ខេត្តកំពត ៖ ប្រជាពលរដ្ឋនៅភូមិរំពើន ឃុំស្តេចគង់ខាងលិច ស្រុកបន្ទាយមាស កាលពីព្រឹកថ្ងៃទី១៩ កក្កដា បានធ្វើពិធីបួងសួង និងលេងភ្លេងថ្វាយអ្នកតាភ្នំរំពើន ដោយដាក់សែនក្បាលជ្រូក មាន់ស្ងោរ និងនំចំណី ដើម្បីសុំសេចក្តីសុខសប្បាយ ជាពិសេសសុំទឹកភ្លៀងក្នុងរដូវវស្សានេះ ខណៈមិនទាន់មានភ្លៀងធ្លាក់ជោកជាំសម្រាប់ធ្វើស្រែ ។
លោកតានាក់ ហេន អាយុ៧០ឆ្នាំ ជាគ្រូអាចារ្យនៅវត្តគិរីបុប្ផារំពើន និងជាអ្នកគិតគូររៀបចំពិធីលេងភ្លេងបញ្ជាន់អារក្សប្រាប់ឱ្យដឹងថា ជារៀងរាល់ឆ្នាំឱ្យតែចូលដល់រដូវវស្សាជួបគ្រោះរាំងស្ងួត ក៏នាំគ្នាលេងភ្លេងបញ្ជាន់រូបថ្វាយអារក្សអ្នកតាភ្នំ សុំឱ្យមានភ្លៀងធ្លាក់ឆាប់បានប្រជាកសិករដកស្ទូង ។ ការលេងភ្លេងបញ្ជាន់រូបនេះថ្វាយចំពោះលោកតាផុល គឺជាខ្មោចអារក្សធំជាងគេនៅភ្នំរំពើន ប៉ុន្តែការលេងភ្លេងនេះមិនមានអ្នកស្នងរូបទេ គ្រាន់តែលេងភ្លេងថ្វាយប៉ុណ្ណោះ ដើម្បីឱ្យចាស់ទុំនៅក្នុងភូមិអង្វរករសុំលោកតាផុុល ជួយឱ្យមានភ្លៀងធ្លាក់សម្រាប់ធ្វើស្រែក្នុងរដូវវស្សា ។
លោកតាអាចារ្យឱ្យដឹងថា កាលពីឆ្នាំមុនគ្រាន់តែលេងភ្លេងថ្វាយខ្មោចអារក្សភ្លាម ស្រាប់តែស្ត្រីឈ្មោះនាង យ៉ាវ រត់ចេញពីផ្ទះមកចូលរូបអះអាងថា ខ្លួនជាតាផុល ។ ដូច្នេះហើយពេលលេងភ្លេងថ្វាយលើកក្រោយនេះ ស្ត្រីនោះត្រូវប្តីចាក់សោជាប់នៅក្នុងផ្ទះព្រោះខ្លាចឮសូរភ្លេងរត់ទៅចូលរូបស្នងតាផុលទៀត ។
ទាក់ទិននឹងភាពរាំងស្ងួត លោកជា ចាន់លី អភិបាលស្រុកបន្ទាយមាសឱ្យដឹងថា ដើមរដូវវស្សាឆ្នាំនេះមានភ្លៀងធ្លាក់ច្រើន ហើយពលរដ្ឋនៅស្រុកបន្ទាយមាសភាគច្រើនគឺធ្វើស្រូវពង្រោះដូចជា នៅឃុំព្រៃទន្លេ ឃុំត្នោតចុងស្រង់ និងឃុំបន្ទាយមាស រីឯឃុំផ្សេងប្រជាពលរដ្ឋស្ទូងស្រូវបានតិចតួចណាស់ ព្រោះជួបគ្រោះរាំងស្ងួត ។លោក ចាន់ រឹទ្ធ អនុប្រធានមន្ទីរកសិកម្មខេត្តកំពតថ្លែងថា ទូទាំងខេត្តកំពតមានស្រុកចំនួន៣ គឺស្រុកបន្ទាយមាស ស្រុកជុំគិរី និងស្រុកទឹកឈូ ប្រជាកសិករមានទឹកបង្កបង្កើនផលស្រូវ ព្រោះភូមិសាស្ត្រស្រុកទាំងបីនេះ សុទ្ធតែមានអាងទំនប់ និងមានប្រព័ន្ធស្រោចស្រពស្រូវ។ ចំណែកស្រុកផ្សេងៗទៀតប្រជាកសិករកំពុងបូមទឹកដើម្បីធ្វើស្រែ ។
ពលរដ្ឋនៅក្នុងឃុំសេ្តចគង់និយាយថា បន្ទាប់ពីរៃអង្គាសប្រាក់ពីអ្នកភូមិបានហើយ ក៏ទិញក្បាលជ្រូក និងមាន់ស្ងោរលេងភ្លេងថ្វាយអារក្សសុំទឹកភ្លៀង តែមិនទាន់ឃើញមានភ្លៀងធ្លាក់សោះ ។ ក្នុងស្ថានភាពបែបនេះ អ្នកភូមិដណ្តើមគ្នាបូមទឹកដកស្ទូងដដែល ព្រោះមានការព្រួយបារម្ភខ្លាចហួសខែមិនអាចធ្វើស្រែបាន ។ ប្រជាកសិករនិយាយថា សព្វថ្ងៃពួកគាត់ហាក់ដូចជានាំគ្នាធ្វើស្រែប្រវាស់មេឃ ។ ដូច្នេះពួកគាត់សំណូមពរដល់អាជ្ញាធរគ្រប់ជាន់ថ្នាក់ឱ្យយកចិត្តទុកដាក់ថែមទៀតចំពោះការកសាងប្រព័ន្ធស្រោចស្រព ព្រោះពួកគាត់រំពឹងចម្បងលើរបរស្រែចម្ការនេះហើយ ៕
ចែករំលែកព័តមាននេះ