ខេត្តកោះកុង: ឧទ្ធម្ភាគចក្រថៃមួយគ្រឿងត្រូវបានទាហានកម្ពុជាបាញ់ប្រឆាំងបណ្ដាលឱ្យឃ្លីងឃ្លោងខណៈហោះចូលមកក្នុងបូរណភាពទឹកដីកម្ពុជាត្រង់ចំណុច ៣២៩ ភ្នំតាមីន សិ្ថតក្នុងឃុំប៉ាក់ខ្លង ស្រុកមណ្ឌលសីមា ខេត្តកោះកុង កាលពីវេលាម៉ោង ១ និង ៤០ នាទីរសៀល ថ្ងៃទី១៥ ធ្នូ ២០១១ ។
មន្រ្ដីយោធាកម្ពុជាការពារព្រំដែនបាននិយាយឱ្យដឹងថា ខណៈឧទ្ធម្ភាគចក្រថៃហោះចូលមកក្នុងបូរណភាពទឹកដីកម្ពុជា គឺទាហានកម្ពុជាបាញ់ដោយកាំភ្លើងដៃប្រឆាំងដើម្បីកាពារទឹកដីជិត ១០០ គ្រាប់ ហើយឃើញថា ឧទ្ធម្ភាគចក្រថៃនោះត្រូវស្លាបក៏បង្ខំចុះចតជាបន្ទាន់នៅក្នុងទឹកដីរបស់ខ្លួនវិញនៅចំខាវឡាន ស្រុកខ្លងយ៉ៃ ខេត្តត្រាត ដោយមុនពេលចុះចត ថៃក៏បានបាញ់កាំភ្លើងប្រភេទ១២ក្បៀសមកលើភាគីកម្ពុជាវិញដែរ។ ប៉ុន្តែទោះជាយ៉ាងណាភាគីទាំងពីរមិនមានរងបួសអ្វីនោះទេ ហើយថា ការផ្ទុះអាវុធនេះកើតឡើង បន្ទាប់ពីឧទ្ធម្ភាគចក្ររបស់យោធាថៃ ១ គ្រឿង បានព្យាយាមចុះចតនៅក្នុងភូមិសាស្ត្រ ៣២៩ ភ្នំតាមីនខ្សែបន្ទាត់ព្រំដែនកម្ពុជា សិ្ថតក្នុងភូមិសាស្ត្រខេត្តកោះកុង ក៏ត្រូវយោធាកម្ពុជាដែលការពារតំបន់នោះ រារាំងមិនឲ្យចុះចត។
សូមបញ្ជាក់ថា ចំណុចកើតហេតុ គឺជាចំណុចដ៏ក្តៅគគុកមួយដែលយោធាថៃតែងតែព្យាយាយាមលើកទ័ពចូលមក កាន់កាប់ ប៉ុនែ្តជានិច្ចជាកាលត្រូវយោធាខ្មែរយើងទប់ស្កាត់មិនឲ្យជ្រៀត ចូលមកបានឡើយ។ ព័ត៌មានបន្ថែមនឹងមានផ្សាយជូនបន្តិចទៀតនេះ៕
ចែករំលែកព័តមាននេះ