យោងតាមពួកភ្នាក់ងារបន្ទាន់រុស្ស៊ីថា ប្រទេសរុស្ស៊ីបានប្រមូលឧទ្ធម្ភាគចក្រ និងនាវាសណ្តោងទាំងឡាយដើម្បីជួយពន្លត់ភ្លើងដែលឆេះ នាវាមុជទឹកនុយក្លេអ៊ែរមួយគ្រឿង នៅឯការដ្ឋាននាវាមួយកាលពីថ្ងៃទី២៩ ធ្នូ ក៏ប៉ុន្តែអត្រាវិទ្យុសកម្មត្រូវបានពិនិត្យឃើញថានៅធម្មតា។ ទូរទស្សន៍ក្នុងស្រុកមួយបានចេញផ្សាយរូបភាពទាំងឡាយបង្ហាញពីពពក ផ្សែងយ៉ាងធំហុយពីលើការដ្ឋាននេះនៅតំបន់ MOURMANSK នាភាគខាងជើងប្រទេស។ បណ្តាឧទ្ធម្ភាគចក្របានខិតខំពន្លត់ភ្លើងដែលតាមសាក្សីទាំងឡាយថា អណ្តាតភ្លើងមានកម្ពស់រហូតដល់១០ម៉ែត្រ ពីលើអគារ។
អាជ្ញាធររុស្ស៊ីនិយាយថា រាល់អាវុធត្រូវបានដកយកចេញពីនាវាមុជទឹកឈ្មោះ EKA-TERINBOURG (ប្រវែង១៦៧ម៉ែត្រ) ដែលនាវាមុជទឹកនេះកាលពីខែកក្កដា កន្លងមកនេះ បានបាញ់មីស៊ីលបាលីស្ទីកមួយគ្រាប់នៅសមុទ្របារ៉ែន និងថា រេអាក់ទ័រនុយក្លេអ៊ែររបស់នាវានេះត្រូវបានបញ្ឈប់។ អ្នកនាំពាក្យម្នាក់របស់ក្រសួងសភាពការណ៍បន្ទាន់រុស្ស៊ីនិយាយថា កម្រិតវិទ្យុសកកម្មនៅធម្មតា ហើយពុំមានមនុស្សណាម្នាក់ត្រូវរបួសឡើយ។ តំណាងម្នាក់របស់ការដ្ឋាននាវាគូសបញ្ជាក់ថា គេបានសម្រេចជ្រមុជនាវាមុជទឹកនេះទៅក្នុងទឹក ហើយទុកតែច្រកខាងលើឱ្យនៅផុតពីទឹក ដើម្បីពន្លត់ភ្លើង។
ភ្លើងហាក់ដូចជាមានប្រភពចេញពីចង្ក្រានប្រើអុសមួយនៃការដ្ឋាននាវា ROSLIAKOVO ស្ថិតនៅចម្ងាយ១.៥០០គីឡូម៉ែត្រខាងជើងក្រុងមូស្គូ ក្នុងពេលជួសជុលនាវានេះ។ នាវាមុជទឹក EKATERINBOURG ជានាវាចំណុះ១៨.២០០តោន កសាងឡើងកាលពីឆ្នាំ១៩៨៤ ដែលវាអាចផ្ទុកមីស៊ីលបាលីស្ទីក១៦គ្រាប់ដែលក្នុងមីស៊ីលនីមួយៗមានក្បាលគ្រាប់៤។ គ្រោះថ្នាក់ធ្ងន់ធ្ងរបំផុតមួយដែលកើតមានលើនាវាមុជទឹករុស្ស៊ីនៃសករាជក្រោយសូវៀតកើតមានកាលពីខែសីហា ឆ្នាំ២០១០ ដោយនាវាមុជទឹកនុយក្លេអ៊ែរ KOURSK បានលិចក្នុងសមុទ្របារ៉ែន ហើយមនុស្ស១១៨នាក់ ក្នុងនាវានេះបានត្រូវស្លាប់ ៕
ចែករំលែកព័តមាននេះ