្យស្លាប់៣៥នាក់ ស្រី៥នាក់ របួសធ្ងន់៥០នាក់ របួសស្រាល២៨នាក់ ។
លោកឧត្តមសេនីយ៍ទោ បែន រ័ត្ន ស្នងការនគរបាលខេត្តមានប្រសាសន៏ឲ្យដឹងដែរថា ដើម្បីកាត់បន្ថយគ្រោះថ្នាក់ចរាចរនោះ ដូចជាកន្លែងគ្រោះថ្នាក់ចរាចរកើតឡើងញឹកញាប់ ដែលចាស់ៗចំណាំហៅថា កន្លែងជើងកប មាននៅត្រង់ចំណុចផ្លូវចុះពីស្ពានគីហ្ស៊ុណាមកឃុំទន្លេបិទ ស្រុកត្បូងឃ្មុំ ដែលមានចំងាយ១ទៅ២គីឡូម៉ែត្រ ។ ដោយមើលឃើញបែបនេះ ទើបរូបលោកបានដាក់កម្លាំងនគរបាលចរាចរណ៍នៅទីនោះ ព្រោះថាអ្នកដែលមិនគោរពច្បាប់ ពេលដែលឃើញសមត្ថកិច្ច នឹងគោរពបានច្រើនផងដែរ ។
លោកឧត្តមសេនីយ៍ទោ បែន រ័ត្ន ស្នងការនគរបាលខេត្តបញ្ជាក់ថា កន្លងមកនេះ មានតាមយានដ្ឋានខ្លះ បានកែច្នៃរថយន្ត៣តោន ទៅជាង១០តោន ខុសលក្ខណៈបច្ចេកទេស លុះពេលដែលមានហេតុការណ៍កើតឡើងនោះ ជាន់ហ្វ្រាំងមិនស៊ីនោះទេ ។ ក្រោយពីច្បាប់ចរាចរណ៍ថ្មីត្រូវបានរឹតបន្តឹងនោះ រូបលោកបានចាត់ឲ្យមន្ត្រីជំនាញចុះណែនាំតាមយានដ្ឋានជួសជុលរថយន្ត ឲ្យបញ្ឈប់ការកែច្នៃខុសបច្ចេកទេសបន្តទៀត ។ ក្នុងរដូវដាក់បិណ្ឌនេះ បានចាត់ឲ្យមន្ត្រីចរាចរណ៍ ចុះនៅតាមវត្តអារាមសុំចៅអធិការវត្តផ្សព្វផ្សាយច្បាប់ចរាចរណ៍តែ៥នាទី ដើម្បីឲ្យពលរដ្ឋ និងពុទ្ធបរិស័ទនាំគ្នាគោរពច្បាប់ ហើយសូមការបើកបរនៅលើដងផ្លូវនានា មេត្តាមានស្មារតីប្រុងប្រយ័ត្នខ្ពស់ ដើម្បីសុវត្ថិភាពខ្លួនឯង និងអ្នកដ៏ទៃទៀត ៕
ចែករំលែកព័តមាននេះ