រាជធានីភ្នំពេញ ៖ កីឡាករម៉ាត់ ឆ្វេង មកពីសមាគមកីឡាប្រដាល់ខេត្ដកោះកុង បានប្រកួតឈ្នះកីឡាករឈិន ធារ៉ាន់ មកពី ក្លឹបអប់រំកាយស្រុកអន្លង់វែងដោយពិន្ទុនៅ លើសង្វៀន CTN កាលពីថ្ងៃសុក្រ ទី២១ ឧសភា កន្លងមកនេះ ។ ការជួបគ្នារវាងគូ ពិសេសនេះធ្វើឱ្យមានការចាប់អារម្មណ៍យ៉ាង ខ្លាំងពីអ្នកទស្សនា ។ ទោះបីជាគេធ្វើដំណើរ មកពីឆ្ងាយដូចគ្នាបន្ដិចមែន តែមិនមានបញ្ហាសំរាប់គេឡើយ។ គេទាំង២បានប្ដូរ ស្នៀតកណ្ដាប់ដៃ និងស្នៀតកែងគ្នាទៅវិញ ទៅមកយ៉ាងស្វិតស្វាញបំផុត ធ្វើឱ្យអ្នកមើល មានការជក់ចិត្ដយ៉ាងខ្លាំង ។ ម៉ាត់ឆ្វេង បានប្រើស្នៀតកណ្ដាប់ដៃវាយចេញបានល្អ ខ្លាំងណាស់ គឺវាយរហ័ស និងមានចំនួនច្រើន ចំគោលដៅទៀតផង ។ ធារ៉ាន់ ព្យាយាម ទាត់សងមកវិញក្នុងបំណងបង្អាក់ដំណើរ ម៉ាត់ ឆ្វេង តែម៉ាត់ ឆ្វេង កាន់តែមានសន្ទុះ ខ្លាំងក្លាឡើងនៅពេលឈានចូលដល់ទឹកទី៣ និងទី៤ ។ ធារ៉ាន់ ចុះខ្សោយកំលាំងបន្ដិច នៅទឹកទី៥ធ្វើឱ្យម៉ាត់ ឆ្វេង មានឱកាស ដណ្ដើមយកជ័យជំនះទាល់តែបាន ។
ម៉ាប់ ឆៃយ៉ា មកពីក្លឹបបក្សីស្លាបដែក ប្រកួតឈ្នះភុំ ផា មកពីក្លឹបតាព្រហ្មមានជ័យ នៅក្នុងទឹកទី៤ ។ ខន មករា មកពីសមាគមកីឡាប្រដាល់ក្រសួងការពារជាតិ បាន ប្រកួតឈ្នះពិន្ទុហេង វិឆ័យ មកពីក្លឹបកងពលតូចលេខ៧០។ គូនេះបង្កការជក់ចិត្ដយ៉ាង ខ្លាំងដល់ទស្សនិកជន ពីព្រោះពួកគេប្រកួត គ្នាយ៉ាងស្វិតស្វាញបំផុតរហូតទាំងសងខាង សុទ្ធតែបានបន្សល់ទុកស្នាមរបួសលើក្បាល និងមុខជាច្រើនថ្នេរដូចគ្នា។ ចាប់ផ្ដើមពីទឹក ទី១រហូតដល់ទឹកទី៥ ពួកគេមិនសូវប្រើ ស្នៀតកណ្ដាប់ដៃ និងស្នៀតជើងនោះទេ គឺគេបានប្ដូរស្នៀតកែងដាក់គ្នាយ៉ាងសាហាវ បំផុត ។ មករា ត្រូវវិឆ័យវាយឱ្យមានរបួស បែកនៅលើថ្ពាល់ឆ្វេងត្រូវពេទ្យដេរអស់៦ ថ្នេរ រីឯវិឆ័យចប់ការប្រកួតត្រូវគ្រូពេទ្យដេរ របួសលើក្បាល និងថ្ងាស់សរុបមិនតិចជាង ១៨ថ្នេរឡើយ។
យស់ សំអាល់ មកពីក្លឹបឃ្លាំងមឿង ប្រកួតឈ្នះពិន្ទុ ភី សុភ័ក្ដ្រ មកពីក្លឹបសិង្ហកីឡា និង ឡុង ប៊ុនយីម មកពីក្លឹបសាលវ័ន្ដ បាន វាយផ្ដួលម៉ក់ ហេង មកពីក្លឹបក្រុងប៉ោយ ប៉ែត ឱ្យសន្លប់ក្នុងទឹកទី៣ ៕
ចែករំលែកព័តមាននេះ