រាជធានីភ្នំពេញ ៖ លោកហេង ឈាង និងភរិយា ពេលនេះកំពុងស្ថិតនៅក្នុងពន្ធនាគារនៅឡើយ បានបញ្ជូនលិខិតមួយច្បាប់មក សារព័ត៌មាន «កោះសន្តិភាព» ដើម្បីឆ្លើយតប និងកែតម្រូវនូវអត្ថបទរបស់សារព័ត៌មាន «កម្ពុជាថ្មី» ដែលបានចេញផ្សាយដោយដកស្រង់យកសម្តីលោកឧកញ៉ាកុក អាន ដែលបានប្រាប់អ្នកកាសែត ក្រោយពេលចេញពីអង្គសវនាការនៃសាលាដំបូងរាជធានីភ្នំពេញ កាលពីថ្ងៃទី៦ ធ្នូ ឆ្នាំ២០១១ ។
នៅក្នុងសេចក្តីបំភ្លឺនេះ លោកហេង ឈាង ក៏បានលាតត្រដាងផងដែរ នូវភាពមិនប្រក្រតីដែលតុលាការបើកសវនាការកាត់ក្តី ដែលមានតែភាគីម្ខាង ព្រមទាំងយករបាយការណ៍សវនកម្មមិនប្រក្រតីរបស់លោកកាក់ កី មកធ្វើជាសក្ខីភាពដើម្បីកាត់ក្តី ។
លោកហេង ឈាង បញ្ជាក់ក្នុងលិខិតថា ដោយសារទេវតាមានភ្នែក ប្រទេសជាតិនៅមានស្ថាប័នផ្សេង ដ៏ច្រើនលើសលប់ ដែលមានសមត្ថភាព មនសិកាជាតិ មានវិចារណញ្ញាណ និងមានសុភវិនិច្ឆ័យដូចជាវិទ្យាស្ថានគណនេយ្យករជំនាញ និងសវនករកម្ពុជា មានទាំងក្រុមប្រឹក្សា ជាតិគណនេយ្យផង បានរកឃើញថា របាយការណ៍លេខ០០៩កក ចុះថ្ងៃទី១១ តុលា ឆ្នាំ២០១១ របស់សវនករលោកកាក់ កី គឺជាលទ្ធផលដែលបង្ហាញពីប្រតិបត្តិការមួយចំហៀងតែប៉ុណ្ណោះ គឺដូចអ្វីដែលខ្ញុំបាទធ្លាប់បានលើកជារឿយៗថា បណ្តឹងរបស់លោកឧកញ៉ាកុក អាន ជាបណ្តឹងមិនពិត ដោយពួកសវនករទុច្ចរិតទាំងអស់នោះស្រង់យកតែការបង្វែរសាច់ប្រាក់ចេញហើយរបាយការណ៍ខាងលើ របស់លោកកាក់ កី ត្រូវបានឯកឧត្តមស្នងការរាជរដ្ឋាភិបាលប្រចាំវិទ្យាស្ថានគណនេយ្យករ ជំនាញ និងសវនករកម្ពុជា និងជាប្រធានក្រុមប្រឹក្សាជាតិគណនេយ្យចេញលិខិតលេខ០៨៦ ចុះថ្ងៃទី៩ ធ្នូ ឆ្នាំ២០១១ បញ្ជាឱ្យលោកកាក់ កី ធ្វើលិខិតជូនតុលាការ ដើម្បីបំភ្លឺតុលាការកុំឱ្យមានការភ័ណ្ឌច្រឡំ ព្រោះរបាយការណ៍នេះមិនទាន់ចប់សព្វគ្រប់នៅឡើយទេ ។ល។ និង ។ល។
ដោយមិនធ្វើអត្ថាធិប្បាយណាមួយបន្ថែមនោះ ការិយាល័យនិពន្ធសារព័ត៌មាន «កោះសន្តិភាព» បានសម្រេចថតចម្លងលិខិតបំភ្លឺ និងឯកសារពាក់ព័ន្ធ ដែលជាឯកសារផ្លូវការប្រកបទៅដោយយុត្តិធម៌ និងសច្ចធម៌របស់លោកងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ស្នងការរាជរដ្ឋាភិបាលប្រចាំ វ.គ.ស.ក និងជាប្រធានក្រុមប្រឹក្សាជាតិគណនេយ្យ ដើម្បីឱ្យតុលាការមានសក្ខីភាពប្រកបដោយយុត្តិធម៌ក្នុងការវិនិច្ឆ័យសំណុំរឿងរវាងឧកញ៉ា កុក អាន និងហេង ឈាង ដែលក្រុមអ្នកច្បាប់ជាច្រើនកំពុងតាមតានយ៉ាងយកចិត្តទុកដាក់បំផុតនោះ មកចុះផ្សាយដូចខាងក្រោមនេះ ៖
ចែករំលែកព័តមាននេះ