ខេត្តបាត់ដំបង ៖ ជនសង្ស័យ៥នាក់ត្រូវកំលាំងនគរបាលស្រុកភ្នំព្រឹកតាមចាប់ខ្លួនបានជាបន្តបន្ទាប់ ក្រោយពីមានសេចក្តីរាយការណ៍ថា ក្រុមនេះបានគាស់ផ្ទះអ្នកភូមិម្នាក់ចូលលួចយកទ្រព្យសម្បត្តិ កាលពីវេលាម៉ោង៩យប់ ថ្ងៃទី២២ សីហា នៅចំណុចភូមិភ្នំប្រាំពីរ ឃុំចក្រី ស្រុកភ្នំព្រឹក ។ ក្រោយពីចាប់ខ្លួនជនសង្ស័យ៥នាក់នេះ សមត្ថកិច្ចបានកសាងសំណុំរឿងបញ្ជូនទៅសាលាដំបូងខេត្តដោយចោទប្រកាន់ពីបទប្លន់ ។
តាមរបាយការណ៍របស់អធិការដ្ឋាននគរបាលស្រុកភ្នំព្រឹកបានឱ្យដឹងថា ជនទាំង៥នាក់ដែលត្រូវបានចាប់ខ្លួននោះរួមមាន១-ឈ្មោះយូ សីហា អាយុ១៨ឆ្នាំ ២-ឈ្មោះឡឹប ខេង អាយុ១៨ឆ្នាំ ៣-ឈ្មោះហេង ភារម្យ អាយុ១៨ឆ្នាំ ៤-ឈ្មោះហាក់ ធី អាយុ២២ឆ្នាំ និង៥-ឈ្មោះណែម ស៊ីថា អាយុ១៨ឆ្នាំ ។ រីឯម្ចាស់ផ្ទះដែលប្តឹងចោទប្រកាន់ជនទាំង៥នាក់នេះឈ្មោះសំ សុង ភេទស្រី អាយុ៥៩ឆ្នាំ រស់នៅក្នុងភូមិកើតហេតុខាងលើ ។ សមត្ថកិច្ចបានចាប់ខ្លួនក្រុមនេះបានជាបន្តបន្ទាប់ក្រោយពីទទួលពាក្យបណ្តឹង ។
យោងតាមពាក្យបណ្តឹងរបស់ស្រី្តឈ្មោះសំ សុង បាននិយាយថា ផ្ទះនោះជាផ្ទះប្អូនរបស់គាត់ឈ្មោះសៀវ ឡាន ភេទស្រី អាយុ៤១ឆ្នាំ ។ ស្ត្រីរូបនេះបានបញ្ជាក់ថា ក្រុមជនសង្ស័យបានគាស់បង្អួចចូលលួចទ្រព្យសម្បត្តិក្នុងគ្រាដែលប្អូនស្រីគាត់មិននៅ ដោយបានលួចយកទូរទស្សន៍មួយគ្រឿង កាបិត និងចានឆ្នាំង ។
នៅពេលធ្វើការសាកសួរជនទាំង៥នាក់បានសារភាពថា ពួកគេរស់នៅភូមិកោះស្វាយ ឃុំផ្ទះរូង ស្រុកភ្នំក្រវាញ ខេត្តពោធិ៍សាត់ ។ ពួកគេមកចំណុចកើតហេតុនេះកាលពីថ្ងៃទី២០ សីហា ដើម្បីរកការងារធ្វើ ប៉ុន្តែដោយសារតែអត់លុយទិញបាយហូប ទើបនាំគ្នាប្រព្រឹត្តបទល្មើសបែបនេះ ។ ក្រោយពីលួចបានមិនទាន់បានលក់ផង ក៏ត្រូវសមត្ថកិច្ចចាប់ខ្លួនបានតែម្តង ។
មន្ត្រីនគរបាលការិយាល័យព្រហ្មទណ្ឌកំរិតធ្ងន់បានថ្លែងថា ក្រុមនេះត្រូវចាប់ខ្លួនកាលពីព្រឹកថ្ងៃទី២៣ សីហា ក្រោយកើតហេតុមួយថ្ងៃ ខណៈដែលពួកគេបំរុងយកទ្រព្យសម្បត្តិដែលលួចបានទៅលក់ ។ ក្រុមនេះអាចត្រូវចោទប្រកាន់ពីបទប្លន់ ពីព្រោះសកម្មភាពពួកគេប្រព្រឹត្តឡើងដោយមានបក្សពួកច្រើន ហើយត្រូវបញ្ជូនទៅសាលាដំបូងខេត្ត នារសៀលថ្ងៃទី២៦ សីហា ដើម្បីផ្តន្ទាទោសតាមច្បាប់ ៕
ចែករំលែកព័តមាននេះ