រាជធានីភ្នំពេញ, ថ្ងៃទី៣ ធ្នូ ឆ្នាំ២០១០ ៖ ការសិក្សាថ្មីមួយរបស់សារជីវកម្មហិរញ្ញវត្ថុអន្តរជាតិ (IFC) ដែលជាសមាជិករបស់ក្រុមធនាគារពិភពលោក បានបង្ហាញថា ឧស្សាហកម្មស្វាយចន្ទីកម្ពុជា អាចរកប្រាក់ចំណូលបានពី៣០ទៅ៤០លានដុល្លារ បន្ថែមទៀត ក្នុងមួយឆ្នាំ និងអាចជួយបង្កើនប្រាក់ចំណូលដល់ប្រជាជនក្រីក្រ បើសិនជាមានការកែច្នៃ កាន់តែច្រើនឡើងនៅកម្ពុជា ។ របាយការណ៍ ក្តីសង្ឃឹមនៃវិស័យស្វាយចន្ទីកម្ពុជា ដែលបានបោះពុម្ពរួមគ្នាដោយ សារជីវកម្មហិរញ្ញវត្ថុអន្តរជាតិ សហភាពអឺរ៉ុប និងក្រសួងឧស្សាហកម្ម រ៉ែ និងថាមពល បានបង្ហាញថា មានសក្តានុពលជាច្រើនក្នុងការបង្កើនតំលៃបន្ថែមសំរាប់វិស័យស្វាយចន្ទីកម្ពុជា ។
នៅក្នុងពិធីបើកសិក្ខាសាលាផ្សព្វផ្សាយរបាយការណ៍នេះ លោកភោគ សុវណ្ណរិទ្ធ រដ្ឋលេខាធិការ ក្រសួងឧស្សាហកម្ម រ៉ែ និងថាមពល មានប្រសាសន៍ថា រាជរដ្ឋាភិបាលចង់ឃើញយ៉ាងខ្លាំង នូវការពង្រីកឧស្សាហកម្មស្វាយចន្ទី ដោយសក្តានុពលរបស់វិស័យនេះ អាចជួយបង្កើនប្រាក់ចំណូលដល់ ប្រជាជនក្រីក្រដែលប្រកបរបរដាំដុះដំណាំស្វាយចន្ទី ។ «មានសិប្បកម្មកែច្នៃស្វាយចន្ទីក្នុងស្រុកកាន់តែច្រើន និងបង្កើតការងារសំរាប់ប្រជាជននៅតាមជនបទដូចជា ការងារប្រមូលផល ការបកសំបក និងការវេចខ្ចប់ស្វាយចន្ទីដើម្បីនាំចេញ»។
ស្វាយចន្ទីកម្ពុជា អាចលក់បានក្នុងតំលៃកាន់តែខ្ពស់ផងដែរ ប្រសិនបើស្វាយចន្ទីនោះ ត្រូវគេបញ្ជាក់ថា ជាស្វាយចន្ទីសរីរាង្គ ។ យោងតាមលោករាហ្វែល ដូចាវ ម៉ូរេណូ (Rafael Dochao Moreno) ភារៈធារីនៃប្រតិភូសហភាពអឺរ៉ុបប្រចាំកម្ពុជា មានប្រសាសន៍ថា គ្រួសារកសិករដាំស្វាយចន្ទី ភាគច្រើនប្រើប្រាស់ថ្នាំគីមីតិចតួច ឬមិនប្រើសោះតែម្តង ដូច្នេះផលិតផលភាគច្រើន គឺជាផលិតផលសរីរាង្គ ។ «លទ្ធផលទទួលបានពីការបណ្តុះបណ្តាលកសិករដាំដុះស្វាយចន្ទីជាង៤.០០០គ្រួសារ បង្ហាញឱ្យឃើញថា ការទទួលវិញ្ញាបនបត្រសរីរាង្គសំរាប់កសិករអាចសំរេចបានយ៉ាងល្អ ហើយការកែលំអសាមញ្ញៗ លើបច្ចេកទេសដាំដុះ ការប្រមូលផល និងការទុកដាក់ អាចធ្វើឱ្យផលិតកម្មស្វាយចន្ទី មានភាពល្អប្រសើរយ៉ាងច្រើន» ។
តំរូវការស្វាយចន្ទីលើពិភពលោកក្នុងរយៈពេលវែង កំពុងតែមានកំណើនឡើង នេះជាកាលានុវឌ្ឍភាពរបស់កម្ពុជា ក្នុងការទាញយកអត្ថប្រយោជន៍ពីនិន្នាការនេះ តាមរយៈការជំរុញឱ្យមានការកែច្នៃកាន់តែច្រើនឡើងនៅក្នុងប្រទេសជាជាងការនាំចេញស្វាយចន្ទី មិនទាន់កែច្នៃស្ទើរតែទាំងអស់ ទៅឱ្យប្រទេសផ្សេងកែច្នៃ និងលក់ទៅប្រទេសទីបី។ លោកឆាល ស្នៃឌ័រ (Chales Schneider) តំណាងស្តីទីរបស់សារជីវកម្មហិរញ្ញវត្ថុអន្តរជាតិប្រចាំនៅកម្ពុជា មានប្រសាសន៍ថា ពេលបច្ចុប្បន្ន ជាពេលវេលាដ៏ប្រសើរសំរាប់កម្ពុជា ក្នុងការបង្កើតឱ្យមានឧស្សាហកម្មកែច្នៃស្វាយចន្ទីដែលមានលក្ខណៈប្រកួតប្រជែង ព្រោះថា តំរូវការ និងតំលៃនៅលើទីផ្សារអន្តរជាតិមានលក្ខណៈល្អប្រសើរ និងច្បាស់លាស់ ។ ប្រសិនបើម្ចាស់សិប្បកម្មកែច្នៃក្នុងស្រុក អាចបំពេញបានតាមបទដ្ឋានអន្តរជាតិលើផ្នែកអនាម័យ សុខភាព និងសុវត្ថិភាព ពួកគាត់អាចធានាចំពោះខ្លួនគាត់ថា គាត់នឹងមានទីផ្សារដែលគួរឱ្យជឿជាក់បាន និងតំលៃខ្ពស់ ។ ទាំងនេះអាចជួយពង្រីកវិស័យស្វាយចន្ទីក្នុងស្រុក បង្កើតការងារ និងបង្កើនប្រាក់ចំណូលយ៉ាងច្រើនដល់កសិករដាំស្វាយចន្ទី ។
ការសិក្សានេះ ជាផ្នែកមួយនៃគំរោងលើកស្ទួយខ្សែសង្វាក់ផលិតកម្ម កសិកម្ម ដែលមានរយៈពេលប្រាំឆ្នាំ អនុវត្តដោយ សារជីវកម្មហិរញ្ញវត្ថុអន្តរជាតិ និងរួមសហការជាមួយសហភាពអឺរ៉ុប ហ្វាំងឡង់ អៀកឡង់ ហូល្លង់ ណូវែលហ្សេឡង់ និងស្វីស និងក្រសួងឧស្សាហកម្ម រ៉ែ និងថាមពល ។ នៅក្នុងវិស័យស្វាយចន្ទីកម្ពុជា គំរោងបានជួយពង្រីកសមត្ថភាពសមាគមស្វាយចន្ទី និងក្រុមហ៊ុនស្វាយចន្ទី ដែលទើបបង្កើតថ្មី និងកំពុងរីកលូតលាស់ខ្លាំង ដើម្បីឱ្យពួកគេអាចបណ្តុះបណ្តាល និងផ្តល់ការគាំទ្រដល់កសិករខ្នាតតូចតាចក្នុងទំរង់ផ្សេងៗទៀត ។
អំពីសារជីវកម្មហិរញ្ញវត្ថុអន្តរជាតិ (IFC) សាជីវកម្មហិរញ្ញវត្ថុអន្តរជាតិ (IFC) ជាសមាជិកនៃក្រុមធនាគារពិភពលោក និងជាស្ថាប័នអភិវឌ្ឍន៍ធំជាងគេ ដែលធ្វើការជាមួយផ្នែកឯកជន នៅក្នុងប្រទេសកំពុងអភិវឌ្ឍន៍ ។ យើងបង្កើតកាលានុវឌ្ឍភាព ឱ្យប្រជាជនចាកផុតពីភាពក្រីក្រ និងបង្កើនជីវភាពរបស់ពួកគេ តាមរយៈការផ្តល់ហិរញ្ញប្បទាន ដើម្បីជួយអាជីវកម្មឱ្យបង្កើតការងារ និងផ្តល់សេវាចាំបាច់នានាដល់ប្រជាជន តាមរយៈការកៀរគរ និងបែងចែកមូលធនពីប្រភពផ្សេងៗ និងការផ្តល់សេវាប្រឹក្សាយោបល់សំដៅឱ្យមានការអភិវឌ្ឍន៍ ប្រកបដោយនិរន្តរភាព ។ ស្ថិតក្នុងដំណាក់កាលមិនប្រាកដប្រជានៃសេដ្ឋកិច្ចពិភពលោក ទុកវិនិយោគសរុប របស់ (IFC) កើនដល់១៨ពាន់លានដុល្លារអាមេរិក នៅក្នុងឆ្នាំសារពើពន្ធ២០១០ ។ សំរាប់ព័ត៌មានបន្ថែម សូមមើលគេហទំព័រ www.ifc.org ៕
ចែករំលែកព័តមាននេះ