រាជធានីភ្នំពេញ ៖ អង្គជំនុំជំរះវិសាមញ្ញ ក្នុងតុលាការកម្ពុជា (អ.វ.ត.ក) ឬសាលាក្ដីខ្មែរក្រហមបានប្រកាសដល់សាធារណជនមន្ដ្រីការទូត និងតំណាងសារព័ត៌មានជាតិ និងអន្ដរជាតិឱ្យចូលរួមសវនាការសាធារណៈនាថ្ងៃប្រកាសសាលក្រមប្រឆាំងនឹង កាំង ហ្កេកអ៊ាវ ហៅឌុច នៅក្នុងសំណុំរឿង០០១ នៅថ្ងៃទី២៦ ខែកក្កដា ខាងមុខដែលប្រធានអង្គជំនុំជំរះសាលាដំបូងនឹងអានសេចក្ដីសង្ខេបសាលក្រមនៅក្នុងសវនាការនេះ តែអង្គជំនុំជំរះសាលាដំបូងមិនទាន់ ប្រកាសពេលវេលាចាប់ផ្ដើមសវនាការនេះនៅឡើយទេ ។ សំរាប់ការចូលរួម គួរមកដល់សាលសវនាការរយៈពេលមួយម៉ោងមុនពេលចាប់ផ្ដើមសវនាការដើម្បីឱ្យមានពេលវេលាគ្រប់គ្រាន់សំរាប់ការត្រួតពិនិត្យផ្នែក សន្ដិសុខ ។ ដើម្បីធានាបានសណ្ដាប់ធ្នាប់នៅក្នុងសាលសវនាការសាធារណៈ អ្នកចូលរួម ទាំងអស់ត្រូវមកដល់កន្លែងអង្គុយដែលបានរៀបចំរួចក្នុងសាលសវនាការយ៉ាងហោច ណាស់រយៈពេល៣០នាទីមុនពេលចាប់ផ្ដើម សវនាការ ។
ទឹកបរិសុទ្ធនឹងផ្ដល់ជូនអ្នកចូលរួមពិសា ដោយឥតគិតថ្លៃ និងអាចទិញភេសជ្ជៈ និងអាហារបានក្នុងបរិវេណកង់ទីនខាងក្រៅសាលសវនាការ ។ អ្នកចូលរួមមិនត្រូវអនុញ្ញាតឱ្យយកភេសជ្ជៈ និងអាហារចូលក្នុងសាលសវនាការឡើយ ។ អ្នកចូលរួមអាចប្រើប្រាស់បង្គន់អនាម័យនៅក្នុងអគារសវនាការ និងនៅចំណតរថយន្ដរបស់សាលាក្ដី ។ អ្នកចូលរួមអាចចតមធ្យោបាយធ្វើដំណើរផ្ទាល់ខ្លួន ដូចជារថយន្ដក្រុង និងរថយន្ដតូចនៅចំណត ។ ជនពិការនឹងទទួលបានការ ជួយសំរួលនានា រួមទាំងការផ្ដល់ឱ្យនូវរទេះរុញផង។ អង្គជំនុំជំរះវិសាមញក្នុងតុលាការកម្ពុជាមានទីតាំងស្ថិតនៅសង្កាត់ចោមចៅ ដែលមានចំងាយ១៦គីឡូម៉ែត្រពីរាជធានីភ្នំពេញ (ធ្វើដំណើរប្រមាណ១០នាទី ពីអាកាសយានដ្ឋាន) នៅខាងឆ្វេងដៃផ្លូវជាតិលេខ៤។
កន្លែងអង្គុយនៅក្នុងសាលសវនាការសាធារណៈត្រូវបានរៀបចំសំរាប់ភាគីដើមបណ្ដឹងរដ្ឋប្បវេណី។ កន្លែងអង្គុយចំនួន៩០ ត្រូវបានបំរុងទុកសំរាប់ភាគីដើមបណ្ដឹងរដ្ឋប្បវេណីក្នុងសំណុរឿង០០១ និងមេធាវីរបស់ ពួកគេតាមសំណើ អង្គភាពគាំពារជនរងគ្រោះ ។ កន្លែងអង្គុយចំនួន៧០ទៀតសំរាប់មន្ដ្រីការទូត ប្រទេសជាមិត្ដរបស់អ.វ.ត.ក មន្ដ្រីរដ្ឋាភិបាល និងអ្នកសិក្សាស្រាវជ្រាវរឿង ខ្មែរក្រហម ។ ជាអតិបរមា កន្លែងអង្គុយ មាន២កន្លែង នឹងត្រូវបានរៀបចំជូនសំរាប់ តំណាងការទូតប្រទេសនីមួយៗ ។ ចំណែកកន្លែងអង្គុយចំនួន៥០នឹងត្រូវរៀបចំសំរាប់ តំណាងអង្គការក្រៅរដ្ឋាភិបាលជាតិ និងអន្ដរជាតិ (អង្គការក្រៅរដ្ឋាភិបាលនីមួយៗទទួល បានកន្លែងអង្គុយអតិបរមាចំនួន៣)។ ក្នុងករណីកន្លែងអង្គុយទាំងនោះនៅសល់ទំនេរ នៅពេល៣០នាទីមុនពេលចាប់ផ្ដើមសវនា ការកន្លែងអង្គុយទាំងនោះនឹងត្រូវរៀបចំ សំរាប់សាធារណជនទូទៅ ។ អ្នកចូលរួមត្រូវចុះឈ្មោះឱ្យបានមុនថ្ងៃផុតកំណត់ ថ្ងៃទី២ ខែកក្កដា ឆ្នាំ២០១០។
កន្លែងអង្គុយចំនួន២៦០ ត្រូវរៀបចំ សំរាប់សាធារណជនដែលមកដល់តុលាការ ដោយមធ្យោបាយធ្វើដំណើរដែលសាលាក្ដី និងអង្គការក្រៅរដ្ឋាភិបាលជាដៃគូបានផ្ដល់ជូន ។ ឯកន្លែងអង្គុយចំនួន៣០ក្នុងសាលសវនាការត្រូវបានរៀបចំសំរាប់តំណាងអ្នកសារព័ត៌មាន។ តំណាងអ្នកសារព័ត៌មានដទៃ ទៀតនឹងត្រូវរៀបចំជូនកន្លែងអង្គុយក្នុង បន្ទប់សារព័ត៌មាននៅជាន់ផ្ទាល់ដី។ អ្នកសារព័ត៌មានផ្នែកបោះពុម្ពត្រូវបានផ្ដល់អាទិភាព ។ ដោយសារសាលសវនាការសាធារណៈ មានសមត្ថភាពផ្ទុកមានកំណត់ត្រឹម៥០០កន្លែង និងដើម្បីអនុវត្ដតាមបទបញ្ជាសន្ដិសុខ ចាំបាច់នៅថ្ងៃទី២៦ ខែកក្កដា អ.វ.ត.ក នឹង អនុញ្ញាតឱ្យតែអ្នកដែលស្ថិតក្នុងក្រុមទាំង៥ ខាងលើដែលបានចុះឈ្មោះជាមុន និងទទួលបានការបញ្ជាក់ថា ទទួលបានកន្លែងអង្គុយ បំរុងទុកជាមុនប៉ុណ្ណោះ ។ អ្នកផ្សេងពីនេះ នឹងមិនត្រូវអនុញ្ញាតឱ្យចូលសាលសវនាការនៅថ្ងៃនោះឡើយ ៕
ចែករំលែកព័តមាននេះ