ខេត្តកំពង់ចាម ៖ ឡូត៍នេសាទចំនួន ៣ក្នុងនោះមានឡូត៍លេខ០២,០៣និងលេខ០៩ របស់ខេត្តកំពង់ចាម ត្រូវបានសម្តេចតេជោនាយករដ្ឋមន្រ្តីនៃព្រះរាជាណាចក្រកម្ពុជា សម្រេចលុបចោលទៅហើយទុកឱ្យនៅទំនេរសម្រាប់ដេញថ្លៃនៅឆ្នាំក្រោយ។
ទោះជាបែបនេះក្តីក៏គេសង្កេតឃើញមានឡូត៍នេសាទលេខ០៩ និង០២នៅតែមិនទាន់រើរុះរបាំងព្រួលនិងបង្គោលធ្នោះចេញនោះទេ សង្ស័យថាកំពុងបន្តចាប់យកត្រីបន្តទៀត ។
តាមប្រភពពីប្រជាពលរដ្ឋបានឱ្យដឹងនាព្រឹកថ្ងៃទី១៦ ធ្នូ ២០១១ ថា ដៃឡូត៍នេសាទលេខ ០៩ ស្ថិតនៅភូមិព្រែកជីកឃុំទន្លេបិទ ស្រុកត្បូងឃ្មុំ មិនទាន់រុះរើចេញឱ្យបានអស់ទាំងស្រុងនោះទេ គឺថៅកែធ្នោះបានឱ្យក្រុមកម្មករមួយចំនួនរើរបាំងព្រួលតែនៅផ្នែកខាងលើផ្ទៃទឹក ដែលមើលពីចម្ងាយហាក់បីដូចជារើអស់ទៅហើយ ប៉ុន្តែតាមការពិតនៅក្នុងផ្ទៃទឹកព្រែកមានរបាំងព្រួលទប់សម្រាប់ចាប់ត្រីដដែល ព្រមទាំងមានសាបសម្រាប់ចាប់យកត្រីផងដែរ ។
ប្រជាពលរដ្ឋបានបន្តថា នៅដៃឡូត៍លេខ ០៩ មួយកន្លែងទៀតស្ថិតនៅត្រង់ម្តុំស្ពានមាត់ឃ្មង់ ឃុំជីរោទ៍ទី២ ស្រុកត្បូងឃ្មុំ ក៏ថៅកែធ្នោះ មិនទាន់រើរបាំងព្រួលនិងបង្គោលធ្នោះចេញដែរ គេសង្កេតឃើញមានរបាំងព្រួលនៅព្រោងព្រាតនៅលើផ្ទៃទឹកបឹងក្នុងគោលបំណងបន្តចាប់យកត្រីនៅឡើយ ។ ចំណែកឡូត៍នេសាទលេខ០២ ស្ថិតនៅក្នុងស្រុកកងមាសឯណោះ វិញមានថៅកែធ្នោះឈ្មោះហួន ហុច បានដាក់របាំងធ្នោះ ចាប់យកត្រីដល់ទៅ៤កន្លែង ប៉ុន្តែនៅក្រោយពេលដែលរាជរដ្ឋាភិបាលប្រកាសលុបឡូត៍នេសាទនេះឃើញថា ថៅកែបានរុះរើបានតែ១កន្លែងស្ថិតនៅត្រង់ចំណុចគោដេកស្ថិតក្នុងភូមិពាមក្នុង ឃុំព្រែកក្របៅ ស្រុកកងមាស ហើយនៅកន្លែង៣ទៀតមិនទាន់រុះនោះទេ ទុកចាប់ត្រី។
លោកគង់ ពុទ្វារិទ្ធ ប្រធានរដ្ឋបាលជលផលកំពង់ចាម ប្រាប់តាមទូរស័ព្ទឱ្យដឹងថា ប្រមុខរាជរដ្ឋភិបាលកម្ពុជា បានសម្រេចលុបឡូត៍នេសាទចំនួន៣ ក្នុងនោះមានឡូត៍លេខ០២ ស្ថិតនៅស្រុកកងមាស-ព្រៃឈរ ឡូត៍លេខ០៣ ស្ថិតនៅស្រុកបាធាយ-ជើងព្រៃ និងឡូត៍លេខ០៩ ស្ថិតនៅស្រុកត្បូងឃ្មុំកោះសូទិនអូររាំងឪ ។ ពេលទទួលបានបញ្ជាពីថ្នាក់លើ រូបលោកបានចាត់តាំងឱ្យម្លាំងក្រោមឪវាទចុះទៅតាមឡូត៍នេសាទទាំង៣ដោយបានឱ្យថៅកែធ្នោះ ធ្វើកិច្ចសន្យារើរុះរបាំងព្រួលនិងបង្គោលធ្នោះចេញ ។ ក្នុងជំហានដំបូងតម្រូវឱ្យរើរបាំងព្រួលចេញកំណត់ក្នុងរយៈពេល៣ថ្ងៃ ។ ចំណែកបង្គោលធ្នោះវិញយ៉ាងយូររយៈពេល១ខែ ត្រូវតែយកចេញមិនឱ្យមាន។ ប្រសិនណាបើមិនអនុវត្តន៍តាមការណែនាំទេនោះនឹងប្រើវិធានការក្តៅ។ ឡូត៍នេសាទទាំង៣ ខាងលើឃើញថា ឡូត៍លេខ០៩ រើរុះបានច្រើនជាងគេដែលមានថៅកែឈ្មោះត្រាង សំរាំង រស់នៅស្រុកកោះសូទិន ។
ប៉ុន្តែប្រជាពលរដ្ឋរស់នៅក្នុងស្រុកព្រៃឈរ បាននាំគ្នាចេញទៅរកនេសាទរាយមងនៅត្រង់ចំណុចបឹងធំ បែរជាត្រូវថៅកែឡូត៍នេសាទចាប់យកមងទៅហែកចោលដែលបង្កឱ្យមានការប្តឹងប្តល់គ្នាទៀតផង។ ជាក់ស្តែងនៅថ្ងៃទី១៦ ធ្នូ ២០១១ ទៅហើយរបាំងធ្នោះឡូត៍លេខ០២ស្ថិតនៅភូមិពាមក្នុងឃុំព្រែកក្របៅ ស្រុកកងមាសមិនទាន់រើរុះនៅឡើយទេ។ ការយឺតយាវនេះអាចជាចេតនាទាក់ទងនៅនឹងជំនាញរដ្ឋបាលជលផលកំពង់ចាមតែម្តង។
ដោយឡែកទៀត ឡូត៍នេសាទលេខ១ ស្រុកស៊ីធរកណ្តាល ខេត្តព្រៃវែង ក៏អ្នកស្រុកមិនអាចទៅនេសាទត្រីជាលក្ខណៈគ្រួសារបានដែរ៕
ចែករំលែកព័តមាននេះ