ខេត្ដបាត់ដំបង ៖ កាលពីព្រឹកថ្ងៃទី៣០ មករា នៅឧបដ្ឋានសាលាវត្ដព្រៃសាលីកៀន កែស ស្ថិតក្នុងភូមិតាមាយ ឃុំគោកឃ្មុំ ស្រុកថ្មគោល មានរៀបចំប្រកាសតែងតាំងគ្រូសូត្រឆ្វេង-ស្ដាំ អាចារ្យ គណៈកម្មការវត្ដ ហើយជាមួយនេះក៏មានការអំពាវនាវរបស់ចៅអធិការស្នើឱ្យជួយជួសជុលព្រះវិហារវត្ដព្រៃសាលីកៀនកែសផងដែរ ដែលពេលនេះស្ទើរតែបាក់រលំទៅហើយ ។ ពិធីនេះមានការនិមន្ដ និងអញ្ជើញចូលរួមពីព្រះតេជគុណ ហេង សាខន អនុគណស្រុកថ្មគោល លោក សំ ណេង អភិបាលស្រុក លោកសៅ សណ្ដុស ប្រធានការិយាល័យធម្មការ និងសាសនា ស្រុក លោកមេឃុំ មេភូមិ លោកអាចារ្យ គណៈកម្មការវត្ដ ព្រះសង្ឃ និងពុទ្ធបរិស័ទចំណុះជើងវត្ដយ៉ាងច្រើនកុះករ ។
លោកសៅ សណ្ដុស បានប្រកាសតែងតាំងតាមការសំរេចរបស់ក្រសួងធម្មការ និងសាសនា គឺព្រះតេជគុណរឿន ដំ ទទួលភារកិច្ចជាគ្រូសូត្រឆ្វេង ព្រះតេជគុណឯក សា គឿន ទទួលភារកិច្ចជាគ្រូសូត្រស្ដាំ ព្រមទាំងតែងតាំងអាចារ្យគណៈកម្មការវត្ដចំនួន៥រូបបន្ថែម ។ លោកក៏បានលើកឡើងផងដែរថា នេះជាការចាំបាច់ណាស់ ក្នុងការស្រោចស្រង់ទីវត្ដអារាមដែលខ្វះនូវធនធានព្រះសង្ឃ ។
ព្រះចៅអធិការវត្ដព្រៃសាលីកៀនកែស ព្រះនាម ឃុត អង បានមានថេរដីកាថា វត្ដព្រៃសាលីកៀនកែសនេះចាប់កកើត និងសាងសង់ឡើងក្នុងឆ្នាំ១៨៩៧ ដោយចាស់ៗជំនាន់ នោះបានចូលព្រៃកាប់ឈើយកមកសាងសង់ ហើយចំពោះការសាងសង់ព្រះវិហារនេះឡើង គឺប្រើប្រាស់រយៈពេលយូរឆ្នាំណាស់រហូតដល់ឆ្នាំ១៩២០ ទើបបានបញ្ចុះសីមា ដែលបើគិតមកដល់បច្ចុប្បន្នព្រះវិហារនេះមានអាយុកាល៩០ឆ្នាំហើយ ។ ព្រះចៅអធិការបញ្ជាក់ថា វត្ដនេះមានចៅអធិការគង់នៅគ្រប់គ្រងចំនួន១២អង្គហើយ ហើយព្រះ អង្គជាចៅអធិការទី១៣ ។ ក្នុងរបបប្រល័យពូជសាសន៍ប៉ុល ពត ពួកគេបានយកព្រះវិហារនេះធ្វើជាកន្លែងស្ដុកស្រូវអង្ករ និង អំបិល ហើយដោយសារជាតិប្រៃនៃអំបិលបានធ្វើឱ្យពុកការ៉ូ និងពិតានព្រះវិហារដោយអន្លើ ដែលព្រះវិហារនេះសាងសង់ឡើងពីឈើ និងរៀបឥដ្ឋលាយជាមួយបាយអចាប់ពីជញ្ជាំងពីគ្រឹះខាងក្រោមឡើងទៅ ។
ក្រោយពេលរបបប្រល័យពូជសាសន៍ប៉ុល ពត ដួលរលំទៅអាជ្ញាធរនិងពុទ្ធបរិស័ទចំណុះជើងវត្ដ រួមទាំងព្រះអង្គដែលជាចៅអធិការផងនោះ បានឯកភាពគ្នាជួសជុលព្រះវិហារនេះឡើងវិញជាបណ្ដើរៗ ។ ទោះជាយ៉ាងណាក្ដី បច្ចុប្បន្នព្រះវិហារនេះមានការទ្រុឌទ្រោមយ៉ាងខ្លាំង និងខូចខាតយ៉ាងដំណំ ដោយដំបូលរបេះក្បឿងធ្លាក់ជញ្ជាំងខាងក្នុង ប្រេះស្រាំរបើកទាំងផ្ទាំងៗ ឯសំយាបដំបូលជុំ វិញព្រះវិហារបាក់ស្រុតជាបន្ដបន្ទាប់មិនអាចចូលទៅថ្វាយបង្គំព្រះក្នុងព្រះវិហារបានទេ ។ ដូច្នេះក្នុងនាមព្រះអង្គជាចៅអធិការវត្ដ និងពុទ្ធបរិស័ទ សូមស្នើទៅថ្នាក់ដឹកនាំភូមិ-ឃុំ-ស្រុក-ខេត្ដ រហូតដល់ក្រសួងធម្មការ និងសាសនា តើគួរធ្វើការជួសជុលឡើងវិញ ឬ យ៉ាងណា ដើម្បីចៀសវាងគ្រោះថ្នាក់ផ្សេងៗ និងសុំអំពាវនាវដល់សប្បុរសជន លោក ឧកញ៉ា លោកជំទាវ លោក លោកស្រី អ្នក នាងកញាទាំងអស់ចូលរួមចាប់មគ្គផលជួយដល់ព្រះវិហារវត្ដព្រៃសាលីកៀនកែសនេះផង។ ព្រះតេជគុណអនុគណស្រុក បានមានថេរដីកាថ្លែងអំណរគុណដល់គ្រូសូត្រឆ្វេង-ស្ដាំ ដែលត្រូវបានតែងតាំងនៅវត្ដព្រៃសាលីកៀនកែសនេះធ្វើឱ្យមានព្រះសង្ឃកាន់តែច្រើនក្នុងការដឹកនាំព្រះពុទ្ធសាសនាឱ្យមានការរីកចំរើន ហើយត្រូវចេះសាមគ្គីគ្នាសហការគ្នាជួយជ្រោមជ្រែងគ្នា ដើម្បីទីអារាមរបស់យើងមានការរីកចំរើន ។
លោកសំ ណេង អភិបាលស្រុកបានមានប្រសាសន៍ថា លោកគាំទ្រការរៀបចំបន្ថែមនូវគ្រូសូត្រឆ្វេង-ស្ដាំនេះតាមប្រពៃណីដែ ខ្វះខាតព្រះសង្ឃសំរាប់រួមចំណែកលើវិស័យ ព្រះពុទ្ធសាសនា ។ យើងយកវត្ដព្រៃសាលីកៀនកែសនេះ ធ្វើជាគំរូដល់វត្ដផ្សេងៗទៀតក្នុងស្រុករបស់យើង ហើយក៏សូមកោតសរសើរដល់ចៅអធិការវត្ដព្រៃសាលីកៀនកែស នេះដែលបានដឹកនាំគ្រប់សកម្មភាពទាំងពុទ្ធចក្រ និងអាណាចក្រផងដែរ ៕
ចែករំលែកព័តមាននេះ