រាជធានីភ្នំពេញ ៖ និស្សិតកម្ពុជាចំនួន៣៣នាក់ ដែលទទួលបានអាហារូបករណ៍ពីរដ្ឋាភិបាលអូស្ត្រាលី នឹងចេញដំណើរទៅបំពេញការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅតាមបណ្តាមហាវិទ្យាល័យដែលមានកិត្យានុភាពនៅប្រទេស អូស្ត្រាលី នាពេលឆាប់ៗនេះ ។
រាជធានីភ្នំពេញ ៖ និស្សិតកម្ពុជាចំនួន៣៣នាក់ ដែលទទួលបានអាហារូបករណ៍ពីរដ្ឋាភិបាលអូស្ត្រាលី នឹងចេញដំណើរទៅបំពេញការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅតាមបណ្តាមហាវិទ្យាល័យដែលមានកិត្យានុភាពនៅប្រទេសអូស្ត្រាលី នាពេលឆាប់ៗនេះ ។
នៅល្ងាចថ្ងៃទី១៤ធ្នូ លោកជំទាវផេននីរីឆាដស៍ ឯកអគ្គរាជទូតអូស្ត្រាលីប្រចាំកម្ពុជា បានរៀបចំពិធីជប់លៀងជូនដំណើរនិស្សិតអាហារូបករណ៍ទាំងអស់នៅឯនិវេសនដ្ឋានក្នុងរាជធានីភ្នំពេញ ។
លោកជំទាវផេននី រីឆាដស៍ មានប្រសាសន៍ ថា ការប្រកួតប្រជែងដើម្បីទទួលបានអាហារូបករណ៍នេះ គឺមានលក្ខណៈតឹងតែងដែលនិស្សិតគ្រប់រូបបានបង្ហាញឱ្យឃើញនូវសមត្ថភាពទាំងការសិក្សាក៏ដូចជាមានបទពិសោធន៍ការងារដ៏គួរឱ្យចាប់អារម្មណ៍។ លោកជំទាវមានជំនឿថា និស្សិតទាំងអស់ពិតជាមានលក្ខណសម្បត្តិចាំបាច់សម្រាប់ទទួលបានជោគជ័យទាំងការសិក្សានិងការស្នាក់នៅប្រទេសអូស្ត្រាលី ។ ទន្ទឹមនោះ លោកជំទាវរំពឹងថា ក្រោយពេលបញ្ចប់ការសិក្សាប្រកបដោយជោគជ័យ ហើយត្រឡប់មកវិញនឹងចូលរួមចំណែកយ៉ាងខ្លាំងក្លាក្នុងការអភិវឌ្ឍនៅកន្លែងរបស់ពួកគេ និងកន្លែងផ្សេងៗទៀតផងដែរ។
លោកជំទាវបញ្ជាក់ថា កម្មវិធីអាហារូបករណ៍អូស្ត្រាលី គឺជាផ្នែកមួយដ៏សំខាន់សម្រាប់កិច្ចសហប្រតិបត្តិការអភិវឌ្ឍន៍របស់អូស្ត្រាលីមិនមែនតែសម្រាប់ប្រទេសកម្ពុជាមួយទេ ប៉ុន្តែសម្រាប់តំបន់អាស៊ីប៉ាស៊ីហ្វិក និងពិភពលោកទាំងមូល ។ កម្មវិធីនេះ បានរួមចំណែកយ៉ាងសំខាន់ដល់ការអភិវឌ្ឍធនធានមនុស្សរួមទាំងកសាង និងធ្វើឱ្យមានស្ថិរភាពពីទំនាក់ទំនងរយៈពេលវែង រវាងប្រជាជន និងប្រជាជនរបស់អូស្រ្តាលី និងជាមួយប្រទេសជាដៃគូរបស់យើង ។
កម្មវិធីអាហារូបករណ៍អូស្ត្រាលីបានពង្រឹងបន្ថែមនូវទំនាក់ទំនងជាវិជ្ជមានរវាងរដ្ឋាភិបាល និងប្រជាជននៃប្រទេសទាំងពីរ ។ ទំនាក់ទំនងនេះ នឹងជួយបង្កើននូវទំនាក់ទំនងលើវិស័យធុរកិច្ច សិក្សាធិការ និងសង្គម ដែលនឹងជំរុញដល់ការអភិវឌ្ឍទាំងក្នុងស្រុក និងក្នុងតំបន់ ។
ចាប់ពីឆ្នាំ១៩៩៤ មកមាននិស្សិតកម្ពុជា លើសពី៤៧០នាក់ បានទទួលអាហារូបករណ៍សម្រាប់ការអភិវឌ្ឍរយៈពេលវែងដែលគាំទ្រដោយរាជរដ្ឋាភិបាលអូស្ត្រាលី ក្នុងចំណោមនោះ មាននិស្សិតច្រើនជាង៣១០នាក់បានបញ្ចប់ការសិក្សាប្រកបដោយជោគជ័យ ហើយត្រឡប់មកកម្ពុជាវិញ ដោយមានជំនាញវិជ្ជាជីវៈខ្ពស់ជាងមុន ៕
ចែករំលែកព័តមាននេះ