រាជធានីភ្នំពេញ ៖ កម្មករសំណង់ម្នាក់ត្រូវបានក្មេងប្រុស និងប្រជាពលរដ្ឋនាំគ្នាចងទ្វារបន្ទប់ពីក្រៅជាប់ ដើម្បីចាប់ខ្លួនប្រគល់ឱ្យនគរបាលប៉ុស្តិ៍ឫស្សីកែវ ខណ្ឌឫស្សីកែវ បន្ទាប់ពីធ្វើសកម្មភាពចាប់រំលោភក្មេងស្រីអាយុ៧ឆ្នាំម្នាក់នៅក្នុងបន្ទប់ផ្ទះជួលរបស់ម្តាយក្មេងស្រី កាលពីវេលាម៉ោង៣រសៀលថ្ងៃទី២៩ សីហា ២០១០ ស្ថិតក្នុងភូមិសាមគ្គី សង្កាត់ឫស្សីកែវ ខណ្ឌឫស្សីកែវ ។ ជនដែលចាប់រំលោភក្មេងស្រីត្រូវសមត្ថកិច្ចឱ្យដឹងថា ឈ្មោះមាស សេរីវុធ អាយុ២៦ឆ្នាំ ជាកម្មករសំណង់ ស្នាក់នៅផ្ទះជួលក្នុងភូមិកើតហេតុ ។ ជនសង្ស័យត្រូវប្រជាពលរដ្ឋ រួមទាំងបងប្រុសរបស់ក្មេងស្រីម្នាក់ផងនាំគ្នាចាប់ខ្លួនប្រគល់ឱ្យសមត្ថកិច្ចប៉ូលិសប៉ុស្តិ៍ បន្ទាប់ពីជននោះធ្វើសកម្មភាពចាប់រំលោភក្មេងស្រី ។ តាមព័ត៌មានឱ្យដឹងទៀតថា នៅមុនពេលកើតហេតុក្មេងស្រីអាយុ៧ឆ្នាំបានរត់លេងក្បែរបន្ទប់ផ្ទះជួលរបស់នាង (ម្តាយជាអ្នកជួល) ។
ពេលស្រេកទឹកក៏បានបើកទ្វារបន្ទប់ទៅរកទឹកផឹក ក៏ត្រូវជនល្មោភកាមលបចូលទៅក្នុងបន្ទប់ ហើយលួងលោម និងចាប់បង្ខំធ្វើសកម្មភាពរំលោភតែម្តង ។ សាក្សីបានឱ្យដឹងផងដែរថា ជនដៃដល់បានធ្វើសកម្មភាពដោយឱ្យក្មេងស្រីនៅពីលើ ស្រាប់តែពេលនោះបងប្រុសរបស់ក្មេងស្រីម្នាក់មានឈ្មោះហុង ទី អាយុ១១ឆ្នាំ បានបើកទ្វារបង្អួចពីក្រៅទៅឃើញ ក៏រហ័សទៅយកខ្សែភ្លើងចងទ្វារពីក្រៅជាប់ និងបានស្រែកប្រាប់ប្រជាពលរដ្ឋ រួចទូរស័ព្ទប្រាប់ឪពុកម្តាយក្មេងឱ្យមកនាំគ្នាចាប់ខ្លួនជនដៃដល់ប្រគល់ឱ្យសមត្ថកិច្ចប៉ូលិសតែម្តង ។ នៅចំពោះមុខសមត្ថកិច្ច ជននេះបានសារភាពថា ខ្លួនពិតជាបានរំលោភក្មេងស្រីពិតប្រាកដមែន ដោយសារតែផឹកស្រាស្រវឹង ៕
ចែករំលែកព័តមាននេះ