ខេត្តកោះកុង ៖ ឧបទ្ទវហេតុស្មានមិនដល់មួយបានកើតមាននៅចំណុចឈរជើងរបស់កងទ័ពកម្ពុជា ដែលឧទ្ធម្គាគចក្រសៀមមួយគ្រឿងបានព្យាយាមរំលោភដោយបំពានចូលក្នុងទឹកដីកម្ពុជា ហើយក៏ត្រូវបានកងទ័ពកម្ពុជាបាញ់រះដោយកាំភ្លើងអាកា ដើម្បីរារាំង។ ដោយការបាញ់រារាំងពីសំណាក់កងទ័ពកម្ពុជានោះ ខាងសៀមក៏បាញ់ដោយកាំភ្លើងដែលបំពាក់លើឧទ្ធម្ភាគចក្រតបវិញដែរ រួចក៏ហោះចូលទៅក្នុងទឹកដីរបស់ខ្លួនវិញ ។ នេះជាឧបទ្ទវហេតុផ្ទុះអាវុធលើកទី១ហើយ បន្ទាប់ពីមានការស្ងប់ស្ងាត់តាមបន្ទាត់ព្រំដែនក្រោយពេលដែលប្រទេសថៃបានផ្លាស់ប្តូររដ្ឋាភិបាល ក្រោយការបោះឆ្នោតកាលពីខែកក្កដា កន្លងមក ។
តាមសេចក្តីរាយការណ៍ពីហេតុការណ៍នេះត្រូវបានឱ្យដឹងថា កាលពីវេលាម៉ោង១និង៣០នាទីរសៀលថ្ងៃទី១៥ ធ្នូ ២០១១ មានឧទ្ធម្ភាគចក្រទាហានថៃមួួយគ្រឿងបានហោះរំលងចូលក្នុងទឹកដីកម្ពុជា លើចំណុចឈរជើងរបស់វរៈការពារព្រំដែនលេខ៣០៣ ចំណុះឱ្យតំបន់ប្រតិបត្តិការសឹកកោះកុង ស្ថិតក្នុងភូមិសាស្ត្រភូមិកោះប៉ោ ឃុំប៉ាក់ខ្លង ស្រុកមណ្ឌលសីមា ខេត្តកោះកុង ហើយបានហោះបន្ទាបខ្លួនទំនងនឹងធ្វើការចុះចតត្រង់ចំណុចឈរជើងរបស់កងទ័ពកម្ពុជា តែត្រូវបានកងទ័ពចំណុះឱ្យវរៈសេនាតូចលេខ៣០៣ ការពារព្រំដែនបាញ់ប្រហារដោយអាវុធ អាកាជាច្រើនគ្រាប់ដើម្បីរារាំងកុំឱ្យមានការចុះចត ។ បន្ទាប់មក យន្តហោះឈ្លានពាននេះក៏ធ្វើការហោះហើរចូលក្នុងទឹកដីថៃវិញ ។
តាមមន្ត្រីយោធាកម្ពុជាមួយរូបសុំមិនបញ្ចេញឈ្មោះបញ្ជាក់ថា យន្តហោះថៃបានបន្ទាបខ្លួនបម្រុងចុះចតត្រង់ចំណុចលេខ៣២៦ ជាតំបន់គ្រប់គ្រងដោយទាហានកម្ពុជា វរសេនាតូចលេខ៣០៣ តែត្រូវបានកងទ័ពកម្ពុជាបាញ់រះដោយអាវុធអាកា ជាច្រើនគ្រាប់សំដៅទៅយន្តហោះនោះ ហើយខណៈនោះដែរ ទាហានដែលជិះក្នុងយន្តហោះក៏បានបាញ់តបតមកលើកងទ័ពកម្ពុជាយើងវិញអស់ជាច្រើនគ្រាប់ដែរដោយកាំភ្លើងយន្ត ។ ប៉ុន្តែមិនយូរប៉ុន្មានយន្តហោះថៃក៏ហោះចូលទៅក្នុងទឹកដីគេវិញទៅ ហើយក៏មិនមានគ្រោះថ្នាក់ដោយឧប្បត្តិហេតុបាញ់តដៃគ្នានោះទេ ។
មន្ត្រីទំនាក់ទំនងព្រំដែនកម្ពុជា-ថៃបានថ្លែងថា ពេលនេះយន្តហោះថៃបានហោះទៅចុះចតនៅចំណុចខៅឡាន ស្ថិតក្នុងស្រុកខ្លងយ៉ៃ ខេត្តត្រាត ជាបន្ទាយរបស់ទាហានឈុតខ្មៅថៃ ហើយភាគីថៃបានអះអាងថា យន្តហោះរបស់ពួកគេត្រូវខូចខាតដោយគ្រាប់កាំភ្លើងរបស់ទាហានខ្មែរ ។ ប៉ុន្តែការចោទប្រកាន់ពុំទាន់មានដំណោះស្រាយនៅឡើយ ព្រោះជាសមត្ថកិច្ចរបស់ក្រសួងការពារជាតិ ៕
ចែករំលែកព័តមាននេះ