ខេត្ដបាត់ដំបង ៖ នាងក្រមុំម្នាក់ធ្វើការនៅក្នុងអង្គការទស្សនៈពិភពលោកប្រចាំ ស្រុកសំឡូត បានសំរេចដាក់ពាក្យបណ្ដឹងទៅកាន់អធិការដ្ឋាននគរបាលស្រុក កាលពីថ្ងៃទី១៣ កក្កដា ដោយប្ដឹងចោទប្រកាន់អតីត សង្សាររបស់នាងពីបទ “បង្ខំរំលោភសេពសន្ថវៈ” មកលើរូបនាងយ៉ាងកំរោល កាលពីពាក់កណ្ដាលសបា្ដហ៍មុននៅក្នុងព្រៃក្បែរមាត់ស្ទឹងគ្រញូង ស្ថិតនៅភូមិអូរស្ងួត ឃុំតាសាញ ស្រុកសំឡូត ក្នុងពេលដែលនាងជិះម៉ូតូម្នាក់ឯងចុះទៅធ្វើការងារនៅមូលដ្ឋាន ។ ក្រោយពីទទួលបណ្ដឹង ជនត្រូវចោទក៏ត្រូវសមត្ថកិច្ច ស្រាវជ្រាវចាប់ខ្លួនបានភ្លាមៗដែរ ហើយក៏បានសារភាពអំពីកំហុសរបស់ខ្លួន ។
លោកហុក ហឿត អធិការរងនគរបាល ស្រុកសំឡូត ដែលទទួលចាត់ការសំណុំរឿង នេះបានប្រាប់កោះសន្ដិភាពថា ជនសង្ស័យ ដែលប្រព្រឹត្ដល្បែងស្នេហាដោយបង្ខំនោះ ឈ្មោះឈា រ៉ាន អាយុ២៩ឆ្នាំ និងនាងក្រមុំ ដែលរងគ្រោះឈ្មោះសួង គឹមហ៊ាង អាយុ២១ឆ្នាំ ។ ពួកគេរស់នៅភូមិ-ឃុំខាងលើជាមួយគ្នា ។ នាងគឹម ហ៊ាង ជាបុគ្គលិករបស់អង្គការទស្សនៈពិភពលោកប្រចាំស្រុកសំឡូត ។ ក្រោយពីទទួលពាក្យបណ្ដឹង ជនសង្ស័យខាងលើត្រូវចាប់ខ្លួនកាលពីព្រឹកថ្ងៃទី១៣ កក្កដា តែម្ដង ។
យោងតាមចំលើយរបស់នាងរងគ្រោះ សួង គឹមហ៊ាង ដែលបញ្ជាក់ប្រាប់ដោយលោក អធិការរងហុក ហឿត បានឱ្យដឹងថា បុរសនេះបានស្ទាក់ចាប់នាងតាមដងផ្លូវនៅចំណុច ព្រែកក្បែរមាត់ស្ទឹងខាងលើ ខណៈដែលនាង ជិះម៉ូតូទៅធ្វើការម្នាក់ឯង ។ នាងបាននិយាយថា នាងនិងបុរសនេះធ្លាប់មានទំនាក់ទំនងស្នេហាជាមួយគ្នា ប៉ុន្ដែបានផ្ដាច់ការទំនាក់ទំនងនេះវិញច្រើនខែហើយ ដោយសារតែគាត់គ្មានប្រាក់សំរាប់រៀបការ ។ នាងគឹម ហ៊ាង ត្រូវបានលោកហុក ហឿត ស្រង់ចំលើយមកប្រាប់ទៀតថា មុនពេលកើតហេតុ អតីតសង្សាររូបនេះបានទូរស័ព្ទមកសុំជួបនាង តែនាងបដិសេធ ដោយប្រាប់ថា កំពុងជាប់រវល់ធ្វើការនៅតាមភូមិ ។ ឮដូច្នេះហើយ ទើបបុរសនេះចាំស្ទាក់ផ្លូវមុនតែម្ដង ។
ទោះជាមានការចោទប្រកាន់បែបនេះក្ដី តាមការស្រង់ចំលើយរបស់ជនសង្ស័យ ឈ្មោះឈា រ៉ាន បានប្រាប់ថា វាជារឿងត្រូវរ៉ូវគ្នាទាំងសងខាងគ្មានអ្នកណាបង្ខំអ្នកណាទេ ។ ប៉ុន្ដែនាងរងគ្រោះបានបដិសេធ ចំលើយរបស់អតីតសង្សារអគតិនេះ ។ នាងនិយាយថា បើត្រូវរ៉ូវគ្នាចាំបាច់នាងប្ដឹងធ្វើអ្វី? គឺជននេះបានចាប់រំលោភនាងទាំងកំរោលក្នុងព្រៃ ។ លោកហុក ហឿត បានថ្លែងថា កើតហេតុ តាំងពីថ្ងៃទី៧ កក្កដា លុះដល់ព្រឹកថ្ងៃទី១៣ កក្កដា ទើបនាងមកប្ដឹង ។ ប៉ុន្ដែទោះជាបែបណា ទង្វើនេះបានកើតឡើងទៅហើយ ។ ដោយយោងលើបណ្ដឹងនារីរងគ្រោះ និងចំលើយសារភាពរបស់ជនសង្ស័យ ទើបយើងសំរេចឃាត់ខ្លួនជននេះកសាងសំណុំរឿង បញ្ជូនទៅកាន់ស្នងការដ្ឋានខេត្ដចាត់ការ ៕
ចែករំលែកព័តមាននេះ