ក្រុងប៉ោយប៉ែត ៖ ជំនន់ទឹកភ្លៀងបានឡើងស្រឺតៗ លិចលង់ក្រុងប៉ោយប៉ែត ស្ទើរតែទាំងមូលហើយ អាជ្ញាធរកំពុងតែត្រៀមប្រកាសភាពអាសន្ន និងជួយប្រជាពលរដ្ឋ ខណៈដែលអ្នកក្រុងសំដែងការព្រួយបារម្ភយ៉ាងខ្លាំង កាលពីវេលាម៉ោង៥និង៣០នាទីល្ងាចថ្ងៃទី១៥ តុលា ២០១០។ នៅតាមផ្លូវលំនានាក្នុងក្រុងប៉ោយប៉ែត ទឹកជន់លិចស្ទើរតែទាំងអស់ កន្លែងខ្លះលិចត្រឹមចង្កេះ កន្លែងខ្លះត្រឹមជង្គង់ ចំណែកផ្លូវកៅស៊ូដែលខ្ពស់ជាងផ្លូវលំ ក៏ត្រូវលិចដែរ កន្លែងខ្លះត្រឹមជង្គង់ និងកន្លែងខ្លះត្រឹមចង្កេះដូចគ្នា។ ម៉ូតូរបស់ប្រជាពលរដ្ឋជាច្រើនគ្រឿងត្រូវបានលិចលង់ជិះលែងកើត បណ្តើរកាត់ទឹកព្រោងព្រាត ចំណែករថយន្តត្រូវរលត់ម៉ាស៊ីនជាប់គាំងកណ្តាលផ្លូវដែលមានទឹកជិតត្រឹមចង្កេះជាច្រើនគ្រឿង បង្កឱ្យអ្នកដំណើរ និងម្ចាស់រថយន្តរត់ចោលឡាន។
សម្លឹងមើលពីចំងាយកន្លែងណាក៏ឃើញវាលល្ហល្ហាចគ្របក្រាលដោយទឹកជំនន់ដែរ…រថយន្តដែលម្ចាស់រត់ចោលឃើញឈរធ្មឹង រាយប៉ាយ តាមផ្លូវជាច្រើនកន្លែងហ៊ុមព័ទ្ធដោយទឹក។ ផ្សាររុងរឿងក្នុងទឹកថៃដែលពលរដ្ឋខ្មែរច្រើនលើសលប់ចូលទៅលក់ដូរនៅទីនោះ ត្រូវលិចលង់ពាក់កណ្តាលតូប លក់ដូរលែងកើតទាំងស្រុង… ផ្សារអគ្គទើបសង់ថ្មី ដែលស្ថិតនៅលើទួលខ្ពស់ត្រូវទឹកគំរាមកំហែងឡើងលិច ប៉ឹមៗ ហើយ…លំនៅឋានប្រជាពលរដ្ឋរាប់ម៉ឺនគ្រួសារក៏ត្រូវទឹកលិចលង់ផងដែរ។ អ្នករស់នៅក្រុងប៉ោយប៉ែតបាននិយាយថា ទឹកជំនន់បានឡើងស្រឺតៗ ចាប់តាំងពីវេលាម៉ោង៣រសៀល ថ្ងៃទី១៥ តុលា មកម៉្លេះ បន្ទាប់ពីមុនេះ ៣ទៅ៤ថ្ងៃ ភ្លៀងបានធ្លាក់ជញ្ជ្រំជាប់ៗគ្នា ហើយខណៈក្រុងប៉ោយប៉ែតបានលិចលង់ស្ទើរតែទាំងស្រុងនេះ ភ្លៀងក៏នៅតែបន្តធ្លាក់ដដែលគ្រាន់តែពេលខ្លះខ្លាំង ពេលខ្លះតិចៗ ប៉ុន្តែមិនដាច់គ្រាប់ទេ។ ទឹកដែលជន់លិចក្រុងប៉ោយប៉ែតនេះ បានធ្លាយមកពីការបាក់ទំនប់.ក៥ និងហូរចាក់មកពីទឹកដីថៃជាប់ព្រំដែនកម្ពុជា៕
ចែករំលែកព័តមាននេះ