កំណាព្យ (ស្តាប់លុយនិយាយ) បទពាក្យ៧ ដោយ ព្រុំ គឹម ជឿន
– ខ្ញុំមិនបាច់ប្រាប់ក៏អ្នកដឹង ថាតើខ្ញុំហ្នឹងគឺជាអ្វី
ខ្ញុំឱ្យអ្នកថោកឬប្រពៃ នោះគឺអាស្រ័យអ្នកប្រាថ្នា ។
– ខ្ញុំមិនបាច់ប្រាប់ក៏អ្នកដឹង ថាតើខ្ញុំហ្នឹងគឺជាអ្វី
ខ្ញុំឱ្យអ្នកថោកឬប្រពៃ នោះគឺអាស្រ័យអ្នកប្រាថ្នា ។
– ខ្ញុំជាបំរើដ៏ស្មោះត្រង់ បំពេញចំណង់គ្រប់អាត្មា
អ្នកអាចប្រើខ្ញុំតាមត្រូវការ ប្រើក្នុងផ្លូវណាមិនត្អូញត្អែរ ។
– ខ្ញុំមានឥទ្ធិពលខ្លាំងពេកក្រៃ ផ្លាស់យប់ជាថ្ងៃក៏បានដែរ
ស្រីស្រស់បោយដៃឈរហូរហែរ មិនមែនព្រោះស្នេហ៍គឺព្រោះខ្ញុំ។
– មិនថានៅទីកន្លែងណា លើកខ្ញុំថ្លៃថ្លាខ្ពស់ឧត្ដម
យកខ្ញុំដោះស្រាយរឿងតូច ធំ ខ្ញុំពេញនិយមគេរាប់អាន ។
– អ្នកខ្ពស់ឬទាប មានឬក្រ ខ្ញុំនៅកំដរគ្រប់ទីឋាន
ផ្គាប់ផ្គុនគ្រប់គ្នាឱ្យសុខសាន្ដ ខ្លះក៏មានបានដូចសេដ្ឋី ។
– ខ្ញុំជាចៅហ្វាយដ៏គំរក់ បើអ្នកលង់វក់ភ្លេចស្មារតី
ពេលខ្ញុំជាម្ចាស់លើអ្វីៗ អ្នកគង់ជួបភ័យក្នុងជីវិត ។
– ខ្ញុំអាចប្ដូរខុសទៅជាត្រូវ ផ្លាស់សជាខ្មៅបានតាមចិត្ដ
អ្នកពុករលួយខ្ញុំមិនគិត ព្រោះខ្ញុំគ្មានសិទ្ធិនឹងបញ្ឈប់។
– មានខ្ញុំគឺអ្នកមានអំណាច មានគេខ្លបខ្លាចកោតគោរព
ទេពកោសល្យខ្ញុំច្រើនលើសលប់ ជួយអ្នកមិនឈប់ទាំងស្រីប្រុស
– អ្វីៗទាំងអស់កើតព្រោះខ្ញុំ តែកុំច្រឡំថាខ្ញុំខុស
គឺមនុស្សលោភលន់ចិត្ដមិនស្មោះ ពូតផ្ដុំកំហុសដោយខ្លួនឯង ។
ដោយ ព្រុំ គឹម ជឿន prumkimchoeun@gmail.com
ចែករំលែកព័តមាននេះ