ខេត្ដបន្ទាយមានជ័យ ៖ បុរសពិការភ្នែកទាំង២ និងពិការកំបុតដៃទាំងសងខាង ព្រមទាំងប្រពន្ធនិងកូនស្រីម្នាក់បាននាំគ្នាមកដាក់ពាក្យបណ្ដឹងនៅអធិការដ្ឋាននគរបាល ក្រុងប៉ោយប៉ែត ប្ដឹងពីអ្នកយកព័ត៌មានឱ្យទស្សនាវដ្ដីមួយដែលបានថតរូបក្រុមគ្រួសារគាត់ និងសរសេរពីជីវិតពិការរបស់គាត់ យកទៅចុះផ្សាយខុសពីការពិត ហើយក៏មានទស្សនាវដ្ដីមួយទៀតបានយករូបភាពរបស់គាត់សរសេរទៅចុះផ្សាយក្រោមចំណងជើងថា “កាលនៅជាល្អជាមនុស្សឯកោ ដល់ធ្លាក់ខ្លួនពិការមានប្រពន្ធ២បំរើឆ្វេងស្ដាំ” ដែលអត្ថបទរបស់ទស្សនាវដ្ដីនោះបានចុះផ្សាយ កាលពីថ្ងៃទី២១-៣១ មីនា ឆ្នាំ ២០១០ កន្លងមកនេះ ។
តាមការបំភ្លឺពីបុរសពិការខាងឈ្មោះគីម វណ្ណា អាយុ៤៧ឆ្នាំ និងប្រពន្ធឈ្មោះហ៊ាន គីមហេង អាយុ៤៥ឆ្នាំ រួមជាមួយកូនស្រី ឈ្មោះជា រ៉ាន់យ៉ា អាយុ២៤ឆ្នាំ រស់នៅភូមិទួលពង្រ សង្កាត់ប៉ោយប៉ែត ក្រុងប៉ោយប៉ែត មុខរបរជាកម្មករអូសរទេះនៅច្រកទ្វារប៉ោយប៉ែត បានរៀបរាប់ឱ្យកោះសន្ដិភាពដឹងថា គាត់ប្ដឹងដោយសារតែអ្នកយកព័ត៌មានទស្សនាវដ្ដីបានចុះផ្សាយព័ត៌មានមិនពិតពីជីវិតពិការភាពរបស់គាត់ប្រៀបបីដូចជាការលេងសើចគួរឱ្យស្អប់ខ្ពើមពីសាធារណជន ដែលថា គាត់ពិការមានប្រពន្ធឆ្វេងស្ដាំ តែតាមការពិត គេយកប្រពន្ធនិងកូនស្រីរបស់គាត់ថាជាប្រពន្ធឆ្វេងស្ដាំទៅវិញ។ គាត់បញ្ជាក់ថា ទស្សនាវដ្ដីនេះបានយករូបកូនស្រីទី២ដែលគេរៀបចំឱ្យឈរថតរួមគ្នាជាប់ជាមួយរូបគាត់ ដើម្បីយកមកចុះផ្សាយពីជីវិតពិការរបស់គាត់ តែទស្សនាវដ្ដីនោះ បានយកទៅចុះផ្សាយថារូបគាត់មានប្រពន្ធ២បំរើឆ្វេងស្ដាំ ដោយចាត់ទុកកូនស្រីរបស់គាត់ឈ្មោះជា រ៉ាន់យ៉ា នោះជាប្រពន្ធទី២របស់គាត់ ធ្វើឱ្យក្រុមគ្រួសាររបស់គាត់មានបញ្ហាកើតឡើង ទើបគាត់ដាច់ចិត្ដមកប្ដឹងសមត្ថកិច្ចឱ្យជួយរកយុត្ដិធម៌ ។
បុរសពិការបានបន្ដថា ក្រោយពេលទស្សនាវដ្ដីបានចេញផ្សាយហើយមានគេយកទៅលក់នៅក្រុងប៉ោយប៉ែតរួចមក ក្រុមគ្រួសាររបស់គាត់ក៏មានជំលោះមិនចេះចប់ មិនចេះហើយ ដោយសារតែកូនប្រសាប្រុសរបស់គាត់ត្រូវជាប្ដីកូនស្រីគាត់ឈ្មោះជា រ៉ាន់យ៉ា អាយុ២៤ឆ្នាំ ដែលមានកូនដល់ទៅ២នាក់ទៅហើយ មានគំនិតប្រចណ្ឌប្រពន្ធជាមួយនឹងរូបគាត់ដែលជាឪពុកបង្កើត។ មិនតែប៉ុណ្ណោះ ដោយសារតែការចុះផ្សាយពីជីវិតគាត់មិនពិតនេះធ្វើឱ្យអាជីពជាកម្មករអូសរទេះរបស់គាត់ត្រូវដាច់បាយផងដែរ ជនមួយចំនួនស្អប់ខ្ពើមដល់រូបគាត់ មិនមែនមានតែជនសាមញធម្មតាទេ សូម្បីតែសមត្ថកិច្ចនៅមាត់ច្រក និងថៅកែអីវ៉ាន់ ក៏ហាក់ដូចជារើសអើងនិងស្អប់ខ្ពើមគាត់ ដោយមិនឱ្យទំនិញដល់រូបគាត់ដឹកឬអូសដូចពេលមុននោះឡើយ។ បុរសពិការរូបនេះ បានបញ្ជាក់ប្រាប់យ៉ាងច្បាស់ថា ភ្នែកនិងដៃទាំង២របស់គាត់ត្រូវពិការដោយសារគ្រាប់មីន កាលពីសម័យសង្គ្រាមនៅក្នុងស្រុកអន្លង់វែង ខេត្ដឧត្ដរមានជ័យ កាលពីឆ្នាំ១៩៩៣ ហើយរូបគាត់មានប្រពន្ធតែមួយគត់គឺឈ្មោះ ហ៊ាន គីមហេង អាយុ៤៥ឆ្នាំ និងមានកូនសរុបទាំងអស់៩នាក់។
គាត់អះអាងថា រូបថតគ្រួសារគាត់ដែលបានចុះផ្សាយក្នុងទស្សនាវដ្ដីគឺជារូបកូនស្រីទី២របស់គាត់ ឈ្មោះជា រ៉ាន់យ៉ា ហើយមានប្ដីនិងកូនដល់ទៅ២នាក់ តែត្រូវបានអ្នកយកព័ត៌មានទស្សនាវដ្ដីសរសេរចុះផ្សាយថា ជាប្រពន្ធទី២របស់គាត់ទៅវិញ ។ ការផ្សាយព័ត៌មានមិនពិតពីសំណាក់ទស្សនាវដ្ដីខាងលើពិតជាធ្វើឱ្យប៉ះពាល់ដល់កិត្ដិយស និងអាជីពក្រុមគ្រួសារគាត់យ៉ាងខ្លាំង ។
លោកប៊ុន សំណាង អ្នកយកព័ត៌មានឱ្យទស្សនាវដ្ដីទី១ បានឱ្យដឹងថា ចំពោះរូបលោកពិតជាបានថតរូបក្រុមគ្រួសារបុរសពិការនោះមកចុះផ្សាយពិតមែន តែលោកសរសេរតាមរឿងពិតប៉ុណ្ណោះដោយពុំមានការបំផ្លើសនោះឡើយ ។
លោកប៊ុន សំណាង ក៏បានបញ្ជាក់ច្បាស់ថា លោកបានធ្វើការស្រាវជ្រាវរឿងនេះឃើញថា មានអ្នកយកព័ត៌មានឱ្យទស្សនាវដ្ដីផ្សេងមួយរូបទៀតប្រចាំនៅក្រុងប៉ោយប៉ែត បានលួចចម្លងយករូបភាពរបស់លោកទៅចុះផ្សាយបន្ដ ហើយនិយាយមិនមានការពិត ទើបធ្វើឱ្យក្រុមគ្រួសាររបស់គាត់កើតមានបញ្ហាបែបនេះ ។ ចំពោះអ្នកយកព័ត៌មានឱ្យទស្សនាវដ្ដីទី២នោះកោះសន្ដិភាពមិនអាចសុំការបំភ្លឺបានឡើយកាលពីព្រឹកថ្ងៃទី៧ មេសា។
នេះជាបញ្ហាមួយដែលអ្នកស្លូតត្រង់ អាចនឹងរងគ្រោះដោយសារតែការផ្សាយព័ត៌មានមិនពិត។ គេមិនអាចកាឡៃពីជីវិតពិតទៅជាការប្រឌិតមួយដើម្បីបោកប្រាសអ្នកអានឡើយ។
ចែករំលែកព័តមាននេះ